Елбасы Жолдауында айқындалған мақсаттар еліміздің терезесін озық елдермен теңестіреді

    Сәрсенбі, 31 Қаңтар 2018 19:36

Қазақстан ішкі саяси бастамалары арқылы ТМД елдері арасында көшбасшы екенін дәлелдеп келеді.

Сондай-ақ инвестициялық, қаржылық бағыт пен білім беру саласында өзгеге үлгі бола алады. Бұл ресейлік сарапшылардың пікірі. Мәскеуде «Қазақстандық бағытта жаңғыру: 2018 жылдың басымдықтары» тақырыбында жиын өтті. Онда ғалымдар, саясаткерлер мен сарапшылар Елбасының биылғы Жолдауын талқылады. Қатысушылар маңызды құжатта айтылған адами капиталды дамыту бағытын айрықша атап өтті.

«Жолдауда айқындалған мақсат Қазақстанның бәсекеге қабілеттілігін арттырып, озық елдермен терезесін  теңестіреді», - дейді сарапшылар. 

Георгий Петров, РФ Сауда-өнеркәсіп палатасы президентінің кеңесшісі:

-Қазақстан экономикалық тұрғыда қарыштап дамып келеді. Келешекке нақты жоспары жасалды. Ал оны жүзеге асыруға Жолдау темірқазық болмақ. Мұндай қарқынмен өркендеген елдеріңіз әлемнің озық отыз мемлекетімен теңесе алады. 

Андрей Казанцев, Орталық Азия және Ауғанстан мәселесі бойынша зерттеу орталығының директоры:

-Нұрсұлтан Назарбаевтың адами капиталды дамыту қажет дегені халықтың жағдайына айрықша басымдық бергені деп білемін. Мәселен, бүгінде Қазақстанда білім беру саласын жаңғырту үшін реформалар жасалып жатыр. Үш тұғырлы тіл саясатына да ерекше ден қойылған. Бұл өз кезегінде жастарды бәсекеге қабілетті етеді. Ал жас буын зияткер болса елдің келешегі кемел деген сөз.

Үкіметте Әлеуметтік-еңбек қатынастарын реттеу мәселелері бойынша бас келісімге қол қойылды

    Сәрсенбі, 31 Қаңтар 2018 19:05

Үкімет үйінде әлеуметтік әріптестік және еңбек қатынастарын реттеу бойынша республикалық үш жақты комиссияның отырысы өтті.

Басқосуда мемлекетіміздің әлеуметтік-еңбек саясатының маңызды бағыттары бағдарланып, азаматтардың жұмыс істеуіне лайықты жағдай жасау мәселелері көтерілді. Елбасының «Төртінші өнеркәсіптік революция жағдайында жаңа мүмкіндіктер қарастыру» тапсырмасы басты назарға алынды. Талқыны түйіндеген тараптар 2020 жылға дейінгі еңбек қатынастарының басым бағыттарын реттейтін бас келісімге қол қойды. Құжатты Үкімет, республикалық жұмыс берушілер және жұмысшылар бірлестіктері жұмыла жүзеге асыратын болады. Осыған орай ортақ  міндетемелерді орындау жөніндегі іс-шаралар жоспары қоса бекітілді. 

Тамара Дүйсенова, ҚР Еңбек және халықты әлеуметтік қорғау министрі:

-Онда негізгі 7 құрамнан белгіленген тарауларды белгіледік. Олардың барлығы Елбасының 3-модернизациядан келіп шығатын тапсырмаларына байланысты келісілген. Ең негізгі мәселе ол жаңа технологияларлы ендіру, экономикадағы цифровизация мәселелері, осы цифровизацияға қажетті мамандар даярлау мәселесі, мамандардың жалпы сапасы, соынмен бірге азаматтарды жұмыспен қамту мәселелері негізінде қамтылды.

Бақытжан Әбдірайым, ҚР Кәсіподақтар федерациясының төрағасы:

-Біз мына адами капиталды дамыту жөнінде ерекше көңіл бөліп жатқанымыз біз оларды дамытпай, оларды жаңа кәсіптерге үйретпей, жаңа компетенция бермей жаңа бағытқа жаңа белестерге шыға алмаймыз. 

Абылай Мырзахметов, «Атамекен» ҰКП басқарма төрағасы:

-Үкімет тарапынан кәсіпкерлерге қазір жасалып жатқан саясат одан ары қарай жалғастыра беру керек. Яғни бизнес климатты ары қарай нысандандыру, бизнеске қоғамда жақсы жағдай жасау, заң жағынан болсын, үкіметтік бағдарламалар болсын, салық саласы бар. Үлкен қоян-қолтық жұмыс жасалып жатыр, осы жұмыстарды қарқынды жүргізу деген әрқайсымыз мойнымызға міндеттеме алып отырмыз.

Жаңа технологияларды енгізуді іске асыру барысын арнайы комиссия бақылайды

    Сәрсенбі, 31 Қаңтар 2018 18:16

Елдегі барлық салалар сандық форматқа енгізіледі.

Жаңа технологияларды бейімдеу мен таңдау жөніндегі ұсыныстарды және оның жүзеге асырылу барысын Президенттің жанындағы арнайы комиссия бақылап отыратын болады. Оның құрамына Үкімет басшысы, Ұлттық қауіпсіздік комитетінің төрағасы, Бас прокурор мен елдегі барлық министрліктердің жетекшілері енгізілді. Ал 2 ақпанда Алматыда цифрландыруға арналған халықаралық форум өтеді. Оған Еуразиялық экономикалық одаққа мүше елдердің үкімет басшылары қатысады.

Елбасының жаһандық қауіпсіздікке қосқан үлесі, ядролық қарудан бас тарту, халықаралық қақтығыстарға тосқауыл қою жайлы бастамасын жоғары бағалаймыз. Алматыда өткен халықаралық конференцияда шетел мамандары осылай деді. Келер ұрпақты жаппай қырып, жоятын қарудан сақтау – БҰҰ басты мақсатының бірі. Бұл мәселенің маңызын Елбасы Қауіпсіздік кеңесінің отырысында баяндаған. Сарапшылар «Әлем. ХХІ ғасыр» манифесінің маңызына да тоқталды. Конференцияға оннан аса елдің және БҰҰ-ның өкілдері қатысты.

Властимил Самек, БҰҰ хатшылығының қоғамды ақпараттандыру департаментінің өкілі:

-Біз мұнда өте маңызды мәселенің қозғалғанын көріп отырмыз. Нәтижесінде Қазақстанның халықаралық саясаттағы беделі арта түсті. Жаппай қырып, жоятын қарусыз әлем қалыптастырудың алғашқы қадамдары сәтті жасалды деп ойлаймын.

Елімізде мемлекеттік әлеуметтік тапсырыстардың іске асуын қадағалау күшейеді

    Сәрсенбі, 31 Қаңтар 2018 17:50

Мемлекеттік әлеуметтік тапсырыстардың іске асуын қадағалау күшейеді. Ал оның орындалуын бағалауға халық та қатысатын болады.

Мәжіліс депутаттары коммерциялық емес ұйымдардың қызметі туралы заң жобасын бірінші оқылымда мақұлдады. Құжатқа «бағалау» деген жаңа түсінік енді. Дін істері және азаматтық қоғам министрі Нұрлан Ермекбаев «әр әлеуметтік жоба ақшаны игеру үшін ғана емес, әлеуметтік проблеманы шешу үшін жұмыс істеуі тиіс» деді. Ол әлеуметтік жобаның тиімділігін бағалайтын бірнеше белгіні атады. Егер әлеуметтік жоба өз-өзін ақтамаса – үкіметтік емес ұйым да, тапсырыс беруші де конкурстардан шеттетіледі. Бүгінде елде 19 мыңға жуық үкіметтік емес ұйым тіркеліп, бұл секторға 29 мыңнан астам қазақстандық тартылған.

Кәрібай Мұсырман, ҚР Парламенті Мәжілісінің депутаты:

-Үлкен қалалардағы осындай ұйымдардың деңгейі мен ауылдық жердегі үкіметтік емес ұйымдардың деңгейі арасында едәуір айырмашылық бар екені белгілі. Соған байланысты ауылдағы ҮЕҰ грантты да, әлеуметтік мемлекеттік тапсырысты да тиісті конкурстарда жеңіп ала алмай жатады. Бірақ олар да дамуы тиісті. Осыған орай менің сұрағым бар. Заң жобасында стандарттар ауылдағы ұйымдардың жұмысына қалай әсер ететін болады?

Нұрлан Ермекбаев, ҚР Дін істері және азаматтық қоғам министрі:

-Ауылдағы ҮЕҰ дамыту үшін негізгі ықпал ететін норма ол стандарт емес, жергілікті атқару органдарға грант тағайындау туралы құзыретті беру керек. Осы норма ықпал ететін болады. Стандарттарға келетін болсақ, мемлекеттік әлеуметтік тапсырыс берудің ережелерін бекітеді.