Жаңалықтар

Туристер Бұқтырма бойындағы кейбір жағажайларға кіре алмай жүр

  • Read: 28 times
  • Жұма, 19 Шілде 2019 20:20

 Туристер жағажайға барып суға шомылу үшін ақша төлеуге мәжбүр.

Себебі сол маңдағы демалыс нысандарының иелері жағаны биік дуалмен қоршап алған. 

Бұқтырма су қоймасы басы бүтін мемлекеттің қарамағында. Тек кәсіпкерлер мен жеке тұлғаларға жағажайлардың маңына демалыс нысандарын немесе саяжай салуға шектеулі көлемде жер беріледі. Алайда кейбір кәсіпкерлер жалпыға ортақ жағажайды түгел қоршап тастаған. Енді жағажайға баратын туристерден дуалдан өтерде ақы алады.

Қоршаудан өте алмағандар тауды асып айналма жолмен жағаға жетеді. Демалысқа келген бір адам тәулігіне аз дегенде 8-10 мың теңге төлейді. Олар жалпыға ортақ жағажайдың да ақылы болғанына наразы.

Алена Ковылина, демалушы:

- Жағажайға жету мүмкін емес. Жан-жағы толық қоршаулы. Баламен арба сүйреп, тау асып бару қиын. Бір рет қоршаудан өту үшін үлкен адамдарға – 1000 тг, ал балалар үшін – 500 тг алады.

Қоршаудан Алтай аудандық әкімдігінің қызметкерлері де өте алмай жүр. Жағажай, шомылатын орын жалпыға ортақ екені --да анық жазылған. Бірақ ол заңды жеке демалыс насындарының иелері елеп отырған жоқ.

Анет Ахметжанов, заңгер:

- Су ресурстары туралы екі заң бар. Сол жерде жалпыға ортақ су көздері мен жағаны қоршауға болмайтыны жазылған. Сондықтан кәсіпкерлердің қоғамдық жағажайларды қоршауы да заңсыз.

Заңсыз қоршау тұрғызғандарға Алтай ауданының әікмідігі бұған дейін бірнеше рет оны алу жөнінде хабарлама берген. Бірақ одан еш нәтиже шықпаған. Енді атқарушы билік жағаны заңсыз қоршағандардың әрекетін сотқа беріп, әкімшілік жауапкершілікке тартпақ. Ал дуал сот шешімімен бұзылатын болады.

Вячеслав Князев, Алтай аудандық туризм бөлімінің басшысы:

- Соңғы 3 жылда жағадағы жер учаскелеріне түгендеу жүргіздік. Жерді игермегендерден қайта алып жатырмыз. Әуеден фотосуретін түсіріп, әр аумақтың электрондық құжатын жасап қойдық.

Қазірде Бұқтырманың жағасында үлкенді-кішілі 549 демалыс нысаны бар. Атқарушы билік арнайы қаржы бөліп, осы нысандардың әрқайсысын интернет-порталға енгізбек. Нәтижесінде қанша туристің келгеніне көз жеткізуге болады. Бұл табысын жасыратын кәсіпкерлерге де тосқауыл болады. Ал интернет-порталға жұмсалған қаржы демалыс нысандарының төлеген салығы арқылы қайтарылады.

Авторлары: Олжас Керейхан, Аслан Төлепов

Ақсай қаласы күл-қоқыстан көз аша алмай отыр

  • Read: 20 times
  • Жұма, 19 Шілде 2019 20:19

Батыс Қазақстан облысында Бөрлі ауданының әкімдігі асарға шақырды.

Жергілікті билік бұл қадамға амалдың жоқтығынан барып отыр. Әйтпесе Ақсай қаласы күл-қоқысқа көміліп қалуға жақын.

Қаланы күл-қоқыстан тазартуға жергілікті кәсіпкерлер жұмылды. Ақсай қаласына кірген жанның көзіне көшеде шашылған күл-қоқыс алдымен шалынады. Жағымсыз иісі жанынан жүргізбейді. Ал жергілікті тұрғындардың бұған еті үйренген сыңайлы. Үйренбегенде қайтсін, жыл басынан бері көрген күні – осы.

Армат Сейпенов, Ақсай қаласының тұрғыны:

- Сыртқа шыққанда балалар ойнай алмайды. Маса, шыбын ойын шырқын бұзады. Күнде осылай. Ешкім жинамайды.

Арман, Ақсай қаласының тұрғыны:

- Үйім мынаның қоқыс жәшігінің қасында орналасқан. Осындай жағдай орнағалы көп уақыт өтті. Ешкім шығармайды. Балабақшаға дейін 50 метр қашықтық жатыр. 20 метр жерде балалар ойнап жүр.

Қала тазалауды бұрын коммуналдық мекеме атқаратын. Бюджеттен алатыны бар, өзге тірліктен табатыны бар, тұрғындардың төлемақысына аса бір тәуелді болмайтын. Ал осы істі бәсекелі ортаға бергелі қалыпты қызмет ырғағынан жаңылды. Биылдыққа бірнеше компания ауысқан. Соңғысы қоқыс шығарудан шаршағанын жарты ай бұрын айтыпты. Аудан әкімдігі амал жоқ «Асар» акциясын жариялапты. Күні бүгін 5 кәсіпорын өз техникасын бөліп, қаланы тазалауда.

Ахмет Италиев, кәсіпкер:

- Осы жағдай аясында қала ішінде акция жарияланған. Соған жұмыла бірігіп, қала тазалығы үшін үлес қосып жатырмыз. Қазір қала ішінде 3 жүк көлігі жұмыс жасап тұр. Күніне әрбір машина 12-15 мәрте қоқыс тиеп шығарады.

Қала тазалығын қолға алған кәсіпкерлердің жұмысты жарты жолда қалдыру сыры неде? Мамандардың мәлімдеуінше, оған бірінші себеп – тұрғындардың төлемақы төлемеуі. Жан басына шаққандағы тариф 200 тг болса, 40 мың тұрғыннан айына 8 млн теңге жиналуы тиіс. Ал құралған қаражат 2 млн теңгеден асып көрмепті. Екінші себеп – арнайы техникалардың болмауы.

Амангелді Тоғызбаев, Ақсай қаласының әкімі:

- Біз қазір қоқыс шығаруға ниетті кезекті кәсіпкерге әуелі төлем жинауды жолға қоюды жүктеп отырмыз. Ол үшін онлайн төлеуді енгізу керек. Сондай-ақ аудан бюджетінен арнайы ақша бөлінді. Алдағы уақытта екі қоқыс шығарушы техника сатып алынады. Ол техникалар аталған кәсіпкерге жалға беріледі. Сонымен бірге бюджеттен 200-дей қоқыс контейнерін сатып алдық. Оны орнатуды бастадық. Тек осылай ғана көмектесе аламыз. Басқаша субсидия бөлудің, қаржылай қолдаудың ешбір заңды жолы жоқ.

«Ақсай қаласын күл-қоқыстан тазалап қарық қылам, өзім де пайдаға кенелем» деп келгендердің жыл басынан бері 4-еуі өз міндетінен тайқып кеткен көрінеді. Енді бұл іске 5-інші кәсіпкер бел шеше кіріспек. Ол да көтере алмайтын шоқпарды беліне байлағандардың сапынан табыла ма, жоқ па, оны уақыт көрсетпек. Бірақ қалай болғанда да бұл іске немқұрайлылық танытуға болмайды. Әйтпесе қала қоқысқа көмілуге жақын.

Авторлары: Е.Жылқайдарұлы, Р.Ғазезов

Коммуналдық төлемсіз несиеге жол жабық

  • Read: 24 times
  • Жұма, 19 Шілде 2019 20:15

Коммуналдық мекеме қарыз қайтарудың жаңа жолына иек артып отыр.

Себебі қазір ақтөбеліктердің ауызсу мен кәріз жүйелері қызметіне қарызы 30 млн теңгеге жуық көрінеді. Қадағалаушы мекеме өкілдері де бұл шараның еліміздің заңына қайшы еместігін мәлімдейді.

Гүлжан Бисенбина ертеден кешке дейін үй жағалап, су есептеу құрылғыларынан ақпарат алады. Тұтынушылардың қарызы туралы хаттама тарату да мойнында. Бір өзі 30 күн ішінде 1700 пәтерде болуы тиіс. Бірақ есік ашпай, тіпті краннан аққан судың ақысын төлеуден бас тартып, қоқан-лоқы көрсететіндер де бар көрінеді.

Гүлжан Бисенбина, бақылаушы:

- Төлей алмайтын, ішетін адамдар бар. Отбасында жұмыс істемейтін адамдар бар. Көбіне сондай адамдар қарыз. Пәтер жалдаушылардың арасында түсініспеушіліктер де кездеседі. Бірде пәтерақыны жалдаушылар төлесе, кейде үй иесі өзі төлейтін жағдайлар да ұшырасады. Сондай жағдайларда төлем көлемі жиналып қалады.

Борышкерлер ісін монополист компания бұған дейін сотқа жолдап келді. Енді жаңа заңға сәйкес екі жақ арасындағы шиеленістің шешімін нотариустер де анықтауға құзырлы. Ал қарыздар жандарға қатысты түрлі әкімшілік жаза қолдану сот орындаушыларына жүктелген. Тіпті коммуналдық төлемнен қашқақтаған азаматтардың шетелге шығуына шектеу қойылады.

Азамат Егізбаев, республикалық жеке сот орындаушылар палатасының президиум мүшесі:

- Әкімшілік атқару өндірісі туралы іс қозғалғаннан соң қарыздар азаматтың екінші деңгейлі банктердегі есепшотына, жылжымалы және жылжымайтын мүлкіне тыйым салынады. Шекарадан шығуына шектеу қойылады. Егер бұл шаралардан нәтиже болмаса, іс сотқа жолданып, әкімшілік қамауға алынуы да мүмкін.

Нұрлан Болатбаев, ТМРБ және тұтынушылардың құқығын қорғау департаменті басшысының орынбасары:

 - ҚР кредиттік бюролар туралы және кредиттік тарихты қалыптастыру туралы заңына сәйкес бұл ақпаратты беру заңсыз емес. «Коммуналдық қызмет атқаратын табиғи монополиялардың субъектілері мұндай ақпаратты беруге міндетті» деп айтуға болады.

Қазір көпшілікті толғандырып отырған басты мәселе – ақпараттық қауіпсіздік. Дегенмен коммуналдық мекеме өкілдері: «Азаматтар туралы құпия ақпар әркімнің қолында кетпейді», – деп сендірді.

Тимур Бабанаев, коммуналдық кәсіпорынның вице-президенті:

- Ақпараттық қауіпсіздік саласында белгілі талаптар бар. Мамандарымыз да тиісті дәріс алды. Тіпті борышкерлер тізімі жазылған электрондық тасымалдаушымен санаулы адам жұмыс жасайды. Құжаттармен бірге арнайы сейфте сақталады.

Қара тізімге ілінген жандар қарызын өтеген бойда коммуналдық мекемеге өтініш бере алады. Содан кейін ғана несие бюросынан өшіріледі. Монополист мекеменің пайымынша, қордаланған қарызды қайтарудың бұл әдісі әлдеқайда тиімдірек. Себебі екінші деңгейлі банктердің қара тізіміне ілінген жандар несиенің кез келген түрінен қағылуы мүмкін.

Авторлары: Мансұр Есқожин, Айнадин Молдабеков

Ұлттық тестілеу орталығында құпиялылық тәртібі сақталған

  • Read: 29 times
  • Жұма, 19 Шілде 2019 20:07

Ұлттық тестілеу орталығы бұқаралық ақпарат құралдарының өкілдеріне арналған баспасөз турын өткізді.

Ұлттық бірыңғай тестілеу сұрақтары қалай әзірленеді? Құпиялылық қалай сақталады? Журналистер режимдік нысан болып саналатын ғимарат ішін аралап, ҰБТ сұрақтарының қалай әзірленетінін көрді.

Ұлттық тестілеу орталығының жаңа директоры – Дидар Смағұлов. Тағайындалғанына бір ай толмаса да, жемқорлық жайлаған саланы тазартуға талпынысы зор.

Ұлттық бірыңғай тестілеудің сұрақтарын әзірлеу барысында мамандар оларды таратпау туралы жауапкершілікті мойнына алады. Бейнекамерамен кіруге тыйым салынады. Сондықтан ішіндегі көріністі көрсету мүмкін емес. Әзірленген сұрақтар 2 рет сараптамадан өтеді, содан соң арнайы серверде сақталады. Оған тек Ұлттық қауіпсіздік комитетінің бір өкілі мен техникалық маманның ғана кіруіне рұқсат бар. Сосын баспаханаға жіберіледі.

Дидар Смағұлов, Ұлттық тестілеу орталығы директорының міндетін атқарушы:

- Баспаханада режим өте қатал. Анық-қанығын айтсақ, олар баспаханаға кіретін әрі шығатын кезде тіпті іш киімдерін де шешуге мәжбүр болады. Бұл – құпиялылық тәртібі. Сондықтан тестілеудің сұрағы мен жауабы жария болуы мүмкін емес. Біз ол жағынан қам жемейміз.

Жасыл қапшық, қоңыр жәшік, оның ішінде кітапша. Түлектердің тағдыры шешілетін ҰБТ күні ғана ашылатын қораптардың өз құпиясы бар.

Роллан Серіков, Ұлттық тестілеу орталығының қызметкері:

- Қорапшаның сырты да арнайы желім қағазбен бекітіледі. Егер бұл қағаз бір рет ашылған болса, онда мынадай жазу шығады, оны екінші рет қайтадан жабыстыру мүмкін емес.

Ұлттық бірыңғай тестілеу орталығы мемлекеттік білім гранттарын тағайындайтын құзыреттілікке ие. Бұл процесс те ақпараттық технологиялардың көмегімен жүргізіледі. Орталық директорының айтуынша, биылғы түлектердің арасында «Ақпараттық технологиялар» мамандығына талас көп. Барлығы 6391 өтініш түскен. Гранттардың әділ тағайындалатынын Кибер шабуылдарды талдау және тергеу орталығының мамандары тексеретін болады.

Олжас Сатиев, Кибер шабуылдарды талдау және тергеу орталығының президенті:

- Бұл жүйе осы орталықтың қызметкерлері үшін қолжетімді. Демек біздің міндетіміз – тексеріп, аудит жүргізіп, бөгде адамдардың қатыспауын, білім гранттарының әділ берілуін қадағалап отыру. Бізге жүйенің кодтары берілетін болады. Сол арқылы қандай да бір күмән тудыратын жайттарды жариялап отырамыз.

Білім гранттарына өтініш беру ертең аяқталады. Қазақстан бойынша бөлінген 54 мың білім грантының иелері 3-інші тамызда белгілі болмақ. Көпбалалы және жағдайы төмен отбасылардың балаларына 5 мың грант бөлініп отыр.

Авторлары: Гүлжан Марқабаева, Әліби-Ерел Жүніс