Мәдениет - "Хабар" телеарнасы
ҚАЗАҚСТАННЫҢ ҮШІНШІ ЖАҢҒЫРУЫ: ЖАҺАНДЫҚ БӘСЕКЕГЕ ҚАБІЛЕТТІЛІК
Сейсенбі, 19 Қыркүйек 2017 09:43

«Рухани жаңғыруымыз түп-тамырға үңіліп, ұлттық болмысымызды айқындайтын салт-дәстүр мен мәдениетіміздің мәйегінде», – дейді алматылық қолөнерші Гүлнар Сейжан.

Ісмерлігі іскерлікке жалғасып, кәсіпкерлікке ұласты. Ұлттық қолөнерді дамытуға атсалысып отырған жанның сырмақтары мен түс киіздеріне сонау жапониялық ғалымдар да қызығушылық танытып, мұхит асып, көзбен көріп, қолмен ұстауға арнайы келген.

Жапониялық мейман Шиеко Хирома Токиоға жақын жердегі Ханатава ауданында тұрады. Өзі қазақ этнографиясын зерттеп жүрген ғалым. 10 жыл бұрын қазақтың ұлттық қолөнерін зерттеуге кірісіп, Моңғолияда 2 жыл тұрған. Тілді де меңгерген. «Қазақтың сырмағы, түс киіздері керемет ою-өрнектерге бай. Бұл сәндік қана емес, терең пәлсапалық мәні бар дүние», – дейді жас ғалым.

Шиеко Хирома, ғалым-этнограф:

– Қошқармүйіз сынды оюлардың көп пайдасы бар. Маған бақытты бол, үйлерінде жақсылық болсын деген ниетпен қойдың мүйізі түрінде тігіледі деп айтты. Сондықтан Қазақстандағы оюлардың көбі осындай көңілмен тігіледі деп түсіндім.

Шиеко Хироманың бұл Қазақстанға алғашқы сапары емес. Екі жыл бұрын Шымкентте болып, сырмақ сырын зерттеген. Ал алматылық қолөнерші Гүлнар Сейжанмен ғаламтор арқылы танысқан. Енді ол ісмер әйелден сырмақ пен бөстек тігуді үйренбек. Ал қолөнершінің басты арманы – ұлттық өнерді одан әрі дамытып, Қазақстанның әр қаласында «Сырмақ» орталықтарын ашу.

Гүлнар Сейжан, қолөнер шебері:

– Ол не үшін керек? Ол біздің қазағымыздың дәстүрі мен мәдениетін ұмытпау үшін керек. Және тарихымызды ұмытпау үшін, немерелеріміз бен келер ұрпағымызға қалдыру үшін қажет. Осы сырмақ тігуді мектепте сабақ ретінде жүргізсек деп ойлаймын. Сонда біздің балаларымыз өзімен бірге өмір бойы алып кетеді. Сырмақ мәдениетіміз өлмейді.

Енді жас ғалым Шиеко Жапониядағы белді оқу орындарының бірі Шиба университетінде қазақ этнографиясы туралы докторлық диссертация қорғамақ. Қазақтың бір ою-өрнегі бір ғылыми еңбекке татитындығын осыдан-ақ көруге болады.

Авторлары: Алмас Садуақас, Нұрдәулет Жақсыбай

Дүйсенбі, 18 Қыркүйек 2017 21:36

Қазақстан Республикасы Тұңғыш Президенті – Елбасы қорының қолдауымен өткен республикалық «Байқоңыр» қысқаметражды фильмдер фестивалі мәресіне жетті.

Екі күн бойы «Көктөбе» демалыс саябағында көрермендер мен кино мамандары байқауға қатысқан туындыларды тамашалады.

 «Бродвей» кинопорталының ұйымдастыруымен өткен байқауға қатысуға 150-ге жуық өтініш түсіпті. Олардың 35-сі байқау шарттарына лайық деп танылып, іріктеуден өтті. Сондай-ақ конкурстан тыс 3 фильм және «48 сағатта түсірілген картина» жобасы бойынша 10 үздік кинокартина қазылар назарына ұсынылды.

Әнуар Кенжибаев, «Байқоңыр» кинофестивалінің директоры:

-Биыл байқау бағдарламасына екі аталым қосылды. Ол – қоюшы суретші және әділ қазылардың арнайы жүлдесі. Байқауға қатысуға өтініш берушілердің саны жыл сайын артып келеді. Бұл кино өнеріне келіп жатқан жас буынның өсіп келе жатқанын көрсетеді.

Деректі кино, анимациялық және көркем фильм секциясы бойынша сарапқа түскен туындылар 12 аталым бойынша марапатталды. Білікті кино мамандардың шешімімен бас жүлдені Баймұрат Жұмановтың «Жесткий тип» фильмі иеленді. «Алдағы уақытта байқаудың ауқымын кеңейтпекпіз», – дейді ұйымдастырушылар.

Әнуар Кенжибаев, «Байқоңыр» кинофестивалінің директоры:

-Келесі жылы фестивальге үш жыл толады. Алдағы уақытта көршілес елдердің осындай байқауларымен байланыс орнату ниетіміз бар. Көрермендерімізге Қырғызстан, Өзбекстан, Тәжікстан елдерінің үздік киноларын көрсеткіміз келеді.

Байқауда «Мәди» фильмінің режиссері Бигелді Әбдібековқа Нью-Йорк киноакадемиясының арнайы сертификаты тапсырылды. Жас маман енді сол академияда шеберлігін шыңдайды.

Авторлары: Гүлжан Көленқызы, Сержан Жұмабаев

Жексенбі, 17 Қыркүйек 2017 17:09

Алматыдағы «Алатау» дәстүрлі өнер театры бір жылдығын атап өтті.

Осыған орай өнер сахнасында үздік дәстүрлі ән орындаушыларының кеші ұйымдастырылды. Өнер кешінде ұлттық өнерді ерекше құрметтейтін көрермендер көп болды. Өз кезегінде еліміздің барлық өңірінен шақырылған дәстүрлі әншілер халық әндерін ескі сарынмен кезектесе орындады.

Жанғали Жүзбай, ҚР Еңбек сіңірген қайраткері, күйші:

– Менің ойымша, мұндай кеш бірінші рет осындай үлкен өнер ордасында ұйымдастырлып отыр. Мұндай өнер ордасы Қытайда болуы мүмкін. Өйткені олардың классикалық театры бар. Онда олардың дәстүрлі ән-күйі, биі насихатталады. Ал бұл Орталық Азияда бірінші рет болайын деп тұр. Тыңдармандар осы кеште алғаш рет күй орындау шеберлігінің жеті, әншілердің бес мектебі мен екі жыршы-жыраудың үлгісін көрсеткен мықты орындаушыларды көрді.

«Осыған дейін дәстүрлі өнер иелерінің басы бір жерде былай тоғыспаған еді», – дейді олар.

Айгүл Қосанова, дәстүрлі әнші:

– Жеке концертін берсе, кезектесіп халықты жинап, өзіміздің дәстүрлі өнерімізбен сусындатып отырса, нұр үстіне нұр болады. Өйткені басқа опералық театрда болмаса, Республика сарайында концерт берген бір бөлек те, өзіміздің осы дәстүрлі өнер театрында концерт берудің жөні бір бөлек. Бұдан былай дәстүрлі ән мен күй кештері жиі өтіп тұратын болады. Ол осы кеште өнер көрсеткен серілер мен «Алатау» дәстүрлі өнер театры арасында қол қойылған келісім негізінде жүзеге асырылмақ. Аталған орындаушылар үшін театр тарапынан жеңілдік қарастырылған.

Авторлары: Аршын Кемелжан, Эдуард Кон

Қазақстан және әлем жаңалықтары

Календарь

Әлеуметтік желілер

  1. TW
  2. FB
  3. BK

Приложение Хабар для iOS Приложение Хабар для Андроид

Хабар 24 Телеканал Kazakh TV  Телеканал ЕЛАРНА

яндекс.ћетрика

 Тумар EXPO 2017 Акорда Электронное правительство Казахстана

© 2017 «Хабар» агенттігі. Барлық құқықтары қорғалған.