ҚАЗАҚСТАННЫҢ ҮШІНШІ ЖАҢҒЫРУЫ: ЖАҺАНДЫҚ БӘСЕКЕГЕ ҚАБІЛЕТТІЛІК

Мексикада атой салған паралимпиадашылар елге оралды

    Дүйсенбі, 11 Желтоқсан 2017 11:20

Оларды таңмен таласа тұрған жергілікті жұртшылық әуежайда қошеметпен қарсы алды.

Естеріңізге сала кетейік, желтоқсанның 2-сі мен 7-сі аралығында жүзуден және пауэрлифтингтен паралимпиадашылар арасында әлем чемпионаты өткен болатын. Ел намысын қорғауға жаһандық додаға мұхит асып 16 спортшы барған. Отандастарымыз 2 алтын, 3 күміс және 1 қола медаль иеленіп қайтты.

Әнуар Ахметов, жүзуден әлем чемпионатының күміс жүлдегері:

– Жарыс жоғары деңгейде өтті. Біздің құрама үшін дәрежелі әлем чемпионаты болып тұр. Әрине, ойымда алтын алу болды. Бірақ күміске де ризамын. Алдағы уақытта қателіктерімді түзеп, жұмыс істеймін.

Жомарт Оразов, ұлттық штаттық командалар және спорт резерві дирекциясының басқарма басшысы:

– Бұл – келесі өтетін Токио параолимпиадасына үлкен тапсырыс. Төрт медальмен келе жатырмыз. Жүзу спортынан бөлек бізде мүмкіндігі шектеулі жандар арасында басқа спорт түрлері жақсы дамып келе жатыр. Еліміздің барлық аймақтарында қолдауға ие.

Қазақстандық боксшы Аида Сатыпалдиева кәсіпқой бокстағы тұңғыш жеңісіне қол жеткізді

    Дүйсенбі, 11 Желтоқсан 2017 10:21

Қазақстандық боксшы қыз Аида Сатыпалдиева кәсіпқой бокстағы тұңғыш жекпе-жегін өткізді.

Калифорниядағы бокс кешінің аясында ол жеңіліп көрмеген америкалықты жеңді. Бұл туралы «ВКонтакте» желісіндегі «Профи Бокс Казахстана» парақшасы хабарлады.

Аида Сатыпалдиева – Солтүстік Қазақстанның тумасы. 2015 жылы Қазақстан чемпионатына қатысып, іріктеу кезеңінде жеңіліске ұшыраған еді.

Ақпарат көзі: vesti.kz

Хоккейден Қазақстан жастары әлем чемпионатындағы бірінші ойында жеңіске жетті

    Дүйсенбі, 11 Желтоқсан 2017 07:38
Фото: vesti.kz

Хоккейден 20 жасқа дейінгі Қазақстан жастар құрамасы әлем чемпионатын жеңіспен бастады.

Отандастарымыз «А» дивизионындағы алғашқы ойында Германия жастарын ұтты.

Ойынның бірінші кезеңінде командалар шайба соға алған жоқ. Екінші кезеңде немістер бірінші болып шайба соғып, есепте алға шықты. Үшінші кезеңде Қазақстан жастар құрамасы есепті теңестіріп қана қоймай, бір шайба басымдығымен алға шыққан. Ойынның аяқталуына бірер минут қалғанда Германия жастары таразы басын теңестіріп кетті. Нәтижесінде командалар негізгі уақытта 2:2 есебімен тең ойнап, овертаймда Артур Гатиятовтың соққан шайбасы Қазақстан жастар құрамасына жеңіс сыйлады.

Ертең Қазақстан жастар құрамасы Латвиямен ойын өткізеді. Ойын Астана уақытымен сағат 18:00-де басталады.

Айта кетейік, әлем чемпионатының «А» дивизионындағы ойындар Францияның Куршевель қаласында өтуде. Оған Қазақстаннан бөлек Франция, Германия, Латвия, Венгрия мен Австрия құрамалары қатысуда.

«А» дивизионы элиталық дивизионнан кейінгі орында. Оған шығу үшін топта бірінші орын алу керек. Соңғы рет қазақстандық жас хоккейшілер элиталық дивизионда 2009 жылы ойнаған.

Қазақстан-U20 - Германия-U20 3:2 ОТ (0:0, 0:1, 2:1, 1:0)

0:1 – 20:58 Чарли Янке (Бокк)
1:1 – 42:43 Самат Данияр (Орехов)
2:1 – 45:11 Самат Данияр (Бекетаев)
2:2 – 58:43 Леон Гаванке (Вальтер)
3:2 – 63:57 Артур Гатиятов (Орехов)

Ақпарат көзі: vesti.kz

Бүркітшілерге «спорт шебері» атағы берілетін болады

    Жексенбі, 10 Желтоқсан 2017 23:31
inform.kz

Бұл туралы Тәуелсіздік күніне орай өткен «Қансонар» халықаралық бүркітшілер фестивалінде Ұлттық спорт түрлері қауымдастығының вице-президенті Ерлен Оспанов мәлімдеді.

Оның айтуынша, қазір Қазақстанда 70-тен астам бүркітші бар. Олар жыл сайын әртүрлі деңгейдегі сайыстарға қатысып, өз біліктіліктерін сынап келеді. Бұл ұлттық дәстүріміздің дамуына айрықша үлес қосып отыр.

«Бүркітшілік өздеріңіз білесіздер, ЮНЕСКО-ның материалдық емес құндылығы ретінде тіркелген. Бұл тек қазаққа ғана тән дәстүр екенін әлем мойындап отыр. Ең алғашқы бүркіт те осы қазіргі Қазақстан территориясында қолға үйретілгенін де қазір барлығы біледі»,– дейді Ерлен Оспанов.

Сонымен қатар ол бұл дәстүрдің енді ұлттық спорт түріне жатқызылатынын айтып өтті.

prosports