Елордалық құтқарушылар екі баланы өрттен аман алып қалды

    Сәрсенбі, 29 Қараша 2017 17:35
Фото: Хабар 24

Елордадағы «Лазурный квартал» ТК өрт шығып, құтқарушылар екі баланың өмірін құтқарды.

Бұл туралы Астана әкімдігінің медиа орталығы хабарлайды.

«Ағымдағы жылдың 29 қарашасында сағат 10:41 минутта «101» пультіне Сарайшық көшесі 7/3 мекенжайы бойынша орналасқан «Лазурный квартал» ТК-де өрт оқиғасы туралы хабарлама түсті. Оқиға орнына № 16 және 3 мамандандырылған өрт сөндіру бөлімдерінің кезекші қарауылы келді.

Оқиға орнында белгілі болғандай, 14 қабатты тұрғын үйдің 10-қабатында

жатын бөлмеде тұрмыстық заттар жанып жатқандығы анықталды», – делінген қалалық ТЖД баспасөз қызметі таратқан хабарламада.

Сондай-ақ өрт болған пәтерде ересектердің қарауынсыз екі баланың үйде қалғаны анықталды. Құтқарушылар бірден балаларды құтқарып, өртті сөндіруге кірісті.

«Өрт аумағы 18 шаршы метрді құрады. Дұрыс әрі шұғыл жұмыс нәтижесінде 2 бала құтқарылып, 4 адам эвакуацияланды. Өртті сөндіруге Астана қаласы ТЖД 16 маманы мен 4 бірлік техника жұмылдырылды. Өрттің себебі анықталуда», – делінген хабарламада.

Алматыда зейнетақы қорынан жымқырылған қаржыға қатысты сот отырысы басталды

    Сәрсенбі, 22 Қараша 2017 19:06

Бүгін Алматыдағы мамандандырылған ауданаралық сотында Бірыңғай жинақтаушы зейнетақы қорынан жымқырылған қомақты қаржыға қатысты куәгерлерді тыңдау басталды.

Акционерлік қоғамның есепшісі Армида Қуатованың мәліметінше, зейнетақы қоры мен «Бузгул Аурум» ЖШС арасындағы келісімді қор төрағасының экс-орынбасары Дабыр Медетбеков бақылаған.

Тергеу нәтижесінде анықталғандай, келісімді іске асырғаны үшін Дабыр Медетбеков 700 мың доллар шамасында пара алған. Сонымен қатар ол инвестициялық комитеттің мүшесі болған. Есепшінің айтуынша, барлық қаржылық операция аталған экс-басшының рұқсатымен іске асырылып келген. Бұл қылмыстың кесірінен мемлекетке 5 млрд теңге шығын келген.

Айта кетейік, аталған дерек бойынша 6 адам күдікті деп танылып отыр.

БҚО-да мектеп оқушылары жаппай астан ұшынды

    Сейсенбі, 21 Қараша 2017 12:08

Батыс Қазақстан облысының Ақсай қаласында балалар жаппай астан ұшынып, дәрігер жәрдеміне жүгінді.

Кеше түс ауа сағат 16:00 шамасында Қызылтал орта мектебінің 6-7-ші сыныбында оқитын оқушылар өздерін жайсыз сезінетінін айтқан.

Барлығы 22 науқас аудандық ауруханаға жатқызылды. Тиісті ем-шаралар мен зерттеулерден соң бүгін таңертеңнен 17 бала үйлеріне қайтарылды. Бесеуі дәрігердің бақылауында. Қазір мектеп асханасы тексеріліп, аурудың неден шыққаны анықталуда.

Қанат Төсекбаев, БҚО Денсаулық сақтау басқармасының басшысы:

- Ауруханада қалған 5 науқастың үшеуіне гастрит, екеуіне фарингит деген диагноз қойып жатырмыз. Сонымен қатар қосымша облыстың бас инфекционисті науқастарды кеше кеште қараған болатын және СЭС-тың мамандары бірге жұмыс істеп жатырмыз. Зерттеу нәтижелерін бүгін түске таман болады деген ойдамыз. Бірақ алдын ала айтқанда науқастардың жалпы жағдайы бойынша инфекциялық не басқаша қоздырғыштар табылмаған.

Ақтөбеде мұнай ұрлығына қатысты сот отырысы басталды

    Сейсенбі, 21 Қараша 2017 08:47

Ақтөбеде мұнай ұрлады деген айыппен тергеу абақтысына жабылғандарға қатысты сот отырысы басталды.

Тұтқындалғандардың арасында «Төрт ағайынды» деген атаумен белгілі болған атышулы қылмыстық топ мүшелері бар. Темір торға қамалған 17 күдіктімен бірге Ақтөбеден кетпеуі туралы қолхат табысталған 9 азамат та жауапқа тартылуда. Оларға ұйымдасқан түрде жергілікті мұнай өңдеу зауытынан қара алтын жымқырды деген айып тағылған. Айыптаушы тарап мүгедек арбасына таңылған Еркіз Ізбасаровты қылмыстық топтың басшысы деп есептейді. Одан бөлек экс-полицей де сот алдында жауап бермек. Іс Ақтөбе облыстық мамандандырылған қылмыстық ауданаралық сотында тергелуде.

Анар Айтжанова, Ақтөбе облыстық соты баспасөз қызметі жетекшісінің міндетін атқарушы:

- 2014-2016 жылдар аралығында Ақтөбе облысы аумағында мұнай ұрлады деген айыппен 26 азаматқа қатысты қылмыстық іс қаралуда. Сонымен қатар Қазақстан Республикасы Қылмыстық кодексінің ұйымдасқан қылмыстық топ құру, қару-жарақты заңсыз сатып алып сақтау және біреудің затын аса ірі көлемде жымқыру баптары бойынша айыпталуда.