ҚАЗАҚСТАННЫҢ ҮШІНШІ ЖАҢҒЫРУЫ: ЖАҺАНДЫҚ БӘСЕКЕГЕ ҚАБІЛЕТТІЛІК

Елімізде жауын-шашынсыз ауа райы сақталады

    Сенбі, 16 Желтоқсан 2017 07:02
Корабль Друзей

Кей жерлерде желдің күшеюі, тұман күтіледі.

Жамбыл, Қызылорда облыстарының кей жерлерінде тұман болып, таңертең және күндіз желдің күшеюі  күтіледі (15-20 м/с). Алматы облысының кей жерінде тұман, Алакөл аудандарында жел 18-23 м/с күшейеді.  Ақмола, Оңтүстік Қазақстан, Маңғыстау, Батыс Қазақстан, Қостанай, Солтүстік Қазақстан, Павлодар, Шығыс Қазақстан облыстарының кей жерлерінде тұман күтіледі. 

Ақпарат көзі: Қазгидромет

16 желтоқсан – Тәуелсіздік күні

    Сенбі, 16 Желтоқсан 2017 00:01

Қазақстан Республикасының Тәуелсіздік күні – тарихы тереңде жатқан еліміздің жаңа заманда өз алдына қайта егеменді ел болған күні.

Ал биыл ата-баба аңсаған асқақ арманның орындалғанына – 26 жыл.

Егемендігіміздің ширек ғасыры тарих қойнауына кетсе де, осы күнге дейін ел болып бағындырған белестер келешекке бастар берік іргетас болып қаланды. Зайырлы мемлекеттің ең басты қазынасы мен құндылығы адам өмірі және оның құқықтық бостандығы болып қала бермек.

1991 жылы 16 желтоқсанда Парламент «Қазақстан Республикасының мемлекеттік тәуелсіздігі туралы» Конституциялық заңын қабылдады. Тәуелсіз Қазақстанның бұл тұңғыш құжаты халқымыздың қуатты және пәрменді мемлекет құру арманының жүзеге асуын айғақтады. Заң Қазақстан егемендігінің оның ұлан-ғайыр аумағында және әлемнің саяси картасында мызғымастығын мәңгілікке бекітіп берді. Еліміздің басты құжаты – Қазақстан Республикасы Конституциясын 1995 жылғы 30 тамыздағы референдумда бүкіл Қазақстан халқы бірауыздан қабылдады. Конституция егемендіктің саяси және құқықтық негіздерін бекітіп, адамның өмірін, құқықтары мен бостандығын, тегіне, әлеуметтік жағдайына, нәсіліне, ұлтына, тіліне, дінге қатыстылығына қарамастан, адам мен азамат құқықтарының теңдігін мемлекеттің жоғары құндылықтары деп жариялады. Тәуелсіз Қазақстанның Конституциясы мемлекет пен қоғамның тұрақтылығы мен өркендеуінің мызғымас негізіне айналды. Қазақстанда тиімді демократиялық институттар - президенттік институты, Парламент, сот жүйесі және белсенді азаматтық қоғам қалыптасты. Елімізде жаһандық сын-қатерлерге төтеп беруге және бүкіл қоғамның мүдделерінің жүзеге асуын қамтамасыз етуге қабілетті мемлекеттік құрылымның тиімді жүйесін құруға мүмкіндік берген тарихи маңызды экономикалық және саяси реформалар жүргізілді.

Қазақстан ТМД кеңістігінде инвестиция тарту жағынан көш басында келеді. Бірқатар халықаралық ұйымдармен тығыз байланыс орнатып, әлемдік сахнада өзіндік ықпалы барын көрсетті. Қазір күллі әлем қазақ мемлекетін бейбітшіл әрі бітімгер ел ретінде таниды. Осынау ұлы мереке бүгін бүкіл ел көлемінде аталып, әр өңірде мәдени шаралар өтеді деп жоспарланып отыр.

Еске сала кетейік, осының алдында туған елінің көркеюіне елеулі үлес қосып, сүбелі табысқа жеткен дара тұлғалар мен ел ағалары Елбасының жоғары құрметіне ие болып, мәртебелі атақтары мен лайықты марапаттарын алды.

Қазақ футболының аңызы Тимур Сегізбаев дүниеден озды

    Жұма, 15 Желтоқсан 2017 23:59
Фото: vesti.kz

15 желтоқсанда 76 жасында қазақ футболының және «Қайрат» футбол клубының аңызы Тимур Сегізбаев өмірден өтті.

Бұл туралы ҚФФ баспасөз қызметі хабарлады.

Тимур Санжарұлы 1941 жылы Семей өңірінде өмірге келіп, футбол мектебін Алматыда тәмамдаған еді. 1958-1970 жылдар аралығында алматылық «Қайрат» сапында 200-ден аса ойын өткізді.

Ол алматылық клубтың құрамында керемет ойынымен көзге түсіп, жанкүйерлердің жүрегін жаулап алған болатын. Халық мақтанышына айналған футболшының КСРО чемпионатында соққан голдары ел есінде мәңгі сақталды. Тарих беттеріне жазылған сол ойындардың бірі Мәскеуде өткен еді. Тимур аға сол күні жергілікті «Спартактың» қақпасына қос гол соғып, қазақ футболының абыройын көкке көтерді.

Тимур Санжарұлы – КСРО Спорт шебері, ҚазССР және ҚР еңбегі сіңірген жаттықтырушысы, Мемлекеттік спорт қайраткері, ҚР ҰОК-тің орден иегері.

«Қазақстан Футбол Федерациясы, футболшылар мен бапкерлер, ардагерлер мен төрешілер, барлық футбол қауымдастығы Тимур Санжарының тума-туыстары мен жақындарына қайғырып, көңіл айтады», – делінген естіртуде.

«Еуразия Барысы»: Ең ауыр салмақтағы балуан анықталды

    Жұма, 15 Желтоқсан 2017 23:27

Қазақ күресінен «Еуразия Барысы» турниріне қатысатын балуандар арасындағы ең ауыр балуан белгілі болды, деп жазады sport.inform.kz.

Алматыда «Еуразия Барысы» турниріне қатысатын балуандар салмақ өлшеу рәсімінен өтті. Шара барысында ең ауыр Моңғолиядан келген Даваням Алтангэрээл болып шықты. Оның салмағы 138,6 келі тартты. Ал қазақ балуандары арасында ең ауыр салмақты Айбек Нұғымаров көрсетті. Оның таразыдағы таза салмағы 135,6 келі болды.

Биыл турнирге бірінші рет Бразилия, Жапония және Камерун елінің балуандары қатысады. Қазақстан құрамасы болса 2 құраммен шығады. Жеңімпаз он миллион теңге алады. Екінші орын алған құрамаға алты миллион, үшінші орынға төрт миллион теңге беріледі. Балуандар 16 желтоқсан күні «Алматы Арена» спорт кешенінде сегіз салмақ дәрежесінде сынға түседі.