09:00 Әрі қарай эфирде: Новости
+7 (7172) 757 540
astananews@khabar.kz

Қызылордада қатты желдің салдарынан көпқабатты үйдің шатыры құлады

    Бейсенбі, 25 Қаңтар 2018 12:22

Оқыс оқиға Қорқыт ата көшесінде болды.

Зардап шеккен ешкім жоқ. Дегенмен ұшқан шатыр пәтерлердің бірінің терезесін зақымдапты. Оған қоса ауладағы бірнеше ағашты сындырған. 100 пәтерлі бұл тұрғын үйдің іргесі осыдан 30 жыл бұрын қаланған. Жаңбырлы күндері жоғарғы қабаттағы пәтерлердің төбесінен су сорғалайды екен. Сондықтан кейбір пәтер иелері тұрғын үйдің төбесін өз күштерімен жауып алған.

Айсұлу Ибраева, қала тұрғыны:

- Бұл үйдің төбесінен су ағады. Бесінші қабаттағы тұрғындардың бармаған жері, жазбаған арызы жоқ. Сол себептен олар өздері үстіне мынадай шатыр істеп алған болатын. Енді қазір апат, жел деп жатыр ғой. Соның кесірінен шатырлары жерге түсті. Құдайға шүкір, адам шығыны жоқ. Қазір мына ТЖМ-нің адамдары келіп, құлаған шатырды жерге түсірді. ПИК-тің бір баласы жинастырған.

Кабулдағы шабуыл салдарынан қаза болғандардың ішінде Қазақстан азаматы бар

    Жексенбі, 21 Қаңтар 2018 23:16
Фото: Әнуар Жайнақовтың Facebook парақшасынан

Бұл туралы ҚР СІМ баспасөз хатшысы Әнуар Жайнақов өзінің Facebook парақшасында хабарлады.

«Ауғанстаннан қазалы хабар келді. 1978 жылғы Қазақстан азаматы бүгін Ауғанстан астанасы Кабулдағы Intercontinental қонақүйінде болған шабуыл кезінде қаза тапты. Жақындары мен туған-туыстарына қайғырып көңіл айтамыз. Қазақстан дипломаттары Ауғанстанның қорғаныс қызметімен және Сыртқы істер министрлігімен байланыс орнатуда. Жақын күндері марқұмның денесін елге жеткізу мәселесі шешілетін болады», – делінген хабарламада.

Автобус өртінен қаза тапқан Өзбекстан азаматтарын алып кету үшін Ташкенттен арнайы рейс ұшырылды

    Бейсенбі, 18 Қаңтар 2018 19:42
tvtomsk.ru

Қазақстанда өртенген автобуста қаза тапқан Өзбекстан азаматтарын алып кету үшін Ташкенттен арнайы рейс ұшырылды.

Сондай-ақ Өзбекстан ТЖМ Қазақстандағы автобус өртінде 52 азаматының қаза тапқанын растады. Өзбекстанның Қазақстандағы консулы оқиға орнына аттанды. Ұшақ Ташкент уақытымен 15:00-де ұшты. Әзірше қаза тапқандар есімдерінің толық тізімі жоқ. Бұл мәселе қазір Қазақстан ІІМ және СІМ-мен бірлесе шешілуде.

Осы қайғылы оқиғаға байланысты Қазақстан Президенті Нұрсұлтан Назарбаев Өзбекстан Президенті Шавкат Мирзеевке көңіл айту жеделхатын жолдап, жеке өзінің және Қазақстан халқынының атынан көңіл айтты.

Ақтөбе облысындағы жол оқиғасына байланысты арнайы үкіметтік комиссия құрылды

    Бейсенбі, 18 Қаңтар 2018 19:25

Санитарлық авиация бөлімінің дәрігерлері Ақтөбе облысы, Ырғыз ауданындағы жолаушылар автобусында болған өрттен тірі қалған 5 азаматты облыс орталығына жеткізді.

Аман қалғандардың үшеуі автобус жүргізушісі болып шықты. Олар Шымкенттен, ал қалған екі жолаушы – Өзбекстанның тұрғыны. Өртенген автобуста 52 адам қаза тапты. Оқиға Самара-Шымкент тасжолының 1 068-ші шақырымында орын алды.

Жедел жәрдем пультіне қоңырау Астана уақытымен таңғы сағат 10:30-да түскен. Төтенше жағдайға байланысты арнайы комиссия құрылып, оқиғаның мән-жайын анықтауға кірісті. Ырғыз ауданына санитарлық авиация қызметті аттанып, жарақат алғандарды облыс орталығына жеткізді.

Серік Төленбергенов, Ақтөбе облысы әкімінің орынбасары:

- Біз жаңа шұғыл түрде арнайы комиссияның отырысын өткіздік. Төтенше оқиға орнынан жарақат алғандар мен қайтыс болғандардың денесін Ақтөбе қаласына жеткізу туралы шешім қабылдадық. Мәселенің мән-жайын осы жақта анықтайтын боламыз. Өрттің себеп-салдарын криминалист мамандар анықтап жатыр.

Ресми ақпаратқа сәйкес, «Икарус» автобусында 57 азамат болған. Оның тек 5-еуі ғана тірі қалды. 3-еуі – Қазақстан азаматы болса, қалған екеуі – өзбекстандық. Құтқарушылармен бірге оқиға орнына жеткен дәрігерлер зардап шеккендерге дереу көмек көрсетті.

Жасқайрат Сүлейменов, Ырғыз аудандық ауруханасының бас дәрігері:

- Жарақат алғандардың жағдайлары жақсы, алғашқы көмек көрсетілді. Екеуі жарақат алған, үшеуі аман сау. Естерінен айырылмаған, тек қана қолдарының сырты ғана күйген, біреуінде оң қолы, екіншісінде сол қолы.

Қазір полицейлер оқиғаның мән-жайын анықтауға кірісті. Қосымша ақпаратты арнайы тексеру жұмыстары анықталған соң жариялайтын болады. Әзірге белгілісі төтенше оқиғаға байланысты Қазақстан Республикасы қылмыстық кодексінің 345-бабы, 4-ші бөлімі бойынша іс қозғалған.

Алмас Садубаев, ҚР ІІМ баспасөз хатшысы, ІІМ мемлекеттік тіл және ақпарат департаментінің директоры:

- Болған оқиға бойынша тексеру жүргізу үшін, сонымен қатар зардап шеккендер мен қаза болғандардың жанұяларына жан-жақты көмек көрсету үшін арнайы үкіметтік ведомствоаралық комиссия құрылды. Оның құрамында Ішкі істер министрінің орынбасары Ерлан Тургумбаев, Денсаулық сақтау вице-министрі Алексей Цой, Инвестициялар және даму вице-министрі Роман Скляр, Сыртқы істер министрлігінің департамент директоры Ардақ Мадиев, облыстың құқық қорғау және басқа да органдарының өкілдері бар.

Жедел желі телефоны нөмірлері: +7 7132 56-29-62, +7 7132 56-68-85

Мансұр Есқожин, тілші:

- Құзырлы орган өкілдері қаза болған азаматтардың аты-жөнін анықтау жұмыстарына кірісіп кетті. Арнайы штаб жанынан психологиялық және өзге де көмек көрсету ұйымдастырылған. Төмендегі нөмірлер арқылы жедел желімен байланысуға мүмкіндік бар.

Авторлары: Мансұр Есқожин, Айнадин Молдабеков, Айбек Даутов