17:00 Әрі қарай эфирде: ҚР Әнұраны
+7 (7172) 757 540
astananews@khabar.kz

АҚШ-тағы түрлі сала өкілдері Астананың 20 жылдық мерейтойымен құттықтады

    Сейсенбі, 26 Маусым 2018 09:25

АҚШ-тағы түрлі сала өкілдері қазақ елін елордамыздың 20 жылдық мерейтойымен құттықтап жатыр. Олардың ішінде екі ел арасындағы қарым-қатынастарды нығайтуға зор үлестерін қосқан мәдениет қайраткерлері бар.

Джон Эгамо, Нью-Йорктегі Ұлттық өнер клубының президенті:

- Мен сіздерді Қазақстанның елордасы Астананың 20 жылдығымен құттықтағым келеді. Нью-Йорк Ұлттық өнер клубы үшін бұл – өте үлкен шара, осы мейрамды сіздермен бірге атап өтпекпіз. Сол себепті Әбілхан Қастеев атындағы өнер мұражайының көрмесін ұйымдастырып, туындыларын зор мақтанышпен жұртқа көрсетіп отырмыз. Бұл Қазақстан мен АҚШ-ты жалғаған тағы бір көпір болды.

Лауренс Мосс, америкалық композитор:

- Қазақстан астанасын 20 жылдық мерейтойымен құттықтаймын! Әртістеріңіз бен музыканттарыңызға таңғаламын және астаналық шеберлердің өнеріне әрдайым сүйсініп жүремін.

Михаэль Колеман, пианист:

- Қазақстанды өте жақсы көремін. «Екінші отаным» деп те атаймын. Астанаға барғанда, уақытым керемет өтеді, музыкалық тәжірибе жинап келемін. Барша қазақстандықты Астананың 20 жылдығымен құттықтаймын! Елдеріңіз ертегідегідей тамаша. Қайта баруды армандап жүрмін.

Астана еліміздің туристік орталығына айналып келеді

    Сейсенбі, 26 Маусым 2018 08:22

Бүгінде Астана еліміздің туристік орталығына айналуда. Әсем қаланы тамашалауға былтыр өткен EXPO көрмесі аясында 3,5 млн-нан астам адам келген. Бұл – небәрі үш айдың көрсеткіші. Елорданың 20 жылдық мерейтойына орай келушілердің қатары биыл да артады деп күтіледі. Шаһардың көрікті жерлерін қызықтайтын шетелдіктердің дені Қытай, Ресей, Германия, Ұлыбритания және Корея елдерінен келеді.

Жанар Әлиакбарова, Шымкент қаласының тұрғыны:

- Біздің Астанаға келгенімізге бір апта болды. Астананың барлық жерін, яғни «Ханшатыр», «Бәйтерек», «Думан» ойын-сауық орталығын көрдік. Балаларымызбен өте жақсы әсер алдық.

Геннадий Кравчук, турист /Израиль/:

- Мен бұл қалада соңғы рет 37 жыл бұрын болған екенмін. Астана – шынымен әсем шаһар. Зәулім-зәулім ғимараттар. Мұның барлығы «Бәйтеректен» анық көрінеді.

Назерке Шапшадинова, Қызылорда облысының тұрғыны:

- Мен Астана қаласына алғаш рет келіп тұрмын. Астананың әдемі жерлерінің барлығын аралап көрдім.

Астанада 2019 жылдың соңына дейін Есіл өзені арқылы өтетін жаңа көпір салынады

    Дүйсенбі, 25 Маусым 2018 19:20

2019 жылдың соңына дейін елордада Есіл өзені арқылы өтетін жаңа көпір салынады. Жалпы қаланың бас жоспарына сәйкес 2030 жылға қарай Астанада барлығы 30 көпір салу жоспарлануда. Соның бірі – қазір құрылысы қызу жүріп жатқан Самал ауданы мен Амфитеатрды байланыстыратын жаяу жүргіншілер көпірі.

Бірлік Берікұлы, тілші:

- Ағысы жылдам, қарқыны күшті, қоршаған ортаға қуат берген тіршілік нәрі секілді Елорда да қарқынды дамып, айналасына дем беріп келеді. Жалпы Астана Еуропа мен Азияны жалғайтын көрікті көпірге айналып үлгерді. Айтпақшы «көпір» демекші, елордадағы әрбір көпір көздің жауын алады.

Алғаш болып Есіл өзенінде «Тұлпар» көпірі салынды. Ізін ала қос жағалауды байланыстыратын бірнеше көпір бой көтерді. Оның ішінде автокөлік және жаяу жүргіншілер көпірі де бар. Ал мына көпір жаяу адам мен велосипедшіге арналған.

Бірлік Берікұлы, тілші:

- Жаңа көпірдің табалдырығын Астана қаласының тұрғыны ретінде мен бірінші болып аттайын деп тұрмын. Әрине, қуаныштымын! Айтып өтерлігі, сырттан қараған кезде көпірдің көрінісі мүлдем басқаша. Ал ішіндегі көрініс өзгеше. Құрылысшылардың айтуынша, жұмыс аяқталуға шақ қалды. Сондықтан төніп тұрған қауіп жоқ. Ендеше жақын барып құрылыс жұмысы қалай жүріп жатқандығын көрейік.

Құрылыс қызу жүріп жатыр. Аяқталуға аз қалды. Көркемдігі көз тартар көпірдің ерекшелігі де бар. Мәселен, мұнда 3 мыңнан асатын темір жапырақтар орнатылған. Көлемдері бір-біріне мүлдем ұқсамайды.

Серік Төлебаев, құрылыс компаниясының дирекция басшысы:

- Бір жағында 3 метрден аса велосипедпен жүретін, бір жағында 7 метр, ортасында 15 метр жаяу жүретін көпір болып есептеледі. Бұл – Атырау облысының Астанаға беріп отырған сыйлық. Өте күрделі көпірлердің бірі болып есептеледі. Мұндай көпір Қазақстанда жоқ.

Иә, әдемілігі бір бөлек. Ал салмағы 2 500 тоннаны құрайтын мына көпірді су астына қалай орнатқандығын біреу білсе, бірі білмес.

Серік Төлебаев, құрылыс компаниясының басқарма директоры:

- Мұның технологиясы өте күрделі болып есептеледі. Судың ағысын тоқтатпас үшін әуелі дамбы салынып, ортасына турба қойылады. Сол дамбының үстіне қорғандары көтеріліп, осындай көпірдің мүсіні шығады.

Сұлу сұлбасы түзілген көпірге көпшілік тамсана қарап жүр. Құрылысы аяқталса, аяңдауды асыға күтеді. Тіпті алыстан арнайы атшаптырып келгендер де бар.

Блиц:

- Бұл көпір әдемі ғой. Әрі-бері өткенде марқайып өтесің.

- Соны көру үшін сонау Ақтау қаласынан келіп тұрмыз Астанаға.

- Шырайлы Шымкент қаласынан Астананың 20 жылдығына қонақ болып келіп отырмыз. Астана 3-4 жыл бұрын мұндай емес еді. Қазір өте әдемі, көркейіп жатыр. Елімізге тыныш болсын! Елорданың көркемдеп жатқанын көре берейік.

- Жақсы, әсіресе балаларға велосипед тебуге ыңғайлы. Үйдің жанында, үнемі серуендеуге осында келеміз енді.

Бұл көпірді Атырау облысы Астана қаласының 20 жылдығына арнайы тарту етті. Сондықтан болар, көпірдің сыртқы пішіні Атыраудың символын айшықтайтын балыққа ұқсайды.

Авторлары: Бірлік Берікұлы, Аманжол Байғазин

Астана 20 жылда экономикалық өсімнің үлгісіне айналды

    Сәрсенбі, 20 Маусым 2018 19:10

Астана 20 жылда Қазақстанның елордасы ғана емес, экономикалық өсімнің үлгісіне айналды. Қолынан іс келетін кәсіпкерлер мен берекелі бизнесмендер Астанаға жиналып, жаңа жұмыс орындарын ашты. Есесіне салықтан түскен табыс елорда мен елдің дамуына септігін тигізді. 20 жылда салық түсімі 70 есе артып, былтыр қаланың қоржынына 1 трлн теңге түскен.

Сіз жылына қанша жұп шұлық сатып аласыз? Бізге күнделікті білінбегенмен, дәл осы шұлық өндірісі пайданың шын көзі екенімен келіспеске болмайды. Енді келесі сұрақ. Сіз киіп жүрген шұлық қай жақта өндірілген? Қытай, Қырғыз әлде Ресей ме? Мамандар: «Отандық шұлық өндірісін шұғыл ширату қажет», – дейді.

Динара Ибраева, кәсіпорынның өндірістік директоры:

- Бізге шұлықтардың 80-90%-ы шет елден келеді. Ал олардың құрамын сараптағанда, тек 20 пайызы мақта өнімі, қалғаны синтетика екенін анықтадық. Бұл – тұтынушыны алдау. Біз 2017 жылы қазақстандық табиғи шұлық шығаруды қолға алдық.

Бұл – Қазақстанда шығарылған шұлықтар. Табиғи таза материалдан тоқылады. Астанадағы кәсіпорын жылына 1,8 млн жұп шұлық шығарып, осылайша импортты ығыстырмақ. 2010 жылдан бері әскери киім мен жабдықтар тігетін кәсіпорын енді халыққа қажет отандық тауарлардың түрін көбейтуге кіріскен. Кәсіпорын қаланың қоржынына былтыр 31 млн теңге салық төлепті. Астанамен бірге өсіп келетін өндірісте 62 адам жұмыс істейді.

Хайрниса Әбдіразақова, тігінші:

- Өрт сөндірушілердің костюмін тігіп отырмыз. Жалақысын уақытында беріп тұрады, былай ауыр деуге болады. Бірақ кәсібімізге үйреніп қалдық.

Астана – тек мемлекеттік қызметкерлердің ғана емес, кәсіпкерлердің де ордасы. Екі онжылдықта иен дала бизнес мегаполиске айналды. Қазір елордада 100 мыңнан аса шағын және орта кәсіп иесі тіркелген. Ал 1997 жылы небәрі 4,5 мың болғанын ескерсек, нәтижесі таңдай қақтырады. 2017 жылы Астанада салық түсімі 1 трлн теңгеге жетті, үштен бірі – осы бизнестің үлесі. Сол 1 трлн теңгенің 78%-ы республикалық бюджетке бағытталды. Яғни салықтан түскен табыс елорданың да, елдің де пайдасына жаратылуда.

Қанат Әділбаев, Астана қаласы мемлекеттік кірістер департаменті басшысының орынбасары:

- Егер қалалық бюджетке былтыр 240 млрд теңге салық түскен болса, соның 57,4-і – тек қана шағын және орта бизнестен түсіп отырған салық көлемі. Қазірдің өзінде шағын және орта бизнеске Елбасының тапсырмасымен әртүрлі жеңілдіктер қарастырылуда. Биылдан бастап жаңа салық кодексі күшіне енді. Кәсіпкерлердің ставкасы былтыр 2 пайыздан 1 пайызға төмендеді, әлеуметтік салықтардың 9,5%-11% болып отыр.

Астана – кәсіпкерлік үшін қолайлы қала. Тәуекелге барсаң, мыңдаған мүмкіндік ашылады. Қала билігі де «бизнес бастаймын» дегендерді қолдауға әзір.

Рыскүл Қауғабаева, Астана қ. инвестиция және кәсіпкерлікті дамыту басқармасы басшысының орынбасары:

- Былтырдан бері кәсіпкерлікті енді қолға алғандар үшін жаппай кәсіпкерлік және нәтижелі жұмыспен қамту бағдарламасы іске қосылды. Берілетін қарыз көлемі 18 млн теңге, кәсіпкерліктің түрі мен жас мөлшеріне шектеу жоқ. Астананың 20 жылдығына біз жақсы көрсеткіштермен жеттік. Елорда кәсіпкерлік үшін ең қолайлы қалаға айналып келеді.

Елорда магнит секілді. Инвестиция үшін тартымды орталыққа айналды. Былтыр елордаға тартылған инвестиция көлемі 945 млрд теңгеге жеткен, оның 200 млрд теңгесі тікелей шетелдік инвестициялар.

Алп Малазгирт, инвестор /түркия/: 

- Елде инвесторларға үлкен жеңілдіктер жасалған. Біздің холдинг Қазақстанда 2014 жылдан бері жұмыс істейді. Осы уақытта мыңдаған жұмыс орнын аштық, салықты үзбей төлейміз. Сенімге негізделген ортада жұмыс істеуге де ынта болады.

20 жылда Астана миллионнан астам тұрғыны бар мегаполиске айналды. Енді елорда 2050 жылға дейін әлемнің үздік 10 қаласының бірі атанбақ. Оған жетудің бір ғана жолы – еңбек. Адамның еңбегі пен мемлекеттің ұмтылысы ұштасқанда, ұлы міндеттер оңай орындалмақ.

Авторлары: Гүлжан Марқабаева, Ерсін Мұхаметалин, Есбол Жамшитов