14:50 Әрі қарай эфирде: Тележурнал «Astana life»
+7 (7172) 757 540
astananews@khabar.kz

Астананың 20 жылдық мерейтойына Атырау облысы ерекше тарту жасамақ

    Дүйсенбі, 11 Маусым 2018 08:22

Ерке Есілдің бойы тағы бір көпірмен толығады. Астананың 20 жылдық мерейтойына Атырау облысы осындай тарту жасамақ. Көпір көрінісі балық пішініне ұқсайды. «Бұл Атырау аймағының тарихын баяндайтын бекіремен байланысты», – дейді құрылысшылар.

Сондай-ақ қолайлығы да назардан тыс қалмаған. Мәселен, жауыннан және күннен қалқалайтын шатыры бар. Құрылыс жұмысы маусым айының соңына дейін аяқталады деп күтілуде. Енді қала тұрғындарына өзен үстінде тұрып тұмса табиғатты тамашалуға мүмкіндік бермек.

Асхат Садуов, «Астана бас жоспары» ҒЗЖИ жанындағы урбанистика орталығы басшысының орынбасары:

- Көпір ерекше дизайнда бой көтереді. Яғни заманауи стильде салынады. Екі жағалаудың арасын біріктіретін көпір сырт көзге бірден оттай басылады. Ол жерде қала тұрғындары мен қонақтары емін-еркін серуендеуіне барлық мүмкіндік жасалады.

Астананың 20 жылдығы қарсаңында балаларға арналған жобалар да іске асырылуда

    Бейсенбі, 07 Маусым 2018 19:02

Астананың 20 жылдық тойы әсіресе балалар үшін ерекше есте қалғалы тұр. Өйткені мәдени-танымдық іс-шаралардың басым бөлігі соларға арналған. Кішкентей көрермендер олардың кейбірін қазірдің өзінде тамашалай алады. Қала күніне орай барлық отбасы мүшелеріне арналған жобалар да іске асырылуда.

Қазір Астанадағы қай театрды алып қарасаңыз да күнделікті балаларға арналған қойылым ұсынуда. Әртістер биылғы мерекеге ерекше дайындық жүргізілгендігін айтады. Спектакльді таңдау өз алдына, ұжымның өнерін шыңдауға да басымдық беріліпті. Қаланың 20 жылдығы аясында олар Қазақстанның өңірлері мен көрші мемлекеттерде гастрольдік сапарда болып қайтыпты. Ал жуырда Астана өзге театрларды қабылдайды.

Еркін Қасенов, М.Горький атындағы Орыс драма театрының директоры:

- Бұл мерекеде біз мәдениетіміздің үлкен шыңын көрсеткіміз келеді. Басқа мемлекеттерден келген өнерді бағалағымыз келеді.  Бұл фестивальге Татарстан, Өзбекстан, Қырғызстан, Ресей, Сербия елдерінен және Қазақстандағы ең мықты театрлар келіп қатыспақшы.

Алматы облысының Астанаға тартуы

Құрылыстың балаларға не қатысы бар дерсіз. Тарқатып айтайық. Бұл техника мен мына жұмысшылар балаларға және барлық отбасы мүшелеріне арналған «Арай» саябағын абаттандыруда. Толықтай жаңа кейіпке енетін демалыс орынының құрылысын Алматы облысы қаржыландырылған. Былайша айтқанда, өңірдің Астанаға тартуы. Құны 3 млрд теңге болатын жұмыс қазір 85 пайызға аяқталған. Мұндағы алаңдар Жетісудың көрікті орындарының көшірмесі ретінде жасалыныпты.

Дәурен Алжасаров, Саябақты абаттандыру жобасының жетекшісі:

- Балаларға арналған және орталық алаңқайлар дайын. Таңбалы тас, Шарын каньоны да дайын. Амфитеатр және «Балқаш көлі» субұрқағы бар.

Ердәулет Байдуллаев, тілші:

- 1 шілдеден бастап бұл саябақ мына суреттегідей көрініске ие болады. Оның ерекшелігі амбебаптығында. Яғни қала қонақтары мен тұрғындарының мұнда қыстың күніде келіп демалуына барлық жағдай қарастырылған.

Авторлары: Ердәулет Байдуллаев, Айдос Меделбеков

Елордада өткен халықаралық конференцияға әлемнің 20 елінен саясаткерлер мен сарапшылар келді

    Сейсенбі, 05 Маусым 2018 19:32

Астана – бейбітшілік қаласы. Бұлай деуге толық негіз бар. 20 жылда бас қала іргелі халықаралық бастамаларға үн қосып, Қазақстанның бейбіт ұстанымдарын жаһан жұртына ашық білдіріп келеді. Оған қоса аймақтағы қауіпсіздік пен тұрақтылықты қамтуға барын салуда. Сириядағы соғысты ауыздықтау бойынша Астана процесінің өзі неге тұрады?! Бірақ іс мұнымен бітпейді.

Астана әлеуетін пайдаланып, қауіпсіздік пен экономикалық әріптестікті одан әрі тереңдете түсу қажет. Осы мақсатта Елбасы кітапханасы ҚР Сыртқы істер министрлігі және ҚР Тұңғыш Президенті мұражайымен бірлесе бас қаланың даму болашағын ойластырды. Іргелі жиынға әлемнің 20 елінен білгір саясаткерлер мен белді сарапшыларды шақырды.

Бейбітшілік – береке бастауы. Қазақстан сыртқы саясатта бітімгерлікке ден қойған. Тартысқан елде табыс жоқ. Қырқысқан елде қауіп көп. Әлемде тыныштық орнау үшін ресми Астана қырғи-қабақ жұртты ымыраға шақырып, келісім алаңынан ұсына бермек.

Рамзи Еззельдин, БҰҰ Бас хатшысының Сирия жөніндегі арнайы өкілінің орынбасары:

- Сириядағы жағдайдың күрделілігіне қарамастан Астана процесінде жетістік жетерлік. Өткен мамыр айында Сириядағы өлім-жітім 2011 жылдан бергі ең төменгі көрсеткішке жеткен. Бұл Астана процесінің арқасында жүзеге асты. Қазақстанның тараптарға алаң ұсынуы нәтижесінде деэскалация аймағы құрылып, минадан тазарту, тұтқындарды беру жұмыстарына қол жеткізілді. Сондықтан Астана процесі Женева процесін нығайтуда үлкен рөл атқарады.

Жиында жаһандық қауіпсіздік турасында ой қозғаған сарапшылар Астананы терроризм жайлаған Африка мен қырық бөлінуге шақ қалған Ливияға көппен бірге қол созуға шақырды. Ол үшін 2010 жылы Астанада өткен ЕЫҚҰ-да қабылданған Астана декларациясының шеңберін кеңейту қажет.

Франко Фраттини, ЕҚЫҰ Преднестровье шиеленісін реттеу бойынша арнайы өкілі /2008-2011/:

- 2010 жылғы Астана декларациясы – халықаралық қауіпсіздік үшін маңызды құжат. Қазір Астана декларациясын жаһандық қауіпсіздік жөніндегі оңтүстіктік бағытқа интеграциялауға кез келді. Таяу Шығыс, Жерорта теңізі мен Африкаға назар аудару қажет. Бұл біздің қауіпсіздігіміз үшін маңызды фактор. Сондай-ақ Араб көктемінен кейін, 2011-2012 жылдардан кейінгі жағдайды ескеру қажет. Сирия, Ливия, Йемен, Африка елдеріндегі терроризмнің таралуы да қаперімізде болуы керек. Менің ойымша, осы ретте Астана да бейбітшілік пен қауіпсіздікті нығайтудағы көшбасшы рөлін жалғастыра алады.

Ресми Астананың бейбіт ұстанымдары ғаламдағы қауіпсіздік пен тұрақтылыққа үн қосса, географиялық тиімді орналасуы сауда-экономикалық байланысты бекемдеуге мүмкіндік береді. Әсіресе іргедегі Қытайдың алты құрлықты қамтитын ауқымды «Жібек жолы» жобасынан Қазақстанның ұтары көп. Бір белдеу Еуропа елдерімен алыс-берісті еселей түспек.

Питер Буриан, Еуропа Одағының Орталық Азия бойынша арнайы өкілі:

- Еуроодақ Азия мен Еуропаны байланыстыруда үлкен күшке ие. Қазір біз ынтымақтастық стратегиясын дамытып жатырмыз. Біз аймақтың дамуына үлес қосу үшін инвестиция мен жаңа технологияларды енгізуді жөн санадық. Байланысты нығайту тұрғысында Орталық Азия өте маңызды. Сондықтан Қазақстан Еуропа мен Орталық Азия арасында байланысты тереңдетуде маңызды рөл атқаратынына сенемін.

Әлемнің 20 елінен жиналған саясаткерлер мен сарапшылар Қазақстанның аймақтағы рөлі мен жаһандағы ұстанымдарына жоғары баға берді. Астананы 20 жылдық мерейтойымен құттықтады. Жиын соңында қатысушылар өз елдерінде бейбітшілік доктринасын ұстау жөнінде үндеу қабылдады. Конференцияда шаһардың қаржы, сауда және көлік инновациялық хаб ретіндегі даму жайы да сөз болды.

Авторы: Гүлназ Қабидоллақызы

Алматыда елорданың 20 жылдығына арналған халықаралық конференция өтті

    Сейсенбі, 05 Маусым 2018 19:08

Астана – Еуразия жүрегі. Алматыда елордамыздың 20 жылдық мерейтойына арналған халықаралық ғылыми-тәжірибелік конференция өтті. Іс-шараға қатысқан ғалымдар Астана қаласының ел тарихындағы алатын орны мен мән-мағынасы жайында әңгіме өрбітті.

20 жылдың ішінде Астана қаласы қазақ халқының мақтанышына айналды. Жылдан жылға сәніне сән қосылып, сәулеті ажарланып келеді. «Еліміздің саяси, мәдени және ғылыми орталығы болып қалыптасты», – дейді ғалымдар. Бұл күнде Астананы дүние жүзі біледі десек, артық айтқандық емес.

Зиябек Қабылдинов, Ш.Уәлиханов атындағы Тарих және этнология институтының директоры:

- 20 жылдың ішінде Астана әлемнің мықты саяси алаңына айналды. Осында 2010 жылы ОБСЕ саммиті өтті. Өткен жылы ЭКСПО-2017 де осында өтті. Дүниежүзілік діндер съезінің өтетін жері де осы Астана.

Абдуақап Қара, Мимар Синан атындағы Өнер университетінің профессоры /Түркия/:

- Астанаға алғаш 2005 жылы, сол Дүние жүзі қазақтары құрылтайында келдім. Оған дейін Астана туралы көп естідік. Бұл шаһарды Еуразияның кіндігіндегі бой көтерген мәдени және заманауи қала деп газеттен көп естідік. Көзбен көрген басқа әрине. Бүгін Астана мен Елбасы егіз ұғымдар.