ҚАЗАҚСТАННЫҢ ҮШІНШІ ЖАҢҒЫРУЫ: ЖАҺАНДЫҚ БӘСЕКЕГЕ ҚАБІЛЕТТІЛІК

Халықаралық іздеуде жүрген Жанар Ахметова Украинада ұсталды

    Сейсенбі, 24 Қазан 2017 13:01

Ол 2005-2008 жылдары отандастарымыздың 50 миллион теңгеден астам ақшасын алаяқтық жолмен алып, үстемемен қайтарамын деп алдап кеткен. 

Жанар Ахметованың ұсталғаны туралы Ішкі істер министрлігінің өкілдері хабарлады. 

Алмас Садубаев, ҚР ІІМ мемлекетік тіл және ақпарат департаментінің директоры:

– Халықаралық іздеуде жүрген Жанар Ахметова Украина аумағында ұсталды. Ол алаяқтығы үшін жазаға кесілген болатын. Жанар Ахметова 2005 жылдың наурыз айынан 2008 жылдың қазан айы аралығында азаматтардың 50 млн теңгеден астам қаржысын алаяқтық жолмен иемденіп кеткен. 2010 жылдың тамыз айында істі қараған сот органдары қылмыскердің кәмелетке толмаған баласы барын ескерді. Сол себептен оның жазасын өтеуді 2021 жылдың 5 қарашасына дейін шегерген болатын. 

Семейде онлайн алаяқтар ұсталды

    Сейсенбі, 24 Қазан 2017 12:47
Фото:Stan.kz

Семейде полицейлер бір жарым жылдан бері халықтың қалтасын қағып келген алаяқтарды ұстады. Бұл туралы ШҚО ІІД баспасөз қызметі хабарлап отыр. 

Тергеу барысында 31 және 34 жастағы «ақылды жігіттердің» қала тұрғындарын «жұмысқа тұрғызамыз» деген желеумен тақырға отырғызып кеткені мәлім болды. Олар алдымен ашық ауыз халықтан жеке куәліктерін жинап алып, «өз қажеттіліктеріне» пайдаланған. 

Әрбір құжат арқылы алдымен екінші деңгейлі банкте карточка ашып, онлайн несиелер рәсімдеген. Әзірге 60 оқиға бойынша келтірілген шығын бір жарым миллион теңге екені анықталды. 

Қала тұрғындарынан әлі де арыздар түсіп жатқанына қарағанда, бұл көрсеткіш әлі өсетін сияқты. Полицейлер бейтаныс адамдарға жеке құжаттарды сеніп тапсыруға болмайтынын ескертеді.

Авторы: Болат Көкенайұлы

 

Атырауда Көліктегі қоғамдық денсаулықты сақтау басқармасының бас дәрігері пара алған

    Дүйсенбі, 09 Қазан 2017 22:00

Атырауда жемқорлыққа қарсы күрес департаменті қызметкерлері Көліктегі қоғамдық денсаулықты сақтау басқармасы республикалық мемлекеттік мекемесінің бас дәрігері Игорь Шинді тұтқындады.

Бұл мекеме теміржол мен әуе қатынасындағы еңбек шартының сақталуы мен тамақтандыруға жауап береді. Салалық санитарлық бас дәрігерге өз қызметкерлерінен және көлік қатынасы құрылымдарынан пара алды деген айып тағылуда.

Берік Кұлмағамбет, Атырау көлік прокуроры:

– Жемқорлыққа қарсы күрес қызметі аталған күдіктіге қатысты ҚР ҚК 366-бабы 3-бөлімі бойынша іс қозғады. Соттың шешімімен аталған азаматты 2 айға қамауға алуға шешім шығарды. Тергеу-тексеру амалдары жүргізілуде.

БҚО: Мемлекеттік кіріс департаментінің бөлім басшысы 101 млн теңге парамен ұсталды

    Жұма, 14 Шілде 2017 11:31

Жемқорлыққа қарсы әрекет ету жөнінен ұлттық бюроның БҚО бөлімшесінің қызметкерлері Батыс Қазақстан облысы бойынша МКК ЭТҚ Қаржы саласындағы құқық бұзушылықты тергеу басқармасының заңсыз ұйымдарды қаржыландыруға қарсы күрес бөлімінің басшысы Н.М.Орынәлиевті ұстады.

Н.М.Орынәлиев жалған кәсіпкерлік дерегі бойынша қылмыстық істі тоқтату және жеке тұлғаны қанатының астына алу үшін 101 млн теңгелік параның соңғы 25 миллион теңгесін алып жатқан жерден қолға түсті. 

Қазір күдікті Орал қаласының уақытша ұстау абақтысына қамалып, сотқа дейінгі тергеу жүргізіліп жатыр.

anticorruption.gov.kz

Аударған: Г.Абилова