Мемлекет басшысы Түркия Президенті Режеп Тайип Ердоғанмен телефон арқылы сөйлесті

    Сәрсенбі, 31 Қаңтар 2018 18:50

Мемлекеттер басшылары әңгімелесу барысында екіжақты ынтымақтастық пен өңірлік күн тәртібіндегі өзекті мәселелерді, соның ішінде Сириядағы қазіргі ахуалды талқылады.

Екі ел көшбасшылары Түркітілдес мемлекеттер ынтымақтастығы кеңесінің кезекті саммиті жөнінде пікір алмасты.

Р.Ердоған Нұрсұлтан Назарбаевты Қазақстан мен Түркия арасындағы Жоғары деңгейдегі стратегиялық кеңестің кезекті отырысына қатысу үшін Анкараға шақырды.

Телефон арқылы сөйлесуге Түркия жағы бастамашы болды.

Мәжілісте коммерциялық емес ұйымдардың қызметі мәселелеріне арналған заң жобасы мақұлданды

    Сәрсенбі, 31 Қаңтар 2018 15:15
Фото: parlam.kz

Бүгін Парламент Мәжілісінің Спикері Нұрлан Нығматулиннің төрағалығымен Палатаның жалпы отырысы өтті.

Онда депутаттар коммерциялық емес ұйымдардың қызметі мәселелері бойынша түзетулерге арналған Заң жобасын бірінші оқылымда мақұлдады. Отырыс барысында Мәжіліс Спикері ауылдық жерлердегі үкіметтік емес ұйымдар мен ірі қалалардағы ұйымдар деңгейінің айырмашылығы бар екеніне баса назар аударып, арнайы конкурстарда ауылдағы үкіметтік емес ұйымдардың грантты да, мемлекеттік әлеуметтік тапсырысты да жеңіп алуы қиын екеніне алға тартты.

«Шынында да әлеуметтік стандарттар дайындалған кезде міндетті түрде ауылдың жағдайын ескеру керек. Себебі ауылдың да, қаланың да өз ерекшелігі бар. Сондықтан, стандарттарды енгізгенде осы ерекшеліктерге қарай тиісті жағдай жасау қажет», – деді Н.Нығматулин.

Заң жобасы нормаларын әзірлеу барысында ең озық тәжірибелер есепке алынып, Ұлыбритания, Канада, АҚШ, Польша, Франция мен Хорватия сияқты елдердің халықаралық тәжірибесі зерделенген. Заң жобасын әзірлеушілердің айтуынша, біріншіден, заң жобасында мақсатты топтардың қажеттіліктеріне талдау жасау, зерделеу және үкіметтік емес ұйымдар ұсыныстары негізінде мемлекеттік әлеуметтік тапсырысты қалыптастыру процесінің бірыңғай тәсілдері белгіленген. Екіншіден, мемлекеттік әлеуметтік тапсырыс нәтижелерін бағалауды енгізу жоспарлануда, ол халыққа көрсетілген қызмет сапасына қанағаттану деңгейі мен жоба тиімділігін анықтауға мүмкіндік береді. Үшіншіден, үкіметтік емес ұйымдар көрсететін мемлекеттік әлеуметтік тапсырыстың сапасына, шарттарына, мазмұнына бірыңғай талаптар немесе стандарттар, сондай-ақ әлеуметтік жобаларды бағалау критерийлерін енгізу ұсынылады. Төртіншіден, сыйлықақыларды және гранттарды беру механизмі жақсарып келеді. Бесіншіден, мемлекеттік әлеуметтік тапсырысты іске асыру, гранттарды ұсыну және сыйлықақыларды беру бағыттары нақтыланады. Жалпы бұл заң жобасының мақсаты – мемлекеттік әлеуметтік тапсырысты іске асырудың тиімділігі мен ашықтығын арттыру арқылы мемлекеттік әлеуметтік тапсырыс саласындағы заңнаманы жетілдіру. Заң жобасымен жұмыс істеу барысында депутаттар қосымша Әкімшілік құқықбұзушылық туралы кодекске және 3 заңға – «Тұтынушылардың құқықтарын қорғау туралы», «Мемлекеттік көрсетілетін қызметтер туралы» және «Мемлекеттік жастар саясаты туралы» Қазақстан Республикасының заңдарына түзетулер енгізді. Сонымен қатар отырыс барысында 2014 жылғы 29 мамырдағы Еуразиялық экономикалық одақ туралы шартқа Қырғыз Республикасының қосылуы туралы 2014 жылғы 23 желтоқсанда қол қойылған шарттың жекелеген ережелерін қолдану туралы хаттаманы ратификациялау туралы» Заң жобасы депутаттар тарапынан қолдауға ие болды. Заң жобасы 2017 жылғы 11 сәуірде Мәскеуде жасалған Хаттаманы ратификациялауға бағытталған. Хаттамада Еуразиялық экономикалық одаққа мүше әрбір мемлекет үшін кедендік әкелу баждарының сомаларын бөлудің жаңа нормативтеріне қатысты ережелер қамтылған.

Айта кету керек, Одаққа Армения мен Қырғызстанның кіруіне байланысты, Еуразиялық экономикалық одақтың әрбір мүше мемлекетіне кедендік кіріс баждарының сомаларын нормативке сәйкес үлестіруге арналған Хаттаманы ратификациялау бүгін қаралып отырған заң жобасының басты мақсаты болып табылады. Заң жобасы Еуразиялық экономикалық одақ туралы шарттың шеңберінде біздің мемлекетіміз алған бірқатар міндеттемелердің орындалуын қамтамасыз ету үшін қажет. Заң жобасымен ұсынылып отырған хаттама экономикадағы интеграциялық үдерістерді дамытуға және қатысушы мемлекеттердің араларында өзара тиімді серіктестік қарым-қатынастарды орнатуға мүмкіндік жасайды. Жалпы отырыс соңында халық қалаулылары бірнеше депутаттық сауалдар жолдады. Олар – Г.Бижанова, К.Абсатиров, К.Мұсырман, А.Құрманова, М. Магеррамов, Т.Сыздықов, Р.Ким, Д.Еспаева, А.Платонов, Б. Оспанов.

Н.Нығматулин: Ауылдық және қалалық үкіметтік емес ұйымдарға өз ерекшеліктеріне қарай жағдай жасау қажет

    Сәрсенбі, 31 Қаңтар 2018 12:17
Фото: parlam.kz

Мәжіліс төрағасы Нұрлан Нығматулиннің төрағалығымен өтіп жатқан Палатаның кезекті жалпы отырысында коммерциялық емес ұйымдардың қызметі мәселелеріне түзетулерге арналған заң жобасын бірінші оқылымда талқылау барысында Мәжіліс Спикері мемлекеттік әлеуметтік тапсырыс стандарттарына айрықша назар аударды.

Ауылдағы үкіметтік емес ұйымдардың деңгейі мен ірі қалалардағы ұйымдар деңгейінің айырмашылығы бар екеніне баса көңіл бөлген Н.Нығматулин арнайы конкурстарда ауылдағы үкіметтік емес ұйымдардың грантты да, мемлекеттік әлеуметтік тапсырысты да жеңіп алуы қиын екенін алға тарта келіп: – Шынында да әлеуметтік стандарттар дайындалған кезде міндетті түрде ауылдың жағдайын ескеру керек. Себебі ауылдың да, қаланың да өз ерекшелігі бар. Сондықтан стандарттарды енгізгенде осы ерекшеліктерге қарай тиісті жағдай жасау қажет, – деді.

 Бұл заң жобасының мақсаты мемлекеттік әлеуметтік тапсырысты іске асырудың тиімділігі мен ашықтығын арттыру арқылы мемлекеттік әлеуметтік тапсырыс саласындағы заңнаманы жетілдіру болып табылады.

Г.Әбдіқалықова Словакияның Қазақстандағы елшісі Петер Юзамен кездесті

    Сәрсенбі, 31 Қаңтар 2018 11:53

Ақордада Мемлекеттік хатшы Гүлшара Әбдіқалықова еліміздегі дипломатиялық миссиясы аяқталып жатқан Словакияның төтенше және өкілетті елшісі Петер Юзамен кездесті.

Басқосуда тараптар екі жақты сауда-экономикалық байланысты талқылап, нақты көрсеткіштерге тоқталды. Гүлшара Әбдіқалықова словак елшісіне 4 жылдан бергі нәтижелі қызметі үшін алғыс білдірді. Айта кетейік, Қазақстан мен Словакия арасында экономикалық һәм инвестициялық әріптестік қарқынды дамып келеді. Қос елдің дипломатиялық қарым-қатынасы 25 жыл бұрын орнаған. Еуроодақ мемлекеті - қазақстандық шикізат өнімдерін тұрақты тұтынушы. Оның үстіне, былтыр елордада өткен ЕХРО көрмесіне Словакия жоғары технологиялы туындыларын әкеліп, ұлттық павильоны безендірілуі жағынан екінші орынға лайық деп танылған.

Гүлшара Әбдіқалықова, ҚР Мемлекеттік хатшысы:

-Сіз елші ретінде қызмет еткен жылдары екі жақты әріптестік айтарлықтай дамыды деп айта аламын. Өткен жылы Словакия халықаралық ЭКСПО көрмесінде белсенділік танытты. Сіздің еліңізден мемлекеттік орган өкілдері мен саяхатшылар көп келді. Бұған қоса парламентаралық байланысымыз да жоғары деңгейге көтерілді. Сондықтан сізге айрықша алғыс білдіремін.

Петер Юза, Словакияның Қазақстандағы Төтенше және Өкілетті елшісі:

-Қазақстанда атқарған қызметім нәтижелі болды. Заңнамалық тұрғыда қос елдің жеткен жетістіктері көп. Былтыр Экспо көрмесінде Словакияның баламалы қуат көзі саласындағы жаңашылдықтарын паш еттік. Енді бір ғана үлкен мәселе қалды деп есептеймін. Ол Қазақстан мен Словакия арасында тікелей әуе рейсінің жоқтығы. Алдағы уақытта түйткілдің түйіні тарқайды деп сенемін.