ҚАЗАҚСТАННЫҢ ҮШІНШІ ЖАҢҒЫРУЫ: ЖАҺАНДЫҚ БӘСЕКЕГЕ ҚАБІЛЕТТІЛІК

ҚР СІМ Иерусалим қаласының мәртебесіне қатысты мәлімдеме жасады

ҚР СІМ Иерусалим қаласының мәртебесіне қатысты мәлімдеме жасады

Қазақстан Иерусалим қаласының мәртебесіне қатысты жағдайдың шиеленесуіне орай өз алаңдаушылығын білдіреді және барлық мүдделі тарапты ұстамдылыққа шақырады.

Иерусалимнің қазіргі мәртебесінің сақталуын жақтай отырып, Қазақстан халықаралық құқық пен БҰҰ Бас Ассамблеясы және Қауіпсіздік кеңесінің 181 (1947), 242 (1967), 338 (1973), 2334 (2016) қарарлары, сондай-ақ 2002 жылғы Араб бейбіт бастамасы негізінде палестиндік-израильдік реттеуге қолдауын растайды.

Палестиндік-израильдік қақтығыстың шешімі 1967 жылғы шекараларда астанасы Шығыс Иерусалим болып табылатын Палестина мемлекетінің құрылуын көздейтін «екі халыққа екі мемлекет» қағидасына сәйкес іске асуы тиіс.

Қазақстан БҰҰ Қауіпсіздік кеңесінің тұрақты емес мүшесі ретінде Таяу Шығыста бейбітшілікті орнатудың ажырамас шарты болып табылатын өңірдегі тұрақтылықты қалпына келтіру процесіне толық қолдауын көрсетуді жалғастырады.

Ақпарат көзі: ҚР СІМ баспасөз қызметі