Жаңалықтар

Астананың 20 жылдығына орай жыл бойы 630 шара өткізілмек

    Сейсенбі, 03 Шілде 2018 19:31

Биыл елордамыз мәдени шаралардың халықаралық орталығына айналды. Мерекелік мәзір өте мазмұнды.

Қала тұрғындары мен қонақтары әлемнің үздік шығармашылық ұжымдары мен отандық өнерпаздар қатысатын түрлі концерт, шоуларды тамашалай алады.

Әлемге танымал поляк суретшісі Ришард Дудектың Астанаға алғаш келуі. Қылқалам шеберін ерекше тамсандырғаны – бас қаланың сәулеті. «Көркіне көз тоймайтын әсем шаһардың тұрғындары да ерекше мейірімді әрі сұлу екен», – дейді ол.

Ришард Дудек, суретші:

-Астана – керемет қала. Мен әлемнің көптеген елдерінде болдым. Алайда мұндай әсерге бөлеп, шығармашылық тұрғыдан шабыттандыратын жерлер кемде-кем. Жергілікті халық пен қаланың сұлулығын төл туындыларым арқылы жеткізуге тырыстым.

15 маусымда басталған Артфорумға Польша, Словакия, Сербия, Украина, Ресей, Грузия және Қырғызстан суретшілері қатысты. Әрқайсысы екі туындысын елордаға арнап, Астанаға тарту етті. Картиналары Бейбітшілік пен келісім сарайында өткен көрмеге қойылып, көпшілік назарына ұсынылды.

Елена Ралина, Қазақстан Суретшілер одағының мүшесі:

-Әрбір суретшінің өзіндік мәнері, төл стилі бар. Қалаға саяхат жасаған қылқалам шеберлерінің туындылары әрқилы. Шара аясында арнайы каталог жасалып, онда тек суретшілердің картиналары ғана емес, олардың Қазақстан және Астана туралы ойлары жарияланады.

Сондай-ақ жуырда «Астана Опера» және Қытай опера театрларының бірлесіп сахналаған «Тұрандот» опера­сының тұсауы кесілді. Қазақстандық шығармашылық ұжым қойылымға қазақы реңк беруге тырысқан. Мазмұны мен көркемдігі, сомдалуы тең түскен туынды көрерменнің жадында жатталып қалары анық. ІІ дүниежүзілік театр фестивалінде 13 мемлекеттен келген 17 театр ұжымы ұзын саны 18 қойылымды сахналады. Бұл шығыс пен батыстың өркениетін тоғыстырған бірегей шара.

Давид Асатиани, театр сыншысы:

-Фестиваль жоғары деңгейде өтті. Күнде жаңа бір әлемді ашып отырдым. Сіздердің салт-дәстүрлеріңіз бен мәдениеттеріңіз ұнады. Сондай-ақ ұлттық театрларыңыздың қойылымдары көңілімнен шықты. Өйткені олар жаныма жақын. Мұнда Арестотель үрдісі сақталған. Ал бұл – классикалық театр.

Өнерсүйер қауым үшін тағы бір маңызды жаңалық. Берлин, Венеция, Канн кинофестивальдері мен «Оскар» сыйлығының иегері Жюльет Бинош ІІ дүниежүзілік театр фестивалінің жабылу салтанатына арнайы шақырылған. Әйгілі актриса моноспектакльде атақты француз әншісі Барбараның өмірінен сыр шертетін бірнеше туындыны орындады.

Еламан Төлепберген, «Қазақконцерт» МКҰ баспасөз хатшысы:

-Бұл – үлкен театр мерекесі. Жас әртістер үшін бұл таптырмас мүмкіндік. Себебі шетелдің белгілі театрлары отандық театрлармен бірлесе жұмыс жасауы – үлкен тәжірибе.

Елорданың мерейтойына орайластырылған мәдени шаралар мұнымен шектелмейді. Жексенбіде ІІ Халықаралық қуыршақ театрларының фестивалі басталды. Бүгін «Серпер» халық аспаптар оркестрлері фестивалінің тұсаукесері. Ал «Астана самалының» ашылу салтанаты 4-ші шілдеге жоспарланған. Бас қалада күнде думан, күнде той. Астананың 20 жылдығына орай елордада жыл бойы 630 шара өткізілмек.

Авторлары: Гүлмайра Қуатбайқызы, Бекболат Базаров

Астанадағы Байқоңыр ауданында ғарышкерлер саябағы салынады

    Бейсенбі, 28 Маусым 2018 19:12

Астана енді орталық аумағын ғана көркейтпей, тұтас түлеуге, толық түрленуге ден қойды. Есілдің бойына қоныс тепкен еңселі елордамыз, өзінің 20 жылдық мерейтойы қарсаңында өрісін кеңейтіп, төртінші ауданмен толықты.

Бірлік Берікұлы, тілші:

- Мәселен, мына тұрғын үйдің кіреберісіне су жаңа домофон орнатылған. «Ерекшелігі не?» дейсіз ғой. Ол күні-түні кім келіп-кеткенін камерадан бақылай аласыз. Яғни смартфонға орнатылған арнайы бағдарлама арқылы кілтіңізді ұмытып, үйге кіре алмай жүрсеңіз, смартфон арқылы есігіңізді аша аласыз.

Байқоңыр Астананың көне әрі жаңа ауданы болып есептеледі. Тұрғын үйлердің көбі 70-80-ші жылдары салынғанымен, ауданның өзі бірнеше ай бұрын ғана құрылған. Биыл аудандағы 73 аула мен 38 көше ретке келтіріледі.

Ерлан Каналимов, Байқоңыр ауданының әкімі:

- Біз ауданға қатысты барлық мәселені реттеудеміз. Осы жолы 73 алаңның жөндеу жұмыстарын аяқтаймыз. Он екісінде жұмыс жүріп жатыр. Ал он бірі қала күніне дейін аяқталады.

Аудан көшелерінің біріндегі шлагбаумдар мен шамдарға «ақылды жүйе» енгізіледі. Барлығы 30 инновациялық жобаны жүзеге асыру жоспарланған. Ол инвесторлар есебінен қаржыландырылмақ. Қазір 52 тұрғын үйге заманауи жабдықтар орнатылған.

Дина Шаркеева, Байқоңыр ауданының тұрғыны:

- Өте қатты ұнайды, барлығы ыңғайлы. Алыс қашықтықтан тұрып есік аша аламын. Барлығын ұялы телефон арқылы басқаруға болады. Мұндай жүйе бұл заманда өте маңызды.

Әлия Тойбаева, Байқоңыр ауданының тұрғыны:

- Біз бүгін суық және ыстық суға есептегіш құрал мен модемдер орнаттық. Барлығы онлайн жүйеде. Енді бізге электр энергиясын бақылайтын қондырғы орнатамыз деп айтты. Бұл өте маңызды.

2022 жылға дейін ауданда 4 мектеп пен 2 отбасылық дәрігерлік амбулатория және 30 заманауи аялдама салынады. Одан бөлек, Байқоңыр ауданының аты затына сай болсын деп, ғарышкерлер саябағы және обсерваториясы бар мектеп салу қарастырылған.

Авторлары: Бірлік Берікұлы, Айбын Құсанбеков, Болатбек Табалдиев

Астананың 20 жылдығына арналған «Денсаулық эстафетасы» басталды

    Сәрсенбі, 27 Маусым 2018 19:18

Жылжылмалы медициналық орталықта дәрігерлер тұрғындардың денсаулығын тексерді. Аудан орталығында шатырын жайған кешенде қанның құрамы, қант деңгейі, қан қысымы тексерілді. Сондай-ақ тұрғындар флюорография және УЗИ құрылғыларымен тексеріліп, оларға хирург, терапевт, офтальмолог, гинеколог мамандар тегін кеңес берді.

«Денсаулық эстафетасын» еліміздің Денсаулық сақтау министрлігі мен Алматы облысының әкімшілігі бірлесіп өткізіп отыр. Мақсат – аудан-ауылдарды аралап, салауатты өмір салтын насихаттау.

Эстафета аясында дәрігерлер флешмоб өткізіп, аудан әртістері өнер көрсетті. Қарасай ауданынан қабылдап алған ақ туды бүгін Іле ауданы одан әрі Балқаш ауданына тапсырды. Шара облыстың үш ауданында бір уақытта басталды. Астана күніне дейін жалғасады.

Ләзиза Сүлейменова, Алматы облысы, Іле аудандық ауруханасы директорының орынбасары:

- Бұл жылжымалы медициналық кешен әр ауылды аралап шығып, 20 күнде жалпы халықтың санына қарай ауылдарда акция жүргізіліп, скрининг бойынша адамдарды қарап шығамыз.

Астананың 20 жылдығына орай «Global Silk Road» форумы өтеді

    Сейсенбі, 26 Маусым 2018 19:04

Гонконгтік компания ойлап шығарып, кейін Сауд Арабиясының азаматтығын алған жасанды интеллекті бар «София» атты робот Қазақстанға келеді.

Астананың 20 жылдығына орай өтетін «Global Silk Road» форумында «Жібек жолын» цифрландыру, экономикалық теңсіздікті төмендету, халықаралық сауда, криптовалюта сынды бірқатар маңызды мәселе талқыланбақ. «Жібек жолы» елдері қалаларының мэрлері қатысатын шарада мэрлер клубы құрылып, тиімді экономикалық келісімдерге қол қою жоспарланған. 2-3 шілде күндері өтетін форумға әлемнің 52 елінен 2 300-ге жуық сарапшы қатысуға ниет білдіріп отыр.