08:30 Әрі қарай эфирде: «Сүйікті әндер»
+7 (7172) 757 540
astananews@khabar.kz

«Астана – ұлы даланың інжу-маржаны» көшпелі фотокөрмесі Ресейдің Астрахан қаласына жетті

    Дүйсенбі, 25 Маусым 2018 19:21

«Астана – ұлы даланың інжу-маржаны» атты көшпелі фотокөрме Ресейдің Астрахан қаласына жетті. Еуразияның кіндік қаласына айналған ару шаһар жайлы фотошежіре ресейліктер тарапынан үлкен қызығушылыққа ие болды.

Арыстанбек Кенже, тілші:

- Фотокөрмемен астрахандықтар облыстық тарихи өлкетану музейінде танысуда. 1838 жылы іргетасы қаланған бұл ғимарат көне Астрахандағы ең көне тарихи жәдігерлердің қатарына жатады.

Астанамыздың алтын тәжі сынды айбарлы Ақорда  қайталанбас сәулеттік шешімі жөнінен жер жүзіне танымал. Орталық Азияда баламасы жоқ ғимарат – «Ханшатыр», ел тәуелсіздігінің шынайы бейнесіне айналған – «Бәйтерек» пен әлемдегі ынтымақ пен татулықтың тал бесігіндей – «Келісім» сарайы. Фотокөрмедегі әр сурет жас қаланың қарышты қадамы мен сәулет өнерінің қайталанбас үлгілерін көпшілікке паш етті.

Елена Забирник, Астрахан қаласының тұрғыны:

- Сөз жоқ керемет! Әр ғимарат сәулеттік жаңа шешім жөнінен бір-бірін толықтырып тұрғандай әсер қалдырады екен. Маған «Ханшатырдың» кескіні ұнады. Жолым түссе, міндетті түрде барып тамашалайтын боламын.

Бұл көрме Тұңғыш Президент қоры мен Қазақстанның Астрахандағы консулдығының қолдауымен өтіп жатыр. «Мақсат – елорданың мерейін көтеріп, Қазақстанның аз жылда қол жеткізген жетістіктерін алыс-жақын шетелдерге таныстыру», – дейді шараны ұйымдастырушылар.

Әлия Қайшарова, ҚР Тұңғыш Президенті-Елбасы қорының атқарушы директорының кеңесшісі:

- Біздің Астанамыздың жарқырап тұрғанын әлем біледі. Астанамыздың осындай дәрежеге жеткенін көріп, таңғалады.

Астананың 20 жылдығына арналған көшпелі фотокөрмені тамашалауға астрахандықтар көп келді. Салтанатты шараны ашқан Астрахан губерниясының басшылығы қазақстандықтарды Астананың 20 жылдық мерейтойымен құттықтады.

Александр Жилкин, Астрахан облысының губернаторы:

- Астана Еуразияның кіндік қаласына айналды. Президент Нұрсұлтан Әбішұлының төл перзенті саналатын елорда – заманауи технология мен жүйрік ойдың жемісі. Әсіресе қаланың кіре берісіндегі «Астрахан» ауданы көңілімізге жылылық пен мақтаныш ұялатады. Ол біздің Қазақстанмен арадағы тағы бір алтын көпірі іспетті.

Астрахан облысында 150 мыңнан астам қандасымыз тұрады. Еліміздің батыс шекарасында үш облыспен шектесіп жатқан аймақ Қазақстанмен тарихи-мәдени және экономикалық қатынасты нығайтты. Демек, елорда мерейтойына астрахандықтардың бей-жай қарамауы заңды. Оған көрме кезінде көз жеткіздік. Бұған дейін Санкт-Петербор мен Мәскеуде өткен көшпелі көрме Астраханда екі апта аялдап, Қазан қаласына бет алады.

Авторлары: Арыстанбек Кенже, Амантай Мәтенов, Жандос Рахметуллин

Астанада «Елдің төрі – елорда» құжаттық көрмесі ашылды

    Дүйсенбі, 18 Маусым 2018 12:40

Елорданың 20 жылдығына орай «Елдің төрі – елорда» атты көрме ашылды. Мұнда тарихи маңызға ие негізгі 100-ге жуық мемлекеттік құжатпен танысуға болады. Сонымен қатар көрмеде «Астана балалар көзімен» жобасы аясында жас суретшілердің туындылары да қойылған.

Жангелді Махашов, ҚР Ұлттық мұрағатының бас директоры:

- Қысқа уақытта, яғни осы 20 жылдың ішінде өздеріңіз көріп отырғандай, Астана үлкен дәрежеге жетті. Бұл әрине, бізді қуантады. Астананы бүкіл ел біледі. Астанада осындай үлкен іс-шаралар өтіп жатыр. Бас қаламыз арқылы бізді, Қазақстанды бүкіл дүние жүзі танитын болады.

«Самғау» халықаралық фестиваліне 13 театр қатысып жатыр

    Сәрсенбі, 13 Маусым 2018 19:10

Қазір Астанада елорда мәдениетінің айнасына айналып үлгерген «Самғау» халықаралық театр фестивалі өтіп жатыр. Биыл бұл шара қаламыздың 20 жылдық мерейтойына орайластырылды. Оған Түркия, Грузия, Қырғызстан, Өзбекстан және Башқұртстан елдерінен театр ұжымдары келіп, өнерлерін ортаға салуда.

Театр өнерінде актер сахнада өзін еркін ұстап, ойнаған рөлін дәл сомдаудан бөлек, қимыл-қозғалыс шеберлігі мен ептілік, икемділікті де бағындыруы тиіс. Қазақ ұлттық өнер академиясының оқытушылары Қырғызстан, Өзбекстан, Татарстан елдерінен келген актерларға шеберлік сағаттарын өткізуде.

Қала әкімдігі ұйымдастырған «Самғау» халықаралық театрлар фестиваліне 12 театр ұжымы қатысып отыр.

Мұрат Әбзелбаев, Т.Жүргенов атындағы Қазақ ұлттық өнер академиясының профессоры, оқытушысы:

-Бұл фестивальға «Жастар» театрының актерлары қатысуда. Қазылар алқасы өте жақсы баға берді. Бұларды біз 1-курстан бастап өзіміз тәрбиелегенбіз. Жалпы шыдамдылыққа, кез келген кедергіні жеңе білуге, сахнада қандай қозғалыс болсын, шашылып қалмай қасындағы серіктесіне, тыңдаушыға толық жеткізе білу жолында еңбек етілген.

Жалынбек Ахан, Т.Жүргенов атындағы Қазақ ұлттық өнер академиясының оқытушысы:

-Негізгі беретін пәнім – «Сахна сайысы» деп аталады. Бұл актерларға тікелей қажетті пән. Бұл құлауға, жығылуға, бірін-бірі ұрған кезде мертіктіріп алмауға, кез келген декорациядан секірген кезде дене мүшесіне зақым, зиян келтірмеуге жауап беретін бірден-бір пән.

Фестивальға жиналған шетелдік өнер иелері қазақ театры мектебінің деңгейін жоғары бағалап отыр. Қырғыз ұжымы астаналықтардың назарына «Қорқыт ата» спектаклін ұсынды.

«Самғау» фестивалі осымен 6 жыл ұйымдастырылып отыр. Оған биыл да әдеттегідей тек Астана, Алматы ғана емес, басқа өңірлерден шығармашылық ұжым жиылды. Алыс-жақын шетелдік өнерпаздардың шақырылуы да шараның географиялық ауқымын ғана емес, мән-маңызын, мазмұнын байыта түспек.

Жеңіш Хангелдиев, Қырғыз ұлтты академиялық драма театрының актері:

-Астана шахарының 20 жылдығымен Қазақ елін жалпы құттықтағым келеді. Мейрамдар көп болып тұрсын, шығармашылықтар, игіліктер көп болсын. Игілікті болады деп ойлаймыз.

Апта соңында халықаралық фестиваль жұмысын қорытындылайды. Үздік қойылым, үздік режиссер секілді бірнеше номинация бойынша жеңімпаздар анықталады. Бас жүлдеге қомақты қаржылай сыйлық табысталмақ.

Авторлары: Индира Жылқайдарова, Аманжол Байғазин

Астананың 20 жылдығы қарсаңында балаларға арналған жобалар да іске асырылуда

    Бейсенбі, 07 Маусым 2018 19:02

Астананың 20 жылдық тойы әсіресе балалар үшін ерекше есте қалғалы тұр. Өйткені мәдени-танымдық іс-шаралардың басым бөлігі соларға арналған. Кішкентей көрермендер олардың кейбірін қазірдің өзінде тамашалай алады. Қала күніне орай барлық отбасы мүшелеріне арналған жобалар да іске асырылуда.

Қазір Астанадағы қай театрды алып қарасаңыз да күнделікті балаларға арналған қойылым ұсынуда. Әртістер биылғы мерекеге ерекше дайындық жүргізілгендігін айтады. Спектакльді таңдау өз алдына, ұжымның өнерін шыңдауға да басымдық беріліпті. Қаланың 20 жылдығы аясында олар Қазақстанның өңірлері мен көрші мемлекеттерде гастрольдік сапарда болып қайтыпты. Ал жуырда Астана өзге театрларды қабылдайды.

Еркін Қасенов, М.Горький атындағы Орыс драма театрының директоры:

- Бұл мерекеде біз мәдениетіміздің үлкен шыңын көрсеткіміз келеді. Басқа мемлекеттерден келген өнерді бағалағымыз келеді.  Бұл фестивальге Татарстан, Өзбекстан, Қырғызстан, Ресей, Сербия елдерінен және Қазақстандағы ең мықты театрлар келіп қатыспақшы.

Алматы облысының Астанаға тартуы

Құрылыстың балаларға не қатысы бар дерсіз. Тарқатып айтайық. Бұл техника мен мына жұмысшылар балаларға және барлық отбасы мүшелеріне арналған «Арай» саябағын абаттандыруда. Толықтай жаңа кейіпке енетін демалыс орынының құрылысын Алматы облысы қаржыландырылған. Былайша айтқанда, өңірдің Астанаға тартуы. Құны 3 млрд теңге болатын жұмыс қазір 85 пайызға аяқталған. Мұндағы алаңдар Жетісудың көрікті орындарының көшірмесі ретінде жасалыныпты.

Дәурен Алжасаров, Саябақты абаттандыру жобасының жетекшісі:

- Балаларға арналған және орталық алаңқайлар дайын. Таңбалы тас, Шарын каньоны да дайын. Амфитеатр және «Балқаш көлі» субұрқағы бар.

Ердәулет Байдуллаев, тілші:

- 1 шілдеден бастап бұл саябақ мына суреттегідей көрініске ие болады. Оның ерекшелігі амбебаптығында. Яғни қала қонақтары мен тұрғындарының мұнда қыстың күніде келіп демалуына барлық жағдай қарастырылған.

Авторлары: Ердәулет Байдуллаев, Айдос Меделбеков