Экономика - "Хабар" телеарнасы
ҚАЗАҚСТАННЫҢ ҮШІНШІ ЖАҢҒЫРУЫ: ЖАҺАНДЫҚ БӘСЕКЕГЕ ҚАБІЛЕТТІЛІК
Сейсенбі, 17 Қазан 2017 09:14

Қазақ-қырғыз шекарасында ветеринарлық және фитосанитарлық бақылау күшейтілді.

Соңғы бірнеше күннің ішінде шекарада мың тоннаға жуық тауар тиеген 127 жүк көлігі тексерілді. Нәтижесінде заңға қайшы 20 дерек анықталды. Ал кеше Жамбыл облысындағы Қарасу бекетінде Қырғызстаннан Ресейге бағыт алған жүк көлігін тексеру кезінде 20 тонна жемістен карантинді зиянкестердің бар екені анықталды. Құрма, анар және жүзім тиеген ауыр жүк Қырғызстанғакері қайтарылды. Егер мұндай олқылыққа қайта жол берілетін болса, Қазақстан тарапы бұл елден жеміс тасымалдауға шектеу қоюға мәжбүр болады.

Карантин жөніндегі мемлекеттік инспектор Ұлан Есенбаевтың айтуынша, Қырғызстаннан Қазақстанның Алматы қаласына қарай тасымалданып бара жатқан 3 тонна жүзім өніміне карантиндік тексеріс жүргізді. Морфологиялық ұқсас болған зиянды организмдер карантиндік зертханаға жіберілді. Сондай-ақ Қырғызстаннан Оңтүстік Қазақстан облысына бет алған көліктен 3 тонна алма өнімін тексеру кезінде шығыс жеміс жебірі анықталды. Сонымен қатар тауардың таңбалануы толық жүргізілмегендігі анықталды. Осы себептен карантиндік өнім кері қайтарылды. Оған қоса Қырғызстаннан Қазақстанның Қарағанды облысына 20 тонна жүзімді тасымалдау тоқтатылды. Себеп тексеріс кезінде өнімнің таңбаланбағаны белгілі болды. Қазіргі таңда карантиндік өнім зертханаға жіберілді.

Еркен Омаров, ҚР АШМ АӨК мемлекеттік инспекция комитетінің бас сарапшысы:

100-ден астам жүк көлігі тексерілді. 800 тоннадан астамы кері қайтарылды. Заңға қайшы әрекеттер бойынша тиісті шешім шығарылды. Жұмыс қалыпты жағдайда жүріп жатыр. Мұндай шара шекарамыз бір барлық мемлекетке қатысты өткізілуде.

Дүйсенбі, 16 Қазан 2017 19:47

Бүгін еліміздің газ саласы үшін маңызы зор тарихи оқиға болды.

Тұңғыш рет қазақстандық газды Қытайға экспорттау басталды. Көгілдір отын шығысқа «Бейнеу-Бозой-Шымкент» магистральды газ құбыры арқылы жол тартты. Көрші елге жылына қанша текше метр газ экспортталады және одан түсетін пайда көлемі қандай?

Қазақстаннан Қытайға 1 жылда 5 млрд текше метр газ экспортталады. «Бейнеу-Бозой-Шымкент» құбырымен батыстан жеткен көгілдір отын «Ақбұлақ» станциясы арқылы «Орталық Азия – Қытай» трансұлттық газ құбырына жіберіледі.

Қанат Бозымбаев, ҚР Энергетика министрі:

 - Бірінші рет тарихта Қазақстан газы басқа елдерге, басқа бағытқа жіберіліп, осы экспортқа ие болып отырмыз. «ҚазТрансГаз-ға» кіретін компаниялар және осы газды өңдейтін компаниялар 900 млн доллардан астам пайда алатын болады. 

Бұған дейін Қазақстан көгілдір отынын тек Ресей арқылы Еуропаға экспорттап келсе, енді тікелей тасымалдауға жол ашылды. Бұл энергетикалық қауіпсіздікті қамтамасыз етпек.

Сауат Мыңбаев, «ҚазМұнайГаз» ҰК» АҚ басқарма төрағасы:

- Біздің газ Қытай Республикасына бармаған болатын. Транзиттік жұмыстар атқарылып біткен. Түрікмен, өзбек газдарын Қытай Республикасына транзиттеген болатынбыз. Былтыр желтоқсан айында «Бейнеу-Бозой-Шымкент» газ құбыры аяқталғаннан кейін біздің газды да тасымалдау мүмкіншілігі табылды.

Осы уақытқа дейін «Бейнеу-Бозой-Шымкент» магистральды газ құбыры арқылы тек ішкі нарыққа 7 млрд текше метрден астам газ тасымалданып, 500 елді мекен көгілдір отынмен қамтылған болатын. Жалпы, елімізде жылына 40 млрд тешке метрден астам газ өндіріледі. Оның 16 млрд-ы экспортталса, ішкі нарықта тұтынылатыны – 13-14 млрд. Ал қалғаны ұңғымаларға кері айдалады. Сондықтан жаңа бағыттың ашылуы – экономикалық табыстың артуын қамтамасыз етеді. 

Авторлары: Гүлмайра Қуатбайқызы, Абдулла Исаев

Жұма, 13 Қазан 2017 23:42

Қазақстанда мұнай тасымалдау жүйесі көпвекторлы принциппен қалыптасқан. Былтыр iске қосылған Қашаған кен орны қарқын алып келеді. 

Теңіз бен Қарашығанақтың да мұнай қоры өсіп жатыр. Соларды сыртқы нарыққа шығаратын басты құбыр жүйесі ол – Каспий құбыр консорциумы. Экспортталатын қара алтынның үштен екісі осы құбырмен жөнелтіледі. Биыл консорциум мүмкіндігі 67 миллион тоннаға дейін жетеді.

Каспий құбыр консорциумының жылдық тасымалдау қуаты алғашында 28 миллион тонна болса, қазір 52-ден көп.  2011 жылы басталған кеңейту жобасы Қазақстан жағында толықтай мәресiне жетті. Биыл құбырдың бойымен 15 мұнай айдау станциясы барлығы iске қосылып, жалпы өткізу қуаты 67 миллион тонна болады.

Мұнай айдау стансасы заманауи технологиямен жарақтандырылған. Кешен дербес электр қондырғысы және зертханалардан тұрады. Автоматтандырылған жүйе құбырдағы мұнай сапасын бақылауға мүмкіндік береді.

Николай Горбань, КҚК бас директоры:

-Мұнайын біздің құбырмен тасымалдайтын компанияларға қойылатын талап мұнай сапасы жоғары болуы тиіс. Егер артық қоспалары көп болса, тауарының сапасы жоғары болған компанияға компенсациясын өтейді. Бұл сапа банкі арқылы есептеледі.

Кеңейту жобасының құны – 5,4 млрд доллар. Инвестицияны консорциумның акционерлері құйған. Осы жобаның арқасында Атырау өңірінде әлеуметтік жобаларға бөлінген қаражат көлемі де артты. Алғашқы күннен бастап 7,8 млн теңге жұмсалды.

Нұрлан Ноғаев, Атырау облысының әкімі:

-Республика бюджетіне консорциумнан 2016 жылы 21,15 млрд теңге түссе, биыл бұл көрсеткіш 25 млрд шамасында болмақ.

Авторлары: Арыстанбек Кенже, Темірлан Сұлтанғазиев, Амантай Мәтенов

Қазақстан және әлем жаңалықтары

Календарь

Әлеуметтік желілер

  1. TW
  2. FB
  3. BK

Приложение Хабар для iOS Приложение Хабар для Андроид

Хабар 24 Телеканал Kazakh TV  Телеканал ЕЛАРНА

яндекс.ћетрика

 Тумар EXPO 2017 Акорда Электронное правительство Казахстана

© 2017 «Хабар» агенттігі. Барлық құқықтары қорғалған.