+7 (7172) 757 540
astananews@khabar.kz

Қазақстандағы ахуал

26 Маусым 2022

  • Бүлік кезінде сарбаз бен сәбидің сәлемдескен фотосы қайда түсірілгені анықталды

    Әскери қызметкер мен бүлдіршіннің сәлемдескен суреті әлеуметтік желіде кең тарап, ел назарын аударды. Кейіннен көпті елжіреткен фото Шымкентте түсірілгені белгілі болды.

    Әлеуметтік желіде жаппай тараған фотосурет жергілікті телеарна операторының сәтті кадры еді. Кейін қырағы камераның бейнетаспасындағы видеоны әлдекімдер суретке түсіріп алып, желіге жүктеп жіберген. Қалалық әкімдік маңын күзетіп тұрған қарулы сарбазға сәлем берген 2,5 жастағы Әлихан есімді бала. Әкесі сол күні ұлын ертіп, таза ауамен тыныстауға шыққан.

    Аманбай Спаналиев, қала тұрғыны:

    - Балам ашық жерге келгеннен ба қуанып, жүгіріп жүріп 2-3 военныймен амандасты. Бізді суретке түсіргенін байқамаппыз. Ондай тарап кететінін де ойламадық. Ұлыммен әскери адамның суреті музыкамен әсерлеген кезде көп адамға дем берді деп ойлаймын. Қаймығып отырған халықтың еңсесі көтерілді деп ойлаймын.

    Ал баламен қол алысып, көпшіліктің оң ықыласына бөленген сарбаздың аты-жөні Шахрух Хасанов. 31 жастағы ефрейтор "Оңтүстік" өңірлік қолбасшылығына қарасты № 66 98 әскери бөлімінде қызмет етеді. Қаңтардың 4-і мен 9-ы аралығында әкімдік аумағын бүлікшілерден қорғауға жұмылдырылған. Өзі екі ұлды тәрбиелеп отырған Түркістан облысы Төлеби ауданының тұрғыны.

    Шахрух Хасанов, №6698 әскери бөлімінің ефрейторы:

    - Қызмет атқару барысында азанда сағат 11-12-лер шамасында жас бала келіп сол жерде әкесімен айналып жүрген. Ол күнде сол жерде ойнап жүрген бала. Тыныштық болмағаннан кейін үш-төрт күн үйінде отырған. Сөйтіп, ол бала бізді күнде қару-жарақпен бұлай тұрғанымызды көрмегеннен кейін жүрек жұтып адамдар арасынан жүгіріп келіп қолын созғаннан кейін мен де жүрегім езіліп, жас баланың қолын қайтармай амандастым.

    «Патриоттық сезімге толы фото». Желі қолданушылары суретті осылай деп бағалап, сарбазға ыстық ықыласын білдіріп жатыр. Оның кішкентай бүлдіршінге деген құрметін бейбітшіліктің нышанына балайды.

    Нұрсұлтан Мұхамеджан, Самат Нағашбекұлы, Нұрмахан Бекмұратов

  • Елімізден ҰҚШҰ Ұжымдық бітімгершілік күштерінің бөлімшелерін шығару аяқталды

    Алматы қаласының әуежайынан 2022 жылғы 19 қаңтарда Ресей Федерациясы Әуе-ғарыш күштерінің Ил-76 ұшақ бортымен соңғы бітімгерлер кетті.

    Қазақстан Президенті 2022 жылдың 5 қаңтарында Ұжымдық қауіпсіздік туралы шарт ұйымына мүше мемлекеттерге республикадағы жағдайды тұрақтандыруға жәрдемдесу үшін бітімгершілік күштерді жіберуге өтініш білдірген болатын. Қысқа мерзімде елге Армения, Беларусь, Қырғызстан, Ресей мен Тәжікстаннан жалпы саны 2030 астам әскери қызметші және 250 бірлік техникамен бітімгершілік контингенттері жіберілді.

    ҚР Қорғаныс министрлігінің мәліметінше, контингенттер стратегиялық маңызды, оның ішінде азаматтардың тыныс-тіршілігін қамтамасыз ететін объектілерді күзету міндеттерін орындады. Аталған шаралар терроризмге қарсы операцияны тікелей жүргізу үшін қазақстандық күштер мен құралдардың едәуір бөлігін босатуға мүмкіндік берді.

    – Қазақстанда ҰҚШҰ-ның бітімгершілік әлеуетін өрістету уақтылы әрі тиімді болды. Іс жүзінде ведомствоаралық және мемлекетаралық өзара іс-қимыл тетіктері пысықталды. Бұл операция көпжылдық ынтымақтастық барысында жасалған тетіктерді іс жүзінде қолданудың мысалы ғана емес, сонымен бірге одақтас мемлекеттердің жауынгерлік бауырластығы мен рухының нақты дәлелі ретінде ұйымның тарихында қалады, – деді Қорғаныс министрлігі Халықаралық ынтымақтастық департаментінің бастығы полковник Олжас Құсайынов.

    2022 жылғы 11 қаңтарда Қазақстан Республикасының Президенті Парламент Мәжілісінің отырысында сөйлеген сөзінде ҰҚШҰ бітімгершілік күштерінің негізгі миссиясы аяқталғанын атап өтті. Әскери контингенттерді 13 қаңтардан бастап кезең-кезеңімен шығару жүргізілді. Бүгінгі күні бұрын келген бүкіл әскери контингент толық шығарылды.

  • Қақтығыста қаза тапқан тәртіп сақшысының есімі ел есінде мәңгі сақталады

    Қарулы топпен қақтығыста қаза тапқан боздақтардың есімі ұмытылмайды. Туған елдің тыныштығы мен қоғамдық тәртіпті сақтау жолында мерт болғандардың бірі талдықорғандық полиция лейтенанты Дархан Барғанаев еді. Артында аңырап анасы, егізі мен жары, екі қызы қалды.

    Дархан Барғанаев әл-Фараби атындағы Қазақ Ұлттық университиті, заң факультетінің 2010 жылғы түлегі. Талдықорған заң колледжін бітірген ол, Алматыдағы аталған қасиетті қара шаңырақтың күндізгі, кейіннен сырттай бөлімінде білім алды. Полиция қызметкері болу оның бала күннен бергі арманы еді. Шығыс Қазақстан облысында Отан алдындағы азаматтық борышын өтеп келген соң Алматы облыстық ішкі істер басқармасына жұмысқа орналасады. Полиция лейтенанты соңғы екі жылда өңірлік департаменттің шұғыл әрекет ету жасағында қызмет етті. Мұздай қаруланған лаңкестер шабуыл жасаған күні Дархан қалалық ішкі істер басқармасында болған. Сол жерде Отанға адал қызмет етудің үлгісін көрсетіп, ерлікпен қаза тапты. 

    Рәзия Үмітжанова, Д. Барғанаевтың анасы:

    - Мемлекет тарапынан келіп көңіл айтып жатыр. Зиратының басын тұрғызып береміз деп, бірге істейтін жігіттері қамқорлық жасап жатыр бізге, рақмет! Халқыма, еліме рақмет! Ешкімге осындай, баладан ата-анаға сынақ келмесін! 

    Дәрия Барғанаева, Д. Барғанаевтың сыңары:

    - Өзі аққкөңіл, бәріміздің көңілімізді табатын, айтқан сөзімізді жерге тастамайтын адал адам болатын. Полиция қызметкері боламын деп өзі армандайтын.

    Полиция лейтенанты жаңа жылды да өз отбасымен бірге қарсы ала алмады. Алматы іргесінде іссапарда болып, 5 қаңтарда арнайы бұйрықпен Талдықорғанға кері қайтарылған. 

    Жансая Барғанаева, Д. Барғанаевтың зайыбы:

    - Дархан Қапшағайдан келіп, осында бір қонып кетті ғой, 6-сында кетті. Сол кезде мына жерде кішкентай 3 жасар қызы «әке, кетпеші, әке, кетпеші» деп, періште сезгендей әйтеуір аяғына оратылып, «жұмысқа кетіп бара жатырмын енді» деп, әкесі жұмысқа кетті ғой енді. Қазір әкең қайда? - десе, - Әкем жұмыста, - дейді...

    Дархан Барғанаевтың үлкен қызы Раяна 3,5 жаста. Ал Айсафиі 2-де. Екеуі де қақпа ашылса елеңдесіп, әкеміз жұмыстан келді екен деп, есікке қарай жүгіреді. Фотоальбомдағы суреттерден асқар таудай әке бейнесін көрген бүлдіршіннің «әкелеген» дауысын естігенде сай-сүйегің сырқырайды. 

    Дархан Барғанаевтың анасына жақында II дәрежелі «Айбын» ордені салтанатты түрде табыс етіледі. Жергілікті атқарушы билік тарапынан батырдың отбасына пәтер де беріледі...

    Ардақ Айбарұлы, Олжас Байбосынов

  • Бас мүфти қайғылы оқиғадан қаза тапқандардың отбасына барды

    ҚМДБ Төрағасы, Бас мүфти Наурызбай қажы Тағанұлы Алматыдағы қайғылы оқиға кезінде қаза тапқан азаматтардың отбасына арнайы барып, көңіл айтты. Қаралы үйге Құран бағыштап, туған-туысты сабырға шақырды. Бұл туралы Қазақстан Мұсылмандары Діни басқармасының ресми сайты хабарлады.

    «Қазақ мұндайда «тас түскен жеріне ауыр» деген. Әрине ет жақыныңнан айырылу оңай емес. Сіздерге Алладан көркем сабыр тілейміз. Қасиетті Құранда қиындықтан соң, бір жақсылықтың келетіні айтылған. Сынаққа сынбай, сабыр етсеңіздер, Жаратқанның пендесіне берер сыйы мол. Алла Тағала марқұмдардың жанын жәннаттық етсін!» деп жарылқау тіледі ҚМДБ Төрағасы.

  • Құқық қорғау өкілдерінің әрекетіне байланысты қоғам белсенділерінен 21 арыз түсті

    Олардың 18-і жаппай бүлік кезінде ұсталғандар қамалған мекеме мен изоляторларды тексеру кезінде анықталды.

    Қоғам белсенділері тұтқындалғандардың құқықтары сақталуын тексеруді жалғастырып жатыр. Олар ішкі істер органдары мен прокуратурамен бірлесіп осы бағытта жұмыс істейді. Қазақстанда төтенше жағдай кезінде үш мыңнан астам адам ұсталды.

    Эльвира Әзімова,  ҚР Адам құқықтары жөніндегі уәкіл:

    - Бұл күндері біз азаматтық қоғам өкілдерімен бірге ұсталғандар орналасқан мекемелерге баруды жалғастырып жатырмыз. Бірнеше күн ішінде біз 11 өңірде осындай 34 мекемеге бардық. Мұндай превентивті баруды жалғастырамыз. Себебі бізге де ол керек. Сондықтан прокуратура қатыгездік туралы барлық сигналдарды тексеріп, оларға құқықтық баға беру керек және берілген нәтижесін жариялауы керек. Бұл жұмысты формалды түрде жүргізбеу керек, мұндай тәсіл ашықтық пен бейтараптық кепілі болып табылады.

  • Жаппай тәртіпсіздік: елдің инвестициялық тартымдылығына да қауіп төндіруі мүмкін

    Түрлі есеп бойынша қаңтар оқиғаларынан кейін Қазақстан экономикасына келтірілген шығын 2 жарым миллиард долларға жетуі мүмкін, деп хабарлайды Хабар 24.

    Сондай-ақ елдің инвестициялық тартымдылығының төмендеу қаупі бар. Бұл да экономикаға кері әсер ететін фактор. Осыған байланысты Қазақстанның шетелдегі дипломатиялық өкілдіктері әлемдік қауымдастыққа елдегі ахуалға қатысты толық әрі шынайы ақпарат берумен айналысып жатыр. Қазақстандағы қаңтар оқиғасы жайында шетелдік бұқаралық ақпарат құралдары жарыса жазып жатыр. Әлеуметтік желілердің де айдарынан жел есіп тұр. Шындыққа жанаспайтын ақпарат тараған кездер де болды.

    Абзал Сапарбекұлы, Қазақстанның Түркиядағы елшісі:

    – Сұйытылған газдың қымбаттауына байланысты басталған бейбіт шеруге Алматыда террористік-диструктивтік әрекеттер көлеңке түсірді. Үлкен трагедиялық дағдарыс Президенттің батыл жігерінің топтасуының арқасында мемлекеттілігіміз қорғап қалынды. Ірі апаттың алды алынды. Еліміз осындай жағдаймен арпалысып жатқан тұста, алғашқы сәттен бастап Түрік билігі мен халқы Қазақстан мемлекетінің қасында екенін мәлімдеп, кез келген қолдауды көрсететін жеткізгенім үшін баршаңызға ризашылығымды білдіремін.

    Қазақстандық дипломаттар әлемдік қауымдастыққа ел билігінің шешімдерін, соның ішінде Ұжымдық қауіпсіздік туралы шарт ұйымының бітімгерлерін кіргізудің қажеттігін түсіндіріп, болып жатқан оқиғаларға қатысты нақты дәлел-дәйектер келтіріп жатыр.

    Бұл Қазақстан Президентінің халықаралық ынтымақтастық жөніндегі арнайы өкілі Ержан Қазыханның СиЭнЭн телеарнасының эфирінде тілшілердің сұрағына жауап беріп жатқан сәті.   

    Ержан Қазыхан, ҚР Президенті әкімшілігі басшысының орынбасары:

    – Оқиғаларды тергеумен айналысатын мемлекеттік комиссия құрылды. Алдағы уақытта халықаралық серіктестеріміз және әлемдік қауымдастықпен комиссия жұмысының нәтижелерімен бөлісетін боламыз. Қазір нақты бір затты айта аламыз. іштен де, сырттан да келген лаңкестік топтар болды. Олар қаруланған, дайындықтан өткен. Ірі қалаларда билікті басып алуды көздеген. 

    Бұл күндері Қазақстан елшілері республикамыздағы ахуалға қатысты әлемнің түрлі телеарналарына сұхбат беріп, жиындар өткізіп, оқиғаның шынайы жай-жапсарын түсіндіріп жүр.

    Әлеуметтік желілердегі ресми парақшаларда жазбалар, суреттер мен бейнедеректер жариялады. Ал Сыртқы істер министрлігі Қазақстандағы шетелдік дипломатиялық өкілдік қызметкерлерінің сұрақтарына жауап беріп, ақпаратпен бөлісіп жатты.

     Мұхтар ТілеубердІ, ҚР сыртқы істер министрі:

    – Тәуелсіз мемлекетіміздің 30 жылындағы ең ауқымды дағдарысты бастан өткеріп, қайғылы оқиғалардың куәсі болдық. Біз секілді сіздер де Алматы не өзге қалалардағы жақындарыңыздың, әріптестеріңіз бен отандастарыңыздың амандығы үшін алаңдайтындарыңызды жақсы түсінеміз. Шетелдік дипломатиялық миссия өкілдерінің қауіпсіздігін қамтамасыз ету үшін барлық қажетті шара қабылданды.

    Ел басына күн туғанмен, мемлекет өзінің тұтастығын, оның сыртында халықаралық беделін сақтап қала алды. Шетелдік инвесторлардың да алаңдауына еш негіз жоқ. Қазақстанның Сыртқы істер министрлігінің мәліметі бойынша елімізден ешқандай инвестор кеткен жоқ.

    S&P Global өкілдерінің топшылауынша, Қазақстанның несие рейтингі бұрынғы деңгейін сақтап қалуы тиіс. Бұл, әрине, жақсы жаңалық. Алайда Алматыдағы оқиғалар отандық компанияларға деген сенімге нұқсан келтірмей қоймады. Мәселен, Moody’s рейтинг агенттігі 10 қазақстандық банктің қызметін қайта қарастырып жатыр. Осы ретте дипломатиялық өкілдіктер, мемлекеттік аппарат және бүкіл Қазақстан қоғамы алдында Президент жария еткен реформаларды іске асыру, елді әрі қарай дамыту үшін күш біріктіріп, еліміздің беделін қалпына келтіру міндеттері қойылып отыр.  

    Авторлары: Жұлдыз Атагельдиева, Алия Сыздыкова, Айдана Карибжанова, Меруерт Канағат, Руслан Омиржан