ҚАЗАҚСТАННЫҢ ҮШІНШІ ЖАҢҒЫРУЫ: ЖАҺАНДЫҚ БӘСЕКЕГЕ ҚАБІЛЕТТІЛІК

«Астана Моторс» компаниясы Ә.Қастеев атындағы мұражайға Энди Уорхолдың картинасын сыйлады

    Сәрсенбі, 04 Қазан 2017 23:24

«Астана Моторс» компаниясына 25 жыл. Айтулы датаға орай компания түрлі мәдени және қайырымдылық шараларға ұйытқы болуда.

Бұл жолы «Астана Моторс» компаниясы Әбілхан Қастееев атындағы өнер мұражайындағы бейнелеу өнерінің жауһар туындыларын тамашалауға келгендерге мәрт сый жасап отыр. Өнерсүйер қауымның 1 ай бойы мұражайға тегін кіруін қамтамасыз етті. 

Айдын Сұлтанов, «Астана Моторс» компаниясы қоғаммен байланыс жөніндегі басқарма басшысы:

-Руханиятсыз адам өмір сүре алмайды. Біздің көптеген әлеуметтік шараларымыз болып жатады. Қайырымдылық әрі мәдени шараларға біз белсене қатысамыз.

Мәдени шара барысында компания басшысы Нұрлан Смағұлов еліміздің мәдениетінде Әбілхан Қастеев мұражайының орны бөлек екенін айтты. Өз атынан мұражайға американдық поп-арт суретші Энди Уорхолдың «Джеки Кеннеди» атты суретін табыстады.

Нұрлан Смағұлов, «Астана Моторс» компаниясының басшысы:

-Бұл сыйлық қаламызға, нақтырақ айтқанда осы мұражайға деген құрмет әрі алғысымыз деп білерсіздер. Мұнда келгенде қала тұрғындары мен қонақтары үшін қызықты болу керек. Бизнес те өнердің дамуына мүдделі, өнерді қолдау қажет. Бұл әлемдік үрдіс. Сондықтан компаниямыздың 25 жылдығына орай біз сол игі істі  жалғастырмақпыз.

Компания көп уақыттан бері мәдениет, білім және спорт саласын дамытуға бағытталған инвестициялық бағдарламаларды жүзеге асырып келеді. Алдағы уақытта да қайырымдылық шаралардан тыс қалмайтындарын айтады.

Авторлары: Алмас Садуақас, Сержан Жұмабаев

ШҚО-да «Тарбағатай жұлдыздары» халықаралық фестивалі өтті

    Сейсенбі, 03 Қазан 2017 10:03

Шығыс Қазақстан облысында «Тарбағатай жұлдыздары» халықаралық эстрадалық ән фестивалі өтті.

Рухани құндылықтарды дамытып, шетелдерде тұратын отандастармен мәдени-достық байланысты нығайтуға бағытталған байқауға биыл 50 шақты өнерпаз қатысты. Қазақ елінің түкпір-түкпірінен бөлек Қытай, Ресей, Моңғолия, Қырғызстан сияқты елдерден жас таланттар, жаңа есімдер бақ сынады. Осымен 5-рет ұйымдастырылып отырған фестиваль биыл аудан орталығы емес, Ақжар ауылында өткізіліп отыр. «Ондағы мақсат – шетелдік қонақтарға еліміздің жетістіктерін паш ету болса, екіншіден, шалғай ауылдағы халықтың рухын көтеру», – дейді ұйымдастырушылар. Бас жүлдеге тарбағатайлық Дархан Жолдыбаев лайықты деп танылды. Өзге де өнерпаздар әртүрлі аталымдар бойынша дипломдармен марапатталып, сый-сияпатқа ие болды.

Айтолқын Бақытқызы, байқауға қатысушы /Моңғолия/: 

- Орындағаным – «Ана туралы баллада», екінші орындайтыным – «Әлия». Біз ел көреміз, жер көреміз, барлығымен танысамыз. Біз осы жақтан көргенімізді елімізге барып көркемдеп береміз.

Ержан Сабырбаев, қазылар алқасының төрағасы:

- «Рухани жаңғыру: болашаққа бағдар» бағдарламасының аясында, Елбасымыздың Жолдауынан да туындайтын үлкен бағдарламаның бірі ретінде жоғарғы деңгейде ұйымдастырылды. Жан-жақтан қандастарымыз Тарбағатайға келіп, елін көріп, көркейіп жатқан Тарбағатайды көріп, өздері де аң-таң болып отыр. Әділ қазылар алқасына да өте қиындау боп тұр. Себебі былтырғы деңгейге қарағанда биылғы сайысқа біздің әншілеріміз жоғары дәрежеде дайындалып келіп отыр.

«Астана Опера» Оманды мойындатты

    Жұма, 29 Қыркүйек 2017 14:32

«Астана Опера» балетінің ұжымы Оманның астанасында «Аққу көлі» спектаклін сахналады.

Маскат сұлтандығының опера театрында ине шаншар жер болмады. Астаналық әртістердің өнерін тамашалауға дипломаттар, жергілікті зиялы қауым, әлем балетінің жұлдыздары да келді. 

«Астана Опера» Оманға атақты «Аққу көлі» қойылымын жаңа хореографиялық түзетумен алып барған болатын. Авторы – балет труппасының көркемдік жетекшісі Алтынай Асылмұратова. Спектакльде басты рөлдерді Мадина Басбаева мен Әйкерім Бекетаева ойнап шықты.

Мара Галеацци, Лондон балетінің примасы: 

- Өте тамаша қойылым. Олар сахнаға шыққанда, олардың жауқазындай жастығына таңқалдым. Жас труппаның мұндай қиын қойылымды кәсіби әрі соншалықты әдемі суреттеп шығуы мойындатпай қоймайды. Олар шынымен кәдімгі аққулардай! Бұл – көркемдік жетекші Алтынай Асылмұратованың үлкен жетістігі.