ҚАЗАҚСТАННЫҢ ҮШІНШІ ЖАҢҒЫРУЫ: ЖАҺАНДЫҚ БӘСЕКЕГЕ ҚАБІЛЕТТІЛІК

Эдриан Броуди: Киіз үйге бұрыннан қызығамын

Эдриан Броуди: Киіз үйге бұрыннан қызығамын

Елордада XIII Халықаралық «Еуразия» кинофестивалі өтіп жатыр.

Айтулы шараға қатысу үшін әлемге әйгілі актерлер Николас Кейдж, Эдриан Броуди және Ресей, Үндістан, Грузия, Қытай мен Еуропаның танымал актерлері, режиссерлері келді. «Оскар» сыйлығының иегері Эдриан Броуди күн тәртібінің тығыздығына қарамастан, эксклюзивті сұхбат берді.

Эдриан Броуди, актер:

-Кеше оқиғаға толы күн болды. Мәдениет және спорт министрінің шақыртуымен «Астана Операда» Густав Малердің VIII симфониясының тұсаукесерін тамашаладым. Қойылым айрықша әсер етті. Менің соңғы сапарымнан кейін осындай әдемі сахна бой көтерген. Киіз үйде ұлттық тағамдардан дәм таттым. Шындығын айтайын, киіз үйге бұрыннан қызығамын. Мен «Еуразия» кинофестиваліне келгеніме қуаныштымын. Кездескен адамдардың кең пейілділігі ерекше қуантты. Менің шығармашылығыммен таныс адамдардың көптігі, менің жұмыстарымды бағалайтыны таңдандырды. Бұл фестиваль әр елден келген кинематографтармен кездесуге тамаша мүмкіндік береді.

Осымен он үшінші рет шымылдығы түрілген кинофестиваль аясында 300-ге жуық туындының көрсетілімі ұсынылады. Байқаудың негізгі бағдарламасына 101 фильм енген. 14 фильмнің әлемдік премьерасы, 11 туындының азиялық тұсаукесері өтеді. Еліміздің атынан байқауға Сәбит Құрманбектің «Оралман» фильмі ұсынылған. Қазылар алқасына «Канн» кинофестивалінің лауреаты Сулейман Сиссе жетекшілік етуде. Мәдени шара шілденің 28-іне дейін жалғасады.