07:00 Әрі қарай эфирде: ҚР Әнұраны
×

Warning

JUser: :_load: Unable to load user with ID: 143
+7 (7172) 757 540
astananews@khabar.kz

Музей экспонаттарын енді үйден шықпай-ақ көруге болады

    Жексенбі, 28 Қаңтар 2018 09:31
фото: Nur.kz

Музей экспонаттарын үйден шықпай-ақ көруге болады.

Алматы облыстық өңірлік коммуникациялар қызметінде «Жетісу 360» виртуалды жобасының таныстырылымы өтті. Әрбір пайдаланушы болашақта компьютер немесе смартфонның көмегімен Алматы облысы аумағындағы барлық мұражайға саяхат жасай алады. Әзірге ғаламтор пайдаланушылар 3D форматында жасалған осы жоба арқылы Талдықорғандағы Мұхамеджан Тынышбаев пен Ілияс Жансүгіров атындағы музейді тамашалай алады. Сондай-ақ сандық мультимедиа арқылы экспонаттарды кез келген уақытта суретке түсіруге болады. Ал ондағы бейнежазба 360 градуста бұрылып, оны тамашалаушыларға өте жоғары сапада көрсетіледі. Виртуалды гид қызметі мен ілеспе жолдар арқылы ақпарат беру мәселесі де жан-жақты қарастырылған.

Әсел Садықова, виртуалды жобаның бірлескен авторы:

Бүгінгі уақытта екі музейге де 3D туры жасалды. Ол 3D турда аудиогид бар. Әр адам интернет желісімен, Facebook, WhatsApp сияқты желілер арқылы өзі кіріп, керекті музейін қарай алады. Осымен ғана тоқталмай, алдағы уақытта Жетісу өңірінің көрікті жерлері – Шарын шатқалын, Көлсай т.б. сокралды аймақтардың 3D турын жасау біздің жоспарымызда бар.

Астанада мемлекеттік оркестр ұжымы классикалық музыка кешін ұсынды

    Сенбі, 27 Қаңтар 2018 23:35

Өнердің бәсін білетін өресі биік тыңдарман назарына классикалық музыканың жауһарлары ұсынылды.

«Қазақстан» концерт залында «Орындаушылар академиясы» мемлекеттік оркестрі «Вселенная звуков» классикалық музыка кешін ұсынды. Оркестрдің дирижері – халықаралық байқаулардың лауреаты Асқар Дүйсенбаев. Ал көркемдік жетекшісі – Қазақстан Республикасының халық әртісі Айман Мұсақожаева. Сахна төрінде шетел және қазақстандық композиторлардың үздік туындылары ойналды. Мысалы Россини, Штраус, Жорж Бизе, Моцарт, Ахмет Жұбанов, Латиф Хамидидің танымал операларынан ариялар ұсынды. Жеке орындашыларға келсек, халықаралық байқаулардың лауреаттары Роза Солтыханова, Азамат Жылтыркөзов, Азамат Мәлік, Руслан Мұстафин сынды өнерпаздар өз шеберлігін паш етті.

Астанада «Сақтар қазынасы» арнайы қоймасы ашылды

    Сейсенбі, 16 Қаңтар 2018 16:14
cs8.pikabu.ru

ҚР Ұлттық музейінде «Қазақстанның киелі жерлерінің географиясы» жобасына арналған ІІ республикалық форум аясында «Сақтар қазынасы» арнайы қоймасы ашылды.

Форумда «Қазақстанның киелі жерлерінің географиясы» жобасы бойынша 2017 жылы атқарылған жұмыстардың нәтижелері мен алдағы жылдарға арналған жоспарлары талқыланды.

«2017 жылы Қазақстанның киелі жерлерін анықтауға байланысты өткен І республикалық форумда жобаның мақсат-міндеттерін, жоспарларын айқындап алған болатынбыз. Жоспарға сәйкес ҚР Мәдениет және спорт министрлігінің ұйымдастырумен біршама ауқымды жұмыс атқарылды. Қазақстанның киелі жерлер географиясы жобасын тиімді жүзеге асыру мақсатында арнайы жұмыс тобы және жобалау кеңсесі, ҚР Ұлттық музейі жанынан «Қасиетті Қазақстан» өлкетануды дамыту орталығы құрылды. «Қасиетті Қазақстан» орталығы жанынан ғылыми сараптамалық кеңес құрылды. Оның жұмысына ғалымдар, тарихшылар, археологтар, қоғам қайраткерлері, өлкетанушылар тартылды. Осының нәтижесінде жүйелі жұмыстар атқарылып, нәтижесінде «Қазақстанның жалпыұлттық қасиетті нысандары», «Қазақстанның өңірлік қасиетті нысандары» атты кітаптар мен «Қасиетті Қазақстан» атты энциклопедияның І томы жарық көрді», – деді ҚР Мәдениет және спорт министрлігінің жауапты хатшысы Қ.Уәлиев.

Республикалық форум аясында «Рухани жаңғыру» атты көрме ашылды. Көрмеге тарихи құнды жәдігерлер қойылған. ҚР Мәдениет және спорт министрлігінің қолдауымен «Сақтар қазынасы» атты ерекше қойманың ашылу салтанаты өтті. Ерекше қойманы тамашалап келушілердің назарына бірінші рет сақ, сармат дәуіріне жататын жәдігерлердің түпнұсқалары ұсынылды.

Форумға қатысушылар атап өткендей, 2017 жылы жасалған негізгі жұмыстардың бірі – Қазақстанның қасиетті нысандары бойынша республикалық этномәдени экспедициялар. Форумда «Қазақстанның жалпыұлттық қасиетті нысандары», «Қазақстанның өңірлік қасиетті нысандары» атты кітаптар мен «Қасиетті Қазақстан» атты энциклопедияның І томының тұсауы кесілді.

Жалпы ұлттық маңызы бар объектілер бойынша «Қазақстанның қасиетті жерлерінің географиясы» көп функционалды виртуалды картасы таныстырылды.

Өңірлік маңызы бар объектілер бойынша «Қазақстанның қасиетті жерлерінің географиясы» интерактивтік карта халық назарына ұсынылды.

Әлеуметтік желілер үшін Қазақстанның жалпы ұлттық қасиетті объектілері туралы қазақ, орыс және ағылшын тілдеріндегі 40 секундтық хронометражды мобильді форматтағы бейнероликтер жұртшылыққа таныстырылды.

Айта кетер болсақ, өңірде жүрген бір топ өлкетанушылар тұңғыш рет жарыққа шыққан «Үздік өлкетанушы» естелік медалімен марапатталды. Сондай-ақ облыстық музей директорлары мен басқа да мәдениет қызметкерлері ҚР Мәдениет және спорт министрінің Құрмет грамотасы мен Алғыс хаттарына ие болды.

Ақпарат көзі: strategy2050.kz

«Хабар» арнасы «Тасөткел» тарихи драмасын ұсынады

    Дүйсенбі, 15 Қаңтар 2018 17:14

Ашаршылықтан енді аман қалдым-ау дегенде ата-анасынан айырылған жеті жастағы Қасымның балалық шағы Қазақстанда емес, Ауғанстанда өтті.

Жетімдіктің ащы зарын татқан жеткіншек өзінің кім екенін білмей өсті. Ауғанстанда жүріп сұм соғысты көреді. Мейірімге мұқтаж баланың басынан ешкім сипамады, өз тамағын өзі тауып жеді. Кейін Түркияға көшіп, түбі туған жерін тауып келеді. Соқпағы көп, қиын да қатал кезеңді басынан өткерген баланың тағдырын тек біздің арнамыздан көре аласыздар!

30-жылдардың басы. Ашаршылық. Адамдар азып-тозып, тұрмыс тоқыраған кез. Бір тілім нанға зар болған халық құлқынның қамы үшін жат елге босып кетіп жатты. Ауғанстанды бетке алған бір отбасы ұзақ жолдың кесірінен аштықтан қырыла бастады. Қазақстаннан ата-анасымен бірге аттанған жеті жастағы Қасым Ауғанстанға тұл жетім болып жетеді.

Айдос Тұрысбек, «Хабар» телеарнасының бас продюсері:

– Фильмнің негізгі идеясы – бір адамның тағдыры арқылы 30-40 жылдары сырт елде жүріп, өмір сүріп жатқан қазақтардың тарихын көрсету. Сол жылдардағы әлі де көп ақтаңдақ беттерді ашып көрсету. Отанға деген сүйіспеншілікті арттыру.

Тағдыр Қасымды талай қинады. Ата-анасынан айырылғаны аздай, ұлтының кім екенін, қайдан келгенін, түп тамырын білмеді. Ауғанстанда да тыныштық жоқ, соғыс басталады. Қасым Түркия асады. Ептілігі мен іскерлігінің арқасында кейін кәсіп ашып, тұрмысын біршама түзейді.

Сержан Зәкірұлы, сценарий авторы:

Енді-енді есін біліп келе жатқан бала жат жұртта өсті. Ешкім оған «сен қазақсың, сенің атаң осындай» деп айтқан жоқ. Ол жетім қалып, жетім өсті. Сонда да ол қанында бар тектілігімен, түптің түбінде өзінің кім екенін іздеп тапты. Туған жеріне оралды.

Шығармашылық топ көптеген сериалда бас рөлді сомдаған актерлерді емес, танымал болмағанымен, таланты өзгеден кем түспейтін әртістерді таңдаған. Тек бір адамның ғана емес, тұтас қазақтың тағдыры суреттелген тарихи драма ертеңнен бастап кешкі сағат 21:30-да көрсетіледі.

Авторы: Айбар Төлжанұлы