БҚО-да күн электр стансасы салынады
Батыс Қазақстан облысында энерготапшылық мәселесін шешу үшін күн электр стансасының құрылысы басталады. Энергетика министрлігі тиісті аукцион өткізіп, инвесторды анықтады. Теректі ауданында салынатын қуаты 20 мегаваттық станса құрылысына 20 миллиард теңге инвестиция құйылады. Өңірде бұған дейін 380 МВТ электр қуаты өндіріліп келсе, енді бұл көрсеткіш 400-ге жетпек. Мамандардың мәлімдеуінше, жаңартылатын қуат көздерінен алынған электр энергиясын нарыққа шығаруға мемлекет кепілдік береді.
Мирас Мүлкәй, облыстық Энергетика және ТҮКШ басқармасының басшысы:
-Теректі ауданы Пойма ауылының жанында Узловая қосалқы стансасы бар, сол жерден жер телімі белгіленді. Енді қазіргі уақытта осы келісім шартты бекіту мақсатында осы қаржы институттарына ұсыным жіберілді. Қаңтар айында қорытындысын алып мердігер мекеме жұмыстарға кірісуге міндетті. Осы аталған жобаны 2 жыл мерзімде келісімшартқа сәйкес жүзеге асыруға тиісті мердігер мекеме.