21:30 Әрі қарай эфирде: «Экспорт интеграции. Экономический пояс Шелкового пути» документальный фильм
+7 (7172) 757 540
astananews@khabar.kz

Үздік дәрігерлерге «Алтын шипагер» сыйақысы табысталды

    Бейсенбі, 14 Маусым 2018 19:10

Бүгін Астанада ақ халатты абзал жандарға арнайы алғашқы «Алтын шипагер» премиясы табысталды.

Үздік эпидемиолог, үздік жедел жәрдем бригадасы, мамандығына адалдық секілді 10 аталым бойынша жеңімпаздардың әрқайсысына 1 млн теңге көлемінде қаржылай сыйлық берілді.

Сыйға берілген «Алтын шипагер» мүсіншесі алтын Канн сыйлығындағыдай пальма бұтағынан және лавр жапырағынан жасалған. Лавр денсаулық пен ұзақ ғұмыр нышаны екені белгілі. Тағы бір қуанышты жаңалық, медицина қызметкерлерінің төл мерекесі қарсаңында Астана қаласының әкімі Әсет Исекешев 6 бірдей маманға баспана кілтін табыстады. «Жылдың үздік дәрігері» номинациясында «Алтын шипагер» премиясын жеңіп алған қызметкер де қала әкімінің қолынан марапат алды.

Гүлмира Мұхамадиева, №1 қалалық аурухана орталығының меңгерушісі, «Жыл дәрігері» номинациясының жеңімпазы:

-Шынын айтқанда, өзім сыйақы алатынымды ойлаған жоқпын. Бәріне де тілейтінім, осындай дәрежеге жетсін. Дәрігер болу деген өте қиын. Күні-түні жұмыс істейтін адамдар да бар. 1992 жылы Целиноград медициналық университетін бітіргеннен кейін 25 жыл болды сол бір жерде жұмыс істейміз.

Елорданың 20 жылдығына орай ел ішіндегі 20 шың бағындырылады

    Сәрсенбі, 13 Маусым 2018 19:23

Астананың 20 жылдығына орай танымал альпинистер ел аумағындағы ең биік 20 шыңды бағындырады. Бұл шара «Қазақстанның сакралды географиясы» жобасы аясында жүзеге асады. Мәдениет және спорт министрлігі өкілдері: «Экспедиция құрамында Мақсұт Жұмаев, Бағлан Жүнісов және Артем Скопин секілді белгілі альпинистер болады», – дейді.

Тізімде танымал блогерлер мен БАҚ өкілдері де бар. Қатысушылар Қазақстанның ең биік шыңы саналатын 7 010 метрлік Хан тәңірін де бағындырмақ.

Рашид Күзембаев, «Kazakh tourism» ұлттық компаниясының басқарма төрағасы:

- Ішкі және сыртқы туризмді әрі қарай дамыту үшін Президент тапсырмасымен «Қазақстанның сакралды географиясы» жобасы жүзеге асып жатыр. Оның аясында арнайы карта әзірледік. Атап өткен шыңдардың барлығы оған енгізілген. Жалпы әр қазақстандық отбасының табиғат аясында және тарихи-мәдени аймақтарда аралайтын кем дегенде он шақты орны болуы керек. Біз қазір жобаның алғашқы кезеңін ғана жүзеге асырып жатырмыз. Жақын уақытта туристер мен өз отандастырымыздың демалып, тамашалайтын сакралды мекендердің тізімі ұлғая береді.

«Самғау» халықаралық фестиваліне 13 театр қатысып жатыр

    Сәрсенбі, 13 Маусым 2018 19:10

Қазір Астанада елорда мәдениетінің айнасына айналып үлгерген «Самғау» халықаралық театр фестивалі өтіп жатыр. Биыл бұл шара қаламыздың 20 жылдық мерейтойына орайластырылды. Оған Түркия, Грузия, Қырғызстан, Өзбекстан және Башқұртстан елдерінен театр ұжымдары келіп, өнерлерін ортаға салуда.

Театр өнерінде актер сахнада өзін еркін ұстап, ойнаған рөлін дәл сомдаудан бөлек, қимыл-қозғалыс шеберлігі мен ептілік, икемділікті де бағындыруы тиіс. Қазақ ұлттық өнер академиясының оқытушылары Қырғызстан, Өзбекстан, Татарстан елдерінен келген актерларға шеберлік сағаттарын өткізуде.

Қала әкімдігі ұйымдастырған «Самғау» халықаралық театрлар фестиваліне 12 театр ұжымы қатысып отыр.

Мұрат Әбзелбаев, Т.Жүргенов атындағы Қазақ ұлттық өнер академиясының профессоры, оқытушысы:

-Бұл фестивальға «Жастар» театрының актерлары қатысуда. Қазылар алқасы өте жақсы баға берді. Бұларды біз 1-курстан бастап өзіміз тәрбиелегенбіз. Жалпы шыдамдылыққа, кез келген кедергіні жеңе білуге, сахнада қандай қозғалыс болсын, шашылып қалмай қасындағы серіктесіне, тыңдаушыға толық жеткізе білу жолында еңбек етілген.

Жалынбек Ахан, Т.Жүргенов атындағы Қазақ ұлттық өнер академиясының оқытушысы:

-Негізгі беретін пәнім – «Сахна сайысы» деп аталады. Бұл актерларға тікелей қажетті пән. Бұл құлауға, жығылуға, бірін-бірі ұрған кезде мертіктіріп алмауға, кез келген декорациядан секірген кезде дене мүшесіне зақым, зиян келтірмеуге жауап беретін бірден-бір пән.

Фестивальға жиналған шетелдік өнер иелері қазақ театры мектебінің деңгейін жоғары бағалап отыр. Қырғыз ұжымы астаналықтардың назарына «Қорқыт ата» спектаклін ұсынды.

«Самғау» фестивалі осымен 6 жыл ұйымдастырылып отыр. Оған биыл да әдеттегідей тек Астана, Алматы ғана емес, басқа өңірлерден шығармашылық ұжым жиылды. Алыс-жақын шетелдік өнерпаздардың шақырылуы да шараның географиялық ауқымын ғана емес, мән-маңызын, мазмұнын байыта түспек.

Жеңіш Хангелдиев, Қырғыз ұлтты академиялық драма театрының актері:

-Астана шахарының 20 жылдығымен Қазақ елін жалпы құттықтағым келеді. Мейрамдар көп болып тұрсын, шығармашылықтар, игіліктер көп болсын. Игілікті болады деп ойлаймыз.

Апта соңында халықаралық фестиваль жұмысын қорытындылайды. Үздік қойылым, үздік режиссер секілді бірнеше номинация бойынша жеңімпаздар анықталады. Бас жүлдеге қомақты қаржылай сыйлық табысталмақ.

Авторлары: Индира Жылқайдарова, Аманжол Байғазин

Оңтүстікқазақстандық фермер Астананың туған күніне 90 мың тал гүл тарту етпек

    Сейсенбі, 12 Маусым 2018 19:19

Астана гүлге оранады. Оңтүстікқазақстандық фермер Астананың туған күніне 90 мың тал гүл тарту етпек. Оқтам Әбдірасыл жылыжайда жылына бір миллионға жуық гүл өсіріп шығарады. 50-ге жуық түспен боялған, көздің жауын алатын 10 түрлі гүл былтыр халықаралық ЭКСПО көрмесінің кезінде Астананың көркіне көрік қосқан еді.

Өскемен, Талдықорған, Алматының көшелеріне де егіледі. Биыл тұңғыш рет Қырғызстанға экспортқа жіберілді. Фермер бір жылдан соң Ресей нарығына шығуды жоспарлап отыр. Ал Астананың мерейтойына арналған 90 мың гүл тиеген көлік таяу күндері жолға шығады.

Оқтам Әбдірасылов, фермер:

- Сыйлықтарды жасай береміз. Біздің гүлдер Астанамыздың тұрғындарын, қонақтарын қуантып, адамдарға қуаныш сыйлап жатқанын көріп, мен де қуандым.