Қызылордада мұрағат құжаттары мен кітаптар электронды нұсқаға көшірілді

    Сәрсенбі, 31 Қаңтар 2018 23:00

Қызылордада «электронды архив» және «электронды кітапхана» жүйесі ілгері басып келеді.

Бүгінде облыстық мұрағаттағы 1 миллион 600 мың қағаз құжат сандық жүйеге енгізілген. Мұндай серпін кітапхана қорларын цифрландыру бағытында айқын байқалады. Ауылдық кітапханаларда онлайн-орталық жобасы іске қосылды. Инновация игілігін архив ісінде көріп отырмыз. Мұрағат мәліметтеріне қол жеткізу ісі де уақыт талабына бейімделіп келеді. Озық технологиялар тарихи-рухани құндылықтарды сақтау, қаттау жұмыстарын жеңілдетіп, уақыт үнемдейді. Мәселен, XIII ғасырдағы Құран кітабын немесе XIX ғасырдың басында шыққан «Қазақ» газетін табу үшін сөре араламай, онлайн режимде тапсырыс беруге болады.

Нұржамал Мырзамұратова, облыстық әмбебап ғылыми кітапхана директоры:

-Облыс кітапханаларында 4590 басылым, бұл миллионға жуық бетті құрайды цифрлық форматқа көшірілген. Біздің облыстық кітапхананы алатын болсақ, бұл кітапхананың сирек кітаптар қоры. Сонымен бірге өлкетану бағытындағы әдебиеттер, облыстық, аудандық газеттер.

Атырауда қазақтың ұлттық аспабы домбыраны дәріптейтін танымдық кеш өтті

    Сәрсенбі, 31 Қаңтар 2018 22:45

Домбыра. «Жан серігі қазақтың...». Атырау тарихи-өлкетану музейінде өткен танымдық кеш осылай аталды. Шараның мақсаты - ұлтымызбен бірге жасасып келе жатқан осы бір көне аспаптың қыр-сырын ашып, жас ұрпақ санасына күй өнері мен дәулескер домбырашылардың өмір жолынан мол мағлұмат беру.  «Рухани жаңғыру» бағдарламасы аясында қолға алынған шараға жиналғандар домбыра шанағынан төгілген сазбен сусындады.

«Халық қаһарманы-ұлы сазгер Нұрғиса Тілендиевтің күй аспабы, көзі тірісінде күй қағаны атанған Рысбай Ғабдиевтің, қазақ күй өнерінің мақтанышы, сазгер Қаршыға Ахмедьяровтың домбырасы. Бұл аспаптардың әрқайсысының өзіндік тарихы бар. Бір кезде дәулескер домбырашылар мен өнер тарландарының жан серігі болған қара домбыра бүгін міне, жас ұрпақтың қолында саз төгуде.

Жанарыс Оспан, Атырау музыка колледжінің студенті:

-Ол кісілердің домыбарсында ойнау біздер, жас буын үшін үлкен өнеге деп білемін. Бізге, жастарға осындай мағұлмат беретін кітаптар көбейіп шыға берсе екен деп тілеймін.

Домбыра аспабы осыдан шамамен 4 мың жылдай бұрын неолит дәуірінде пайда болған дейді ғалымдар. Қалай дегенмен де,  қасиетті аспаптың халқымызбен бірге жасасып, арыз-арманы мен мұң-тілегін ғасырдан-ғасырларға жалғастырып келе жатқаны анық.  

Өтепберген Әлімгерейұлы, өлкетанушы ғалым:

-Домбыра сонау көне заманнан бері Кетбұқаның дәуірінен есептесек те, онан кейінгі Асанқайғы дәуірінен есептесек те, қалай десек те, Әйтеуір ғасырдан ғасырға ұласып, бізге жалғасып келе жатыр.

Бүгінгі көрмеде күй атасы Құрманғазының, дауылпаз ақын Махамбет Өтемісұлының домбыраларының көшірмелері болды. Ал мынау күйші-сазгер Дина әжемізден қалған жәдігер.

Рашида Харипова, облыстық тарихи-өлкетану музейінің директоры:

-Дина әжеміздің өзінің саусақтарының ізі қалған, «Байжұма», «Он алтыншы жыл», «Тойбастар» күйлерін мәнеріне келтіріп тартып, әжемізге «ғасыр саңлағы» атағын алып берген қасиетті қара домбырасының біздің музейімізде сақталуы біз үшін үлкен мақтаныш!

Бүгінгі көрмеге 60-қа тарта домбыра қойылды. Әрбір саз аспабының тұсында оның егесі мен шығармашылығы туралы мағлұмат жазылған.  Күй аспабына деген құрмет мұнайлы өңірде келешекте де жалғасын таппақ. Бүгінгі көрменің заңды жалғасы ретінде музей жанынан «Домбыра орталығы» ашылады деп күтілуде.

Авторлары: Арыстанбек Кенже, Темірлан Сұлтанғазиев, Амантай Мәтенов

Павлодарда стартап байқауына 400-ге жуық жоба тапсырылды

    Сәрсенбі, 31 Қаңтар 2018 22:23

Елімізде жас кәсіпкерлерді қолдау мақсатын көздеген «Менің арманым» стартап жобалар байқауы Павлодар облысынан бастау алды. Таңдау бұл өңірге жайдан-жай түскен жоқ. Себеп біреу – Ертіс өңірінде екі жыл бұрын ашылған халықаралық стартап академиясының табысты жұмысы. Бір аптаның ішінде бағын сынауға ниет білдірген жастар 400-ге жуық жоба тапсырған.

Екі мыңнан астам павлодарлық студент мемлекеттік университет жанындағы халықаралық стартап академиясының түлегі атанған. Данияр Байғазы кәсіпкерлік негіздерін меңгергендердің бірі. Физика-математика факультетінің студенті «ai clutch» (ай клатч) Ай Ти жобасын ұсынған. Құрылғы ұялы телефонды сымсыз әп-сәтте қуаттайды.

Данияр Байғазы, байқау қатысушысы:

-Құрылғы телефонды қашықтықтан қуаттайды. Төл жобаммен жергілікті деңгейдегі байқауда 200 мың теңге ұтып алдым. Қазіргі уақытта бизнес-идеям жетілдірілу үстінде. Бірнеше құрылғыны сатып та үлгердім. Қоржынымда тағы екі озық жоба бар. Бұл әзірге құпия. Қолдау барда, нәпақа табуға мүмкіндік зор.

Ал Динара Әбжанова бір апта бұрын фотосуреттерді шығару қызметін іске қосты. Ерекшелігі сол, суреттер тегін басылып, тапсырыс берушінің үйіне тегін жеткізіледі. Күніне 50-ден астам тапсырыс түседі. Жоба қарапайым, десе де, қаржы табуға болатынын дәлелдеген. Кәсіпкер фотоларға жарнама берушілердің хабарламаларын қоса басып береді.

Дилара Әбжанова, байқау қатысушысы:

-Павлодарда осы тектес қызмет жоқ. Тұтынушылар сайтқа фотоларын жүктеп, тапсырыс береді. Бүгінгі күні арнайы сайтқа екі мыңнан астам қолданушы тіркелген. Жарнама берушілердің қатары да артуда. Бұл жобаны жарнама таратудың оңтайлы жолы деп білемін.

Бұдан бөлек сусамыр ауруына шалдыққандарға арналған өнімдер, полиуретаннан жасалған автомобиль бөлшектері, түрлі қызметтерге ғаламтор арқылы тапсырыс беру бойынша жобалар бар.

Ақмарал Есімханова, тілші:

-Ертіс өңірінен бастау алған стартап-байқауына өтініштерді қабылдау бүгін ресми түрде жабылды. Бір аптаның ішінде 400-ге жуық жоба қабылданды. Алдағы уақытта арнайы құрылған комиссия үздік жобаларды іріктеп, республикалық деңгейдегі конкурсқа жолдайды.

Петр Быков, С.Торайғыров атындағы ПМУ проректоры:

-Жобалардың дені ауыл шаруашылығы, коммуналдық қызмет, құрылыс, сандық технология салаларына тиесілі. Бас-аяғы үздік 40 жобаны таңдаймыз. Байқауымыз жастар арасында жастар кәсіпкерлігін дамытуды көздейді. Осы арқылы Елбасы Жолдауындағы міндеттерді де орындаймыз.

Бүгінде 200-ден астам жас азамат бизнестерін дөңгелетуде. Жергілікті стартап академиясы сарапқа салған құны 124 млн теңге болатын 48 жоба инвесторларға сатылған. Нәтижесінде 60 жұмыс орны ашылып, 10 млн. теңге көлемінде салық төленген.

Авторлары: Ақмарал Есімханова, Марат Игіліков және Алексей Омельницкий

ҚР ҰҒА-да ғылым жүйесін дамыту жолдары талқыланды

    Сәрсенбі, 31 Қаңтар 2018 22:03

Бүгінде отандық ғылымдағы жетістіктер аз емес. Десек те ғаламдық технологиялық ілгерілеу кезеңіне сай үнемі іздену қажет.

Елбасы Жолдауында «ақылды» және «сандық» технологияға басымдық берілуі де сол себеппен болып отыр. Ұлттық ғылым академиясында мамандар ғылымның әлеуеті, тың зерттеулерді қаржыландыру, ғылыми жүйені дамыту жолдарын талқылады. Академияда ақпараттық технология институты жұмыс істейді. Онда әлем орталықтарымен бірге сандық платформада зерттеу жүргізуге мүмкіндік бар. Америка, Жапония, Еуропа елдері патенттерін иеленген ғалымдарымыз бар. Ғылым мен өндіріс байланысы артуда. Мамандар мұнай өңдеу зауыттарында құрамында ауыр металл бар суды тазарту әдісін енгізді. 

Мұрат Жұрынов, ҚР ҰҒА Президенті:

-Біздің ұлттық ғылым академиясының бір журналы қазір «СКОПУС-қа» кірді. Дүниежүзілік база. 5 журналымыз соның ең соңғы 10-шы сатысында тұр. Ол да кіреді. Бұл журналдарды біз 73 мемлекетке таратамыз. Сонда біз қазақстанда ғылым саласында не болып жатыр соның бәрін бүкіл дүние жүзі біліп отырады.

Ғалымқайыр Мұтанов, ҚазҰУ ректоры:

-Экономиканы диверсификациялау мәселесі талай жылдан бері көтеріліп келе жатыр,  қазіргі үлкен жақсы мүмкіндік мына цифрлық технологияларды тезірек меңгеріп, сол бағытта барлық экономиканың өндірістің жалпы еліміздің басты-басты бағыттарына осы цифрлық технологияларды енгізетін болсақ, онда жаңа сатыға, жаңа сапаға еліміздің дамуын көтереді деген біз толық сенімдеміз.