Жаңалықтар

Арыс қаласында барлық орган қызметкерлері күшейтілген тәртіпте жұмыс істеуде

  • Read: 34 times
  • Сейсенбі, 25 Маусым 2019 20:17

Үкімет отырысында Арыстағы төтенше жағдай талқыланды.

Жиын барысында ҚР Премьер-Министрі Асқар Мамин тиісті ведомство басшыларына нақты тапсырмалар беріп, зардап шеккен тұрғындарға көмек көрсетуді міндеттеді.

Төтенше жағдай жарияланған Арыста барлық орган қызметкері күшейтілген тәртіпте жұмыс істеуде. Апат салдарынан 165 адам медициналық көмекке жүгініпті. «Жарақат алғандардың дені Шымкент қаласындағы ауруханалар мен Түркістан облысының аудан орталықтарында ем алу үстінде», – дейді ҚР Денсаулық сақтау министрі Елжан Біртанов.

Елжан Біртанов, ҚР Денсаулық сақтау министрі:

- Жан сақтау бөлімдерінде 15 науқас политравма диагноздарымен ем қабылдауда. Медициналық көмек көрсету үшін жалпы 22 жедел медициналық бригада жұмылдырылған. 4 бригада Жамбыл облысынан жіберілген. Қазір қосымша 12 бригада және санитарлық 2 вертолет дайын отыр. Жалпы Алматы қаласынан көмек көрсету үшін 2 мультидисциплинарлық команда жіберілді. Олардың арасына реаниматологтар, травмаотологтар, балалар нейрохирургтары бар. Олар көмек көрсетіп, операция жасады. Қазіргі күні реанимацияда 2 бала бар. Оларға қажетті көмек көрсетілген.

Арыс қаласында болған өрттен 19 тұрғын үй мен 9 ғимарат қираған. Жарылған снарядтар дүмпуінің күштілігі соншалық шаһардағы 60-70% үйлердің терезерелі шытынаған. Оқ-дәрілер сақталған қойманың өрте орану себебін анықтау үшін арнайы комиссия құрылды.

Жеңіс Қасымбек, ҚР Премьер-Министрінің орынбасары:

- Материалдық залалдар туралы деректер комиссияның материалдық залалды бағалау және өтеу жөніндегі сауалнамасының негізінде анықталады. Комиссия жұмысы ҚР Қорғаныс министрлігінің саперлік жұмысы аяқталғаннан кейін басталады. Әкімдік тарапынан өтініш беріліп және тиісті есептеулер жасалғаннан кейін қалпына келтіру жұмыстарына мемлекеттік резервінен құрылыс материалдары бөлінеді.

Премьер-министр Асқар Мамин: «Арыс қаласы қысқа мерзімде қалпына келтіріледі», – деді. Ол үшін Үкімет тарапынан қажетті шаралар шұғыл түрде атқарылатын болады.

Асқар Мамин, ҚР Премьер-Министрі:

- Мемлекет басшысының тапсырысы бойынша үкіметтік комиссия Арыс қаласындағы тұрғын үйлерге әлеуметтік және тіршіліктік қамтамасыз ету нысандарына келтірілген залалды анықтап, жұмыстың қорытындысы бойынша қажетті шешімдер қабылданып, қала қысқа мерзімде қалпына келтіріледі. Үкімет тарапынан қажетті шаралар шұғыл атқарылатын болады. Осы ретте Nur Otan партиясының Арыс тұрғындарына көмек қолын созу мақсатында қаражат жинау бастамасын қолдауға шақырамын.

Жалпы Арыс қаласында орналасқан әскери бөлімде негізінен келісім шарт бойынша қызмет ететіндер мен офицерлер жұмыс істейді екен. Қорғаныс министрінің бірінші орынбасары Мұрат Бектановтың айтуынша, қазір оқиға болған жерде 500 сапер, 50 бірлік техника оқ-дәрілерді залалсыздандыру бойынша жұмыс істеп жатыр. Тағы қосымша 1800 адам снарядтардың қайда ұшқандығын анықтап, оларды залалсыздандыру мен апат салдарын жою үшін жұмылдырылған.

Мұрат Бектанов, ҚР Қорғаныс министрінің бірінші орынбасары:

- Қоймалардың кейбірі елді мекеннен 200 метр жерде орналасқан. Бірақ біздің тәртіп бойынша олар қауіпсіз деген 3 шақырым қашықтықта болуы тиіс. Біз оны 10 шақырымға дейін алыстату жөнінде бірнеше рет өтініш берген едік. Ол үшін тұрғындарды басқа жаққа көшіру керек, оның үстіне 800 метр жерде темір жол рельстері жатыр. Сол себепті бұл қойманы көшіру туралы шешім қабылдадық. Біз 2005 жылдан бері оқ-дәрілерді басқа қоймаларға тасымалдауды бастағанбыз. Алайда қаржыландырудың әлсіздігіне байланысты барлығын тасып үлгермедік.

Риат Шони, тілші:

- Қазір Арыс қаласына кіре берісте 3 бекет орнатылған. ҚР Ішкі істер министрі Ерлан Тұрғымбаевтың айтуынша жарылмаған снарядтар бар. Қауіпсіздік мақсатында шаһарға ешкімді кіргізбей отыр.

Авторлары: Риат Шони, Әлібек Әлиев, Арман Ақшабаев

Арыста эвакуацияланған балалардың барлығы ата-анасымен қауышты

  • Read: 29 times
  • Сейсенбі, 25 Маусым 2019 20:12

Бұл туралы Үкімет үйінде ҚР Ішкі істер министрі Ерлан Тұрғымбаев хабарлады.

Әңгіме 945 балаға қатысты. Олардың басым бөлігі балабақша тәрбиеленушілері болған. Арасында көшеде жүрген жерінен өзге ересектермен бірге қауіпсіз орынға шыққандары да бар. Кейін олардың суреттері Түркістан облысы әкімдігінің ресми сайтында жарияланып, ата-анасы мен жақындарына іздеу салынған болатын. ҚР Білім және ғылым министрлігінің хабарлауынша шұғыл әрекет ету мақсатында «Бала қорғау» және «Арыста жоғалған балалар» Телеграмм тобы да құрылды.

Ерлан Тұрғымбаев, ҚР Ішкі істер министрі:

- Алғашында 200 бала жоғалды деген мәлімет тарады. Құтқарушылар балабақша тәрбиеленушілерін эвакуациялаған соң бәрін ата-анасы немесе туыстарына табыстады. Қазір жоғалған балалар жоқ.

Арыстағы ағайынның балалары жазғы лагерьлерде демалады. Қазірдің өзінде Шығыс Қазақстан, Павлодар және Ақмола облыстары кемінде 100 баладан жазғы лагерьге қабылдауға әзір екендіктерін мәлімдеді. Онда ерікті түрде жұмыс істеуге дайын студенттер де бар. Ал Еуразия ұлттық университеті Арыс оқушыларына жазғы білім беру лагерін ашты. Алғаш болып 9-11 сыныптың 25 оқушысы оқу орнының студенттер үйіне орналастырылады. Олардың жататын орны мен тамағы тегін. Ұйымдастырушылардың айтуынша, жеткіншектерге түске дейін арнайы білім беру қарастырылған. Яғни болашақ мамандықтарына бағыттап, ұстаздар дәріс береді. Сондай-ақ балалар мәдени орындарға саяхаттап, эстрада жұлдыздарымен кездеседі.

Мемлекет басшысы Арыс қаласына барып, халықтың жағдайымен танысты

  • Read: 25 times
  • Сейсенбі, 25 Маусым 2019 20:05

Мемлекет басшысы Қасым-Жомарт Тоқаев Арыстағы апаттың ауқымын өз көзімен көру үшін оқиға орнына арнайы барды.

Кешкісін Арысқа жеткен Президент жергілікті жұртшылықпен кездесіп, жарылыстан жарақат алғандардың денсаулығын білу үшін ауруханада болды. Қаланы қалпына келтіреміз деген Президент апат салдарынан үй-күйсіз қалған халыққа баспана салып, жөндеу жұмыстарын жүргізуге уәде етті. «Арыстағы апат менің жеке бақылауымда болады», – деді Мемлекет басшысы.

Дүбірлі дүйсенбі, қалжыраған халық, үрейлі бала және арасында Президент. Кешкі сағат 20:00-де Қасым-Жомарт Тоқаев Арысқа аттанып бара жатқанын Twitter әлеуметтік желісінде жариялады. Ұшып барған Президент бірден жойқын жарылыстан үй-жайларын тастап кеткен тұрғындармен кездесті. Оқиға орнына Президенттің арнайы келуі әсіресе арыстықтарға үлкен қолдау болды. «Бәрі жақсы болады» деді Президент.

Енді не болады? Қала қалпына келе ме? Алапат апатта қара шаңырағынан айырылған арыстықтардың әрбірінің көзінен осыны оқуға болар еді. Кездесу барысында Президент халықты сабырға шақырды. «Арыстың ендігі жағдайы менің жеке бақылауымда болады», – деді Қасым-Жомарт Тоқаев.

Түнгі қала тіпті қорқынышты. Үңірейген үйлер, құлаған қабырғалар. Оқиға ізімен жүріп өткен Президент өңір басшылығы мен төтенше жағдайлар қызметкерлеріне алғысын білдірді. Шынымен облыс басшысы Өмірзақ Шөкеев пен құзырлы органдардың шұғыл әрекеті жойқын жарылыстың зардабын біраз азайтты. Кешегі Арыстағы аласапыранда 30 шақты адам ауруханаға түсті. Президент ауруханаға да арнайы барып жарылыста жарақаттанғандардың жағдайын білді.

Қасым-Жомарт Тоқаев, Қазақстан Республикасының Президенті:

- Арысқа барып, жағдайды көріп қайттым. Жағдай өте қиын, бірақ бәрін жасаймыз, төлейміз. Кішкене шыдау керек.

Арыста 19 үй, 9 мекеме өртеніп кеткен. Қала жарықсыз қалды. Жойқын жарылыстардан үйлердің 70% әйнегі сынып не шытынап кеткен. Апаттың салдары әлі саналған жоқ, яғни қанша қаржы қажеттігі әзірге белгісіз. Мұндай сәттерде материалдық құндылықтардан да жоғары бір нәрсе бар. Ол – адамның өмірі, олардың қауіпсіздігі. Мемлекет басшысы Арыстағы жағдайға байланысты құрылған жедел штабтың отырысын өткізіп, осыны тапсырды.

Қасым-Жомарт Тоқаев, Қазақстан Республикасының Президенті:

- Сейчас в данное время, что у нас главное, это безопасность людей, жителей города. Второе – это оказание помощи. Сейчас весь Казахстан обращается к Арысе, будет открыт марафон, будет открыт фонд. Поможем. Вопросов нет. Главное сейчас – безопосность людей. Чтобы они чувствовали себя нормально и были живы и здоровы! Я благодарю общественность города, ветеранов, они работают с насалением.

Апат айтып келмейді. Дегенмен оны болдырмауға да болар еді. Кім кінәлі? Бір емес, екі емес, Арыста осымен төртінші рет қайталанып отырған төтенше жағдайдың алдын алуға болмас па еді? Президент кінәлілерді тауып, заң бойынша жазаға тартуды тапсырды. Сондай-ақ Қасым-Жомарт Тоқаев Арыстың асты мен үстін оқ-дәріден тазартуды тапсырды.

Қасым-Жомарт Тоқаев, Қазақстан Республикасының Президенті:

- Надо разобраться в причинах. Почему это произошло? Уголовное дело открыто. Расследуем. Если есть виновные, они будут наказаны по полной, как говорится в строгом соответствии нашего закона. Теперь этот склад. Зачем он нужен был? С самого начала этот склад должен был быть убран. За черту города как минимум. Но он остался по разным причинам. Теперь после всех этих взрывов все надо убрать оттуда. Арыс должен полностью очиститься от всякого рода взрывных устройств. Это мы сделаем. Продолжайте работать!

Арыстағы апаттың ауқымы зор. Қаланы қайта қалпына келтіруге уақыт пен күш те аз жұмсалмайды. Оқиға ізімен жүріп, өз көзімен көрген Президент Үкіметке үлкен міндеттер жүктеді. Дегенмен осы күндері қарапайым халықтың қамқорлығы да кем түсіп жатқан жоқ. Арыстың бойындағы бір күн Қазақстан жұртын жұдырықша жұмылдырды. Кешелі бері күллі Қазақстан бірге күбірлеп тұрғандай, біз Арыспен біргеміз!

Авторы: Гүлжан Марқабаева

Дариға Назарбаева депутаттар сауалына атүсті жауап беретін мекемелерге ескерту жасады

  • Read: 42 times
  • Дүйсенбі, 24 Маусым 2019 20:28

Сенат депутаттары ядролық қаруға тыйым салу туралы шартты ратификациялады.

Шарт – ядролық қаруға заңдық тұрғыда тыйым салатын тарихтағы алғашқы халықаралық құжат. Келісім ядролық қару немесе ядролық жарылғыш құрылғыны өндіруге, сынап-сақтауға, өз аумағында орналастыруға тыйым салады.

Сенаторлар сондай-ақ қаржы нарығы мен микроқаржылық қызметті реттеу және салық мәселелеріне қатысты заң жобасын қабылдады. Бұған дейін Ұлттық банк ломбард, шағын кредиттік ұйымдар мен онлайн несие беру саласын қадағалай алмайтын. Қабылданған заң негізінде жаңадан құрылатын агенттік осы жұмысты реттемек. Бақылаусыз болғандықтан, онлайн несие бойынша пайыздық үстемақыны 700% дейін жеткізгендер де болған. Ал заң бойынша 100% аспауы тиіс.

Асқар Бейсенбаев, ҚР Парламенті Сенатының депутаты:

- Бүгінде 63,2 млрд теңге онлайн несие берілген, 400 мың адам осындай қарыз алған. Осы саланы жөнді реттеу тетігі болмағандықтан, әлеуметтік тәуекелдер туындап отыр. Ол несиені халық мерзімінде өтеп үлгермесе, негізгі қарыз сомасынан бірнеше есеге көп төлеуі тиіс. Халықты қанауға жол бермеу үшін мемлекеттік реттеу болуы қажет.

Ғұмар Дүйсенбаев, ҚР Парламенті Сенатының депутаты:

- Заңды қабылдамас бұрын 10 кодекс пен 61 заңға өзгеріс енгізілді. Құжаттың мақсаты – қаржы нарығын сапалы реттеу. Соңғы кезде кей банктер лицензиясынан айырылды, енді жаңа агенттік екінші деңгейлі банктердің қызметін де қадағалайды. Халықтың проблемасына айналған онлайн несиелеу де қатаң бақылауға алынады.

Депутаттық сауал әдеттегіден көп болды. Солардың бірі лотереяларға қатысты болды. Депутат Бірғаным Әйтімованың келтірген дерегі бойынша, әлемде жыл сайын 250 млрд долларға лотерея билеттері сатылады екен. Америкада бірқатар әйгілі оқу орындары, Лондонда Британ мұражайы осы ойыннан түскен қаражатқа салынған. Біздің елімізде заң бойынша лотерея операторы жалпы түсімнен 10% спортты дамытуға жұмсауы тиіс. Бірақ оны іске асыру тәртібі белгіленбеген. Сондықтан сенатор бұл аударымдар қайда кетіп жатқандығын білу үшін сауалын Премьер-Министрге жолдады.

Бірғаным Әйтімова, ҚР Парламенті Сенатының депутаты:

- Лотерея қызметі саласындағы қоғамдық қатынастарды мемлекеттік реттеу, оны дамыту үшін қабылданып жатқан шаралар туралы және лотереядан міндетті аударымдар бойынша заң нормаларын іске асыру жайында толық ақпарат беруіңізді сұраймын.

Ұзын саны 16 депутаттық сауал жолданды. Сенат төрағасы Дариға Назарбаева министрліктерге, өзге де мемлекеттік бағдарламаларға жауапты органдар сауалдарға толыққанды жауап беруі тиіс деді.

Дариға Назарбаева, ҚР Парламенті Сенатының төрағасы:

- Сұрақтарымызға «әлі талқыланып жатыр, әлі қаралуда, әлі жұмыс жүргізіліп жатыр» деген жауаптар келеді. Мұндай жауаптар саналмайды. Бұл – жай әншейін сөздер. Осындай жауаптар келсе, тағы да жақсылап тексеру керек, керек болса комитеттің отырысына не парламенттік тыңдауға да шақырасыздар.