ҚАЗАҚСТАННЫҢ ҮШІНШІ ЖАҢҒЫРУЫ: ЖАҺАНДЫҚ БӘСЕКЕГЕ ҚАБІЛЕТТІЛІК

БҚО шаруашылықтары Иранға 180 тонна қой етін экспорттады

    Сәрсенбі, 13 Желтоқсан 2017 21:40

Биыл жазда Қазақстаннан Иран мемлекетіне қой етін экспорттаудың ветеринарлық талаптары келісілген болатын.

Осы мүмкіндікті тиімді пайдаланып, шетелге ет шығаруда белсенділік танытқан өңірдің бірі – Батыс Қазақстан.

Облыс шаруашылықтары жыл басынан бері 337 тонна қой етін экспорттаса, соның 180 тоннасын Парсы еліне жіберген. Келісімге сай алдағы айларда Иранға тағы мың тонна мұздатылған тоқты еті жеткізіледі.

Насыр Карими Жайықтың жағасында жаздан бері жүр. Ол – ирандық компаниялардың осындағы өкілі. Ет комбинатына кірген қойлардың халал сойылуынан бастап, аурудан ада болуын, еттің тиісті шекке дейін мұздатылуын қатаң тексереді. Оған қоса Шопан ата тұқымының 18 айдан аспаған еркек тоқты болуын да қадағалайды.

Насыр Карими, Ирандық компания өкілі:

- Бұрын біз қой етін Аустралия мен Бразилиядан алып келдік. Енді Қазақстаннан импортты бастадық. Себебі Иранның етке сұранысы мен қазақ елінің мүмкіндіктері өзара сай келеді әрі бұл жақта табиғи жайылымда өскен қой етінің сапасы да тамаша.

Иранға ет тасымалы күзге салым басталды. Содан бері 180 тонна ет экспортталған. Күні кеше белгілі болғандай, осы іспен айналысушы парсылық үш компания Иран нарығына әрқайсысы Қазақстаннан тағы 300 тоннадан ет кіргізуге рұқсат алған. Бұған өңірдің әлеуеті толық жеткілікті.

Алмат Есболов, БҚО Ауылшаруашылық басқармасының бөлім басшысы:

- Мың тоннаға келісімшарт жасалды. Ол шикізаттың дайындалуына байланысты. Оларға хабар беріліп, жеткізіліп отыр. Облыс шаруашылықтары ешқандай кедергісіз малдарын, өнімдерін өткізіп отыр.

Облыста бүгінде қой-ешкінің саны 1 млн 100 мыңнан асады. Бұрын шаруалар өсірген қойын өткізу үшін Атырау, Ақтау асатын. Қолайлы бағаға сату үшін апталап, айлап жататын. Енді ол қиындықтар артта қалды.

Әділжан Қаражанов, қой өсіруші шаруашылық өкілі:

- Өте қолайлы. Себебі бұл жерде жанармай үнемдейміз және шаруашылыққа өте тиімді болып келеді. Үкімет тарапынан тапсырғанда, мысалы 180 бас тапсырсақ, әрқайсысына мемлекет тарапынан субсидия қарастырылған. Бағасы әрбір қойға мың жарым теңгеден.

Жыл басынан бері Орал өңірінен мың жарым тонна сиыр еті және 337 тонна қой еті экспортталған. Соңғысына сұраныстың артуы қой шаруашылығының дамуына соны серпін берері сөзсіз.

Авторлары: Ерденбек Жылқайдарұлы, Руслан Ғазезов

Елімізде стандарттау бойынша ұлттық орган құрылады

    Сәрсенбі, 13 Желтоқсан 2017 19:17

Қазақстан экономикасын дамыту үшін стандарттау саласын халықаралық үлгіге ауыстыру маңызды.

Сондықтан онымен айналысатын арнайы ұлттық орган құру қажет. Бүгін Инвестициялар және даму министрі Жеңіс Қасымбек Парламент Мәжілісінің жалпы отырысында осындай ұсыныс айтты.

«Стандарттау туралы» заң жобасын бірінші оқылымда мақұлдаған депутаттар министрдің бұл ұсынысына күмәнмен қарайды. «Мұндай органның құрылуы делдалдар санын арттырып, қызмет құнының қымбаттауына әкеп соқтыруы мүмкін», – дейді олар. Оның үстіне заң жобасында ұлттық органмен келісімшарт жасасу үшін заңды және жеке тұлғаларға қойылатын талаптар нақты көрсетілмеген. Мәжілісмендер министрлікке заңның осы нормасын екінші оқылымға дейін жетілдіруді тапсырды.

Жалпы стандарттау елдегі еңбек өнімділігін арттыруға сеп болады деген есеп бар.

Омархан Өксікбаев, ҚР Парламенті Мәжілісінің депутаты:

- Біз неге жыл сайын бір мың стандарт жасаумен шектеліп отырмыз? Ресей ғалымдары зерттеу жүргізіп, мынаны анықтапты. Егер стандарттардың қорын 1% ұлғайтса, онда ол ІЖӨ 10,4 пайызына ықпал ететінін көрсетіпті. Ал бізде осындай зерттеу немесе талдау болды ма? Осы заң жобасын қабылдағаннан кейін стандарттау еліміздің экономикасына қаншалықты үлес қосады деп айта аласыз?

Жеңіс Қасымбек, ҚР Инвестициялар және даму министрі:

- Жаңа стандарттарды қабылдауды жылына бір пайызға өсіруге мүмкіндік береді. Осы заңды қабылдау арқылы жаңа стандарттарды қабылдау экономикамызға үлкен әсер етеді деп сенеміз. Сіздің айтқаныңыз дұрыс, біз жылына бір мың стандартты қабылдауды жоспарлап отырмыз. Осы заңның арқасында олар өседі деп жоспарлап отырмыз.

Елімізде мемлекеттік бағдарламалар арқылы тартылған инвестиция 5,7 пайызға көбейген

    Сәрсенбі, 13 Желтоқсан 2017 14:05

Биыл қаңтар-қараша айларында еліміздің жалпы ішкі өнімі 2016 жылмен салыстырғанда, 3,9 пайыға көбейген.

Оның ішінде өнеркәсіп, ауыл шаруашылығы, құрылыс, сауда, транспорт пен байланыс саласы 5,4 пайызға өскен. «Нұрлы жер» мен «Индустриалды инновациялық даму» бағдарламасы арқылы тартылған инвестиция 5,7 пайызға көбейген. Одан өзге сауда-саттыққа тартылған инвестиция 177,1 миллиард теңгеге, өнеркәсіп 3,9 пайызға, құрылыс 63,8 миллиард теңгеге, ауыл шаруашылығы 27 пайызға өскен. Ал қаңтар-қыркүйек аралығындағы халықтың жан басына шаққандағы орташа табысы 5,6 пайызға өсті. Бұл 709,8 мың теңгеге жуық.

Биыл 9,1 млн тонна астық экспортталады

    Сейсенбі, 12 Желтоқсан 2017 22:30

Биыл ел диқандары 21 млн тоннадан астам астық жинады. Жоспар бойынша, соның 9,1 млн тоннасы экспортталады.

Алайда осы астықты тасымалдайтын вагон жетіспей жатыр. Тек желтоқсан айының өзінде ұн мен бидайды экспорттау үшін 16,5 мың вагон қажет екен.

Ал бізде бас-аяғы 9 мың вагон бар. Оның өзін тиімді пайдалана алмай отырмыз. Бүгін Мәжілісте осы мәселеге арналған отырыс өтті. Аграрлық комитеттің депутаттары қажетті құрылымдардың өкілдерін шақырып, вагон жетіспеушілігін шешудің жолдарын талқылады. Ауыл шаруашылығы вице-министрі Нұржан Әлтаевтың айтуынша, бұл тапшылыққа бірнеше фактор әсер еткен.

Оның біріншісі биыл Ресей мен Украинада астық бітік шығып, Әзербайжан, Грузия және Түркия секілді жақын бағыттардың сұранысын орындап қойған. Сондықтан қазақстандық өнім Ауғанстанға жөнелтілген. Алайда ол елдің инфрақұрылымы астық қабылдауға дайын болмай шыққан. Қазір Ауғанстанның Галаба стансасында біздің 3,5 мың вагон қаңтарылып тұр. Олар 4 қарашада аттанған. Әлі оралған жоқ.

Нұржан Әлтаев, ҚР Ауылшаруашылығы вице-министрі:

–2018 жылдың көктеміне дейін бидай импортына Иран тарапы енгізген шектеумен саладағы жағдай ушыға түсті. Иранға жоспарланған астық экспорты да Ауғанстан жағына қайта бағытталды. Астық тиеуге арналған вагондардың тапшылығы туындады, оны шешуге шаралар да қабылданды. Басқа елдерден 2 270 вагон тартылды. Сонымен қатар аптаның соңына дейін Қазақстанға тағы 1 000  вагон, жаңа жылға дейін  500, ал  2018 жылдың 10 қаңтарына дейін тағы 500 вагон жеткізіледі.

Жексенбай Дүйсебаев, ҚР Парламенті Мәжілісінің депутаты:  

–Өзіміздің вагондарды да жалға берілгені бар екен. Оны енді тексеру керек. Мысалы, көрші Ресейде биыл 130 млн тонна астық дайындаған. Соған біздің вагондар жалға берілген. Біразы. Өзіміздің нарық керісінше вагондарға тапшы болып қалған.