Жаңалықтар

«Шаттық» фестивалі мәресіне жетті 

    Жұма, 06 Шілде 2018 19:41

Астанада 12 елдің өнерлі жас өрендерінің басын қосқан балалар шығармашылығының «Шаттық» фестивалі аяқталды.

Халықаралық дәрежедегі байқауға биыл 600-ден астам ұл-қыз қатысты. «Үздік хореография» аталымы бойынша жүлдені Петропавл қаласының намысын қорғаған топ еншіледі.

Ал «Үздік вокал» аталымында қостанайлық оқушыға тең келер дарынды жас табылмады. «Халықтық орындау» аталымы бойынша өзбекстандық қатысушы үздік атанды. Енді олар Испания, Сербия, Болгария және Чехияда өтетін халықаралық байқауларға аттанып, сонда ел намысын қорғайды.  

Қарлығаш Әбдікәрімова, фестиваль ұйымдастырушысы:

-Олардан да Роза шығады, олардан да Бибігүл шығады. Олардан да Әлібек Днишев шығады деп күтеміз. Димаштың өзі де осындай кішкентай балалардан шығып отыр ғой қазіргі міне. Сондықтан да осы балалардың ішінен көптеген-көптеген таланттар шығатынына мен өте сенемін. Себебі олар бүгін өзінің өнерін халыққа көрсетіп жатыр. Әрбір Қазақстанның түкпірінен, ауылдан келген балалар бар.

Әлемнің танымал фотографтары Астананың 20 жылдығына тарту жасады

    Жұма, 06 Шілде 2018 19:37

Бір ай бойы Малайзия, Словакия, Германия, Түркия, Франция, Индонезия, Беларусь, Өзбекстан және Қазақстан елдерінің 12 фотоөнер шебері елордамызды суретке түсіріп, үздік еңбектерін «Нұржол» булварінде көпшілік назарына ұсынды.

Данай Пернебайұлы, қала қонағы:

-Шымкент қаласынан келіп отырмыз. Выставканы аралап шықтық. Таза суреттер. Картиналар ұнады. Осындай жерлерде картиналар көп болса екен дейміз. Жастар осыдан үлгі алса, жақсы болар еді.

Астана күніне мажарлық өнерпаздар би тарту етті  

    Жұма, 06 Шілде 2018 19:33

 

Астана күнін атап өтуге мажарлық өнерпаздар да атсалысуда. Елордаға арнайы келген венгриялық бишілер бүгін ашық аспан астындағы амфитеатрда концерт өткізіп жатыр.

Олар мажар және қазақ халқы әндерінің ырғағымен би қойылымдарын қойып, көпшілікті тәнті қылуда.

1994 жылдан бастап көптеген халықаралық фестивальда өнер көрсетіп жүрген би тобы Астананың 20 жылдығына орай арнайы қойылымдар әзірлепті. Композицияда өздерін қыпшақпыз дейтін мажарлықтар мен қазақ халқының қыл өтпес достығы көрсетіледі. 

Оңайша Мақсұмқызы, шығыстанушы:

-Жиырма сегіз адам келді. Бұл Кичкеметтің ұлттық билер ансамблі. Бұлар әдейі ресми би билейтіндер емес, халықтың ішінен өздері шыққан, 1994 жылы құрылған би ансамблі. Жыл сайын жастарды тәрбиелеп өздері жаңартып отырады. Астананың 20 жылдығы біз үшін де өте қуаныш. 

«Нұр Әлем» музейінде роботтар көрмесі ашылды

    Жұма, 06 Шілде 2018 19:29

Елорда күнін тойлауға «Астана-ЭКСПО-2017» ұлттық компаниясы арнайы ойын-сауық бағдарламасын әзірлепті. Қалашықта цирк қойылымдары ұсынылып, ашық алаңда отандық жұлдыздар өнер көрсетуде. Ал «Нұр Әлем» музейінде роботтар көрмесі ашылды.

«Қоршауына қарап таң қалдық, дуалына қарап тамсандық». Дүйім жұртты осылай тәнті қылған «ЭКСПО» аумағындағы сәулеті келіскен «Нұр Әлем» түрлене түскен. Демалыс күндері 3 мыңға дейін адам келіп аралайды екен. Алмас Қарымсақов ЭКСПО-ға жаз бойы туған-туыс достарын әкеліп аралатқан. Құлтемірлермен тілдесуді үйреніп алған.

Қазір елорданың мерейтойына орай мұнда Астананың тарихы туралы, Тәуелсіз Қазақстанның қалыптасу кезеңі мен мемлекеттік даму стратегиясы жайлы ақпарат беретін инновациялық инсталляциялар қойылған. Гид қызметкерлердің тең жартысын роботтар алмастырған.

Барлығы музейде 17 робот жұмыс істейді. Жыл соңына дейін олар қазақ тілінде сөйлеуге үйренбек. Мәселен, мына пысық робот еден жуса, көк түсті құлтемір тәртіп сақшысы. У-шу шыға қалса, ескерту жасайды. Роботтардың барлығы биге құмар.

Бірінші қабатта қала күні отандық цирк қызметкерлері өз өнерлерін ортаға салады. Келушілер осы маңда ойын залына да кіріп, көңіл көтермек.

Нұрлыбек Қаналы, Астана қаласының тұрғыны:

-Зомбиларға қарсы ойнадым, олар маған шабуыл жасады. Мен қорғану керек болдым, соңғы келген зомбилардан ұтылып қалдым.

Индира Жылқайдарова, тілші:

-Біз қазір виртуалдық шындық зертханасында тұрмыз. Мұнда еліміздің бас шаһары Астана, Алматы қалаларына, этноауылға саяхат жасауға болады. Біз сол ежелгі қазақ қонысына барып көреміз қазір. Міне, нағыз қазақтың жайлауына топ ете түстім, бұл жерде 4 бірдей ақшаңқан киіз үйді көріп тұрмын. Сондай-ақ ұлттық шапан киген ер азамат маздаған оттың жанында отыр.

«ЭКСПО» ұлттық компаниясы Астананың 20 жылдығына орай арнайы ойын-сауық бағдарламасын да әзірлепті.

Нұргүл Алипинова, «Астана ЭКСПО-2017» ҰК» АҚ департаменті директорының орынбасары:

-Ашық музыкалық алаңда 7 шілдеден бастап арнайы музыкалық ойын-сауық бағдарлама басталады. «ЭКСПО» аумағында «Шапито» циркі ашылатын болады.

Айта кетейік, «Нұр Әлем» музейін ғана жыл соңына дейін 500 мың адам аралайды деген болжам бар.

Авторлары: Индира Жылқайдарова, Әлібек Әлиев