ҚАЗАҚСТАННЫҢ ҮШІНШІ ЖАҢҒЫРУЫ: ЖАҺАНДЫҚ БӘСЕКЕГЕ ҚАБІЛЕТТІЛІК

Астанада пара алған лауазымды тұлға ұсталды

    Сейсенбі, 10 Қазан 2017 12:13

Сыбайлас жемқорлыққа қарсы іс-қимыл ұлттық бюросының Астана қаласы бойынша департаменті лауазымды тұлғаның қылмыстық әрекетін әшкереледі. Ауыл шаруашылығы министрлігі Су ресурстары комитеті Экономика бюджеттік жоспарлау және бухгалтерлік есеп басқармасының басшысы Марат Мырзатаев мемлекеттік сатып алуға қатысушылардан жүйелі түрде пара алып отырған.

Кезекті 4 млн-нан астам ақша алып жатқан кезде лауазымды тұлғаның заңсыз әрекеті әшкере болды.

Бұдан бөлек 9 қазанда Мырзатаев мердігер ұйымның мүддесін жақтап, Қаржы министрлігі Ішкі мемлекеттік аудит комитетінің бас сарапшысы Ернар Медеубековке тендер қорытындысын жою үшін 1 млн теңге пара берген. Дәл сол күні екеуі де тұтқындалып, уақытша ұстау изоляторына жабылды. Қазір тергеу амалдары жүріп жатыр.

Ресейде қазақстандық автобус ірі жол-көлік апатына түсті

    Жұма, 06 Қазан 2017 20:55

Бүгін түнде Ресейдің Владимир облысындағы Покров станциясының теміржол өткелінде пойыз жолаушылар автобусымен соқтығысты.

Көлік апатында 16 адам қаза тапты. Марқұмдардың 15-і Өзбекстанның азаматтары болып шықты. 5 адам жараланған. Пойыз соққан автобусты тізгіндеген Қазақстан азаматы қайтыс болды. Екінші отандасымыз түрлі дене жарақатымен ауруханада жатыр. Алдын ала ақпаратқа сәйкес, көлікте 55 жолаушы болған. Бұқаралық ақпарат құралдарының мәліметінше, автобус Қазақстанға тиесілі. Еліміздің СІМ ресми өкілі Әнуар Жайнақов бұл ақпаратты растады.

Әнуар Жайнақов, ҚР СІМ баспасөз қызметінің жетекшісі:

- 15 адам қаза тапқан, 5 адам зардап шеккен. Олар, зардап шеккен адамдар Петушинскийдегі клиникалық ауруханада жатыр. Біздің дипломаттар олардың азаматтығын және жеке мәліметтерін анықтауда.

Шымкент жұрты әуе апатынан қаза тапқан дәрігерді ақтық сапарға шығарып салды

    Бейсенбі, 05 Қазан 2017 21:09

Бүгін Шымкент жұрты әуе апатынан қаза тапқан дәрігер Талғат Патсаевты ақтық сапарға шығарып салды.

Медицина ғылымдарының докторы, акушер-гинеколог өзінің 20 жылдық еңбек өтілімінде жүзден аса адамның өміріне араша болған екен. Марқұммен қоштасуға Оңтүстік Қазақстан облысының зиялы қауымы, әріптестері мен ағайын-туысы түгел жиналды. Талғат Патсаевтың соңында екі ұлы мен жары қалды.

Талғат Құдайбергенов, Медицина ғылымдарының докторы, профессор:

Талантты дәрігер болды. Жақсы адам, сосын шұғыл адам еді. Іссапарға шығып, әйелдерге, соның ішінде екі қабат аналарға көмек беріп жүретін. Ең бастысы жақсы адам еді.

Алматы маңындағы ұшақ апатының себеп-салдарын анықтау үшін арнайы комиссия құрылды

    Сәрсенбі, 04 Қазан 2017 12:08

Алматы маңындағы ұшақ апатынан қаза тапқан 5 адамның есімі белгілі болды.

Олар – профессор, Акушерлік, гинекология және перинатология ғылыми орталығының акушер-гинекологы Патсаев Талғар Әнапиұлы мен профессор, Кардиология және ішкі аурулар ғылыми-зерттеу институтының реаниматолог-дәрігері Артықбаев Жәнібек Түкенұлы. Сондай-ақ ұшақ командирі, Қырғызстан азаматы Цой мен екінші ұшқыш, Қазақстан азаматы Кутафин және борттехник Бейшебек Акматбаев екені белгілі болды. Оқиға орнында авиациялық апаттарды тергеу басқармасының мамандары  жұмыс істеп жатыр.

Біздің түсіру тобымыз куәгерлермен тілдесіп қайтты. Жергілікті тұрғындардың айтуына қарағанда, ұшақ құлаған сәтте екі мәрте жарылыс болған. Содан кейін әуе көлігі лезде жанып кеткен. Тағы бір маңызды дерек, апат болған маңайдағы электр бағаналары қатты зақымданған. «Соған қарағанда әуе көлігі құлардан бірнеше секунд бұрын жоғары вольтті электр желілеріне келіп соқтығысқан», – дейді куәгерлер.

Кеше «East wing» әуе компаниясына тиесілі АН-28 ұшағы Алматы әуежайынан 28 шақырым қашықтықта апатқа ұшырап, борттағы бес адам да қаза тапты. Санитарлық рейс Алматыдан Шымкентке қарай ұшып шыққан. Борт кешкі сағат 18:35-те көкке көтеріліп, 18:47-де, яғни арада 12 минут өткеннен кейін байланыстан ажыраған. Кейін белгілі болғандай, 19 сағат 15 минутта ол жерге құлайды. Қатты соққының салдарынан әуе көлігінің қалдықтары 200 метр радиусқа дейін шашырап кеткен.

Руслан Стяжкин, Междуреченск ауылының тұрғыны:

-Үш мәрте айналды да құлады. Екі мәрте жарқ-жұрқ ете қалды. Ұшақ элекр бағанасына барып соғылып, сосын ұшқын пайда болды. Электр сымдары жоғары қуаттылықта тұрғандықтан, жарылыс болды деп ойлаймын. Жойқын жарылыс болды. Ұшақтың күлі көкке ұшты, түк қалмады.

Әуе апатының нақты себеп-салдарын анықтау үшін құрылған арнайы комиссия мүшелері Астанадан Алматыға бағыт алды. Комиссияға Инвестициялар және даму министрінің орынбасары Роман Скляр жетекшілік етеді. Бізге белгілі болғаны, санитарлық авиация Шымкенттің облыстық клиникалық ауруханасында жатқан әйелге медициналық көмек көрсетуге шыққан. Науқас Түркістаннан келіп түскен. 16 қыркүйек күні босанған, сол уақыттан бері дәрігерлер оның өмірі үшін күресіп келеді. Алғашында Түркістанның, сосын Шымкенттің дәрігерлері емдеген. Жағдайы тіптен нашарлаған соң өте білікті мамандарды Алматыдан шақыртқан.