ҚАЗАҚСТАННЫҢ ҮШІНШІ ЖАҢҒЫРУЫ: ЖАҺАНДЫҚ БӘСЕКЕГЕ ҚАБІЛЕТТІЛІК

Көкшетаулық 74 жастағы қария әлем чемпионы атанды

    Сәрсенбі, 22 Қараша 2017 23:29
inform.kz

Көкшетаулық 74 жастағы қария Борис Нұғыманов кір тасын көтеруден әлем чемпионы атанды.

Ақмола облыстық дене шынықтыру және спорт басқармасы баспасөз қызметінің мәліметі бойынша, Корей елінің Сеул қаласында кір тасын көтеруден әлем чемпионаты өтті. Байрақты бәсекеге 34 елден келген 500-ден астам атлет қатысты. Олардың арасында көкшетаулық спортшылар абыройлы өнер көрсетті. 70-74 жастағы қариялар арасында сынға түскен Борис Нұғыманов жұлқа және сілке көтеру әдістері бойынша әлем чемпионы атанды.

«Бұл әдістер бойынша кір тасын көтеру өте қиын. Кеуде, қол бұлшық еттеріне салмақ түседі», – дейді Б.Нұғыманов.

Сонымен қатар ардагер қоссайыс бойынша екінші орыннан көрінді.

Қария кір тасын көтеруден басқа ағымдағы жылы зілтемірді жатып көтеру бойынша Қазақстан чемпионы атанды.

Енді келер жылдың мамыр айында Будапешт қаласында өтетін Еуропа чемпионатына дайындықты бастап кетті.

Ақпарат көзі: ҚазАқпарат

Павлодарда Сталинград шайқасында көз жұмған батырлардың рухына тағзым етілді

    Сәрсенбі, 22 Қараша 2017 22:13

Осыдан 75 жыл бұрын Ұлы Отан соғысының барысын өзгерткен басты ұрыстардың бірі Сталинград шайқасы басталды.

«Уран» операциясы кезінде кеңес әскерилері 300 мыңнан астам неміс жауынгеріне төтеп берді. Нәтижесінде жаудың елеулі тобы қоршауда қалды. Ұрпақ жадынан кетпес Сталинград шайқасында көз жұмған батырлардың рухына тағзым ету үшін Ертіс өңірінде еске алу шаралары өтті. Ал Ресей азаматшасы Надежда Брежнева мыңдаған кеңес солдаты опат болған жерлердің топырағын әкеліп, жергілікті музейге тапсырды.

Новосібір өңірінен келген меймандарды жергілікті іздестіру жасағының өкілдері қарсы алды. Надежда Брежнева Ұлы Отан соғысында кескілескен ұрыстардың орнында болып, зерттеген. Ресейлік қонақ мыңдаған солдат шейіт болған Брест, Смоленск жерінің топырағын әкеліп, қазақ солдаттарының ұрпақтарына алғыс айтты.

Надежда Брежнева, «Отчизна» іздестіру қозғалысының өкілі /Ресей/:

- Бабабар ерлігі – ұрпаққа аманат. Біз батыр бабаларымыз шайқасқан тарихи орындармен жүріп өттік. Ұлы Жеңіс баршаға ортақ. Ал біз жерімізді жаудан қорғап, отқа түскен батырларымыздың ерлігін ұмытпауымыз керек.

Тоқсаннан асқан Жібек апа мен Мұхамеджан ата осындай шараларды өткізіп алмауға тырысады. Оқушылармен жиі кездесіп, ағасы мен майдандастарының ерлігі жайында сыр шертеді. Осы жолы да Павлодар қаласының №14 орта мектебінің Әскери даңқ мұражайына келді.

Жібек Әубәкірова, тыл еңбеккері:

- Ата-бабабалырымз сол соғысқа кеткенде, біз артында қалған балалар едік. Енді міне, қартайып, осындай жасқа келіп отырмыз. Сондықтан біз өте қуаныштымыз. Осы мұражайда, осының барлығын көтеріп, қайтадан жаңғыртып, күллі жастар атсалысқандарына рахмет!

Әлібек Мұса, Павлодар қаласы №14 орта мектебінің оқушысы:

- Ата-бабаларымыздың ерлігін мақтан тұтамыз. Соғыстың тарихымен танысу үшін осы музейге жиі келіп тұрамын.

Брест қорғанысы – теңдесі жоқ ерлік пен асқан батылдықтың үлгісі. Ресейлік мейман кескілескен шайқаста жауға төтеп берген қамалдың бір бөлшегін мектеп музейіне тапсырды.

Надежда Брежнева, «Отчизна» іздестіру қозғалысының өкілі /Ресей/:

- Біз, солдаттар елге соңғы хат жазған зындандарға түстік. Ақтық демі қалғанша шайқасқан жауынгерлермен кездескендей болдық. Осы күндер ешқашан қайталанбасын.

Бақытжан Өтепов, Павлодар қаласы №14 орта мектебі әскери даңқ музейінің негізін қалаушы:

- Мұражайда Брест жерінен ешқандай мұра, хаттар болған жоқ еді. Бүгін Ресей елінің азаматтарының арқасында біздің елге сол соғыста болған мұрағаттар әкелінді. Брест жерінде мыңдаған қазақстандық Ұлы Отан соғысында ерлік жасап, қаза тапқан.

Ақмарал Есімханова, тілші:

- Бүгінгі күні Ертіс өңірін патриоттық-іздестіру қозғалысының орталығына айналды деуге негіз бар. Олай дейтініміз, келер жылдың көктемінде облыс орталығында «Ертіс-2018» атты іздестіру отрядтарының халықаралық форумы өтеді. Бұл шараға жеңісті жақындатқан жауынгерлердің ұрпақтары мен халықаралық дәрежедегі іздестіру жасақтарының мүшелері қатысады.

Авторлары: Ақмарал Есімханова, Самат Оспанов, Алексей Омельницкий

Семейде мектеп оқушыларына арналған отандық автобус шыға бастады

    Сәрсенбі, 22 Қараша 2017 21:45

Семейде мектеп оқушыларын тасымалдауға арналған тұңғыш отандық автобус құрастырыла бастады.

Ұзындығы 11 метрге жуық көліктің қауіпсіздік талаптары күшейтіліп, дабыл жүйесі орнатылған. Халықаралық сертификат та алыныпты. Алғашқы тапсырыс Шығыс Қазақстан облыстық білім басқармасынан түскен. Жақын күндері 17 автобус шалғай ауылдарға жол тартады. Кәсіпорын болашақта Қазақстанның басқа да аймақтарына осындай техника шығаруға дайын.

Бұрын біздің елде шығарылмаған мұндай автобустарды әдетте шетелдік кинофильмдерден ғана көруге болатын. Енді отандық өнімді семейлік жігіттер білек сыбана құрастырып жатыр. Көліктің басты ерекшелігі қауіпсіздік талаптары күшейтілген. Жылдамдығы сағатына 80 шақырымнан аспайтын қондырғы қойылған. Әрбір орындықта белдіктер бар.

Александр Сутормин, кәсіпорынның бөлім жетекшісі:

- Автобуста апатты жағдайда тоқтататын түймешіктер орнатылған. Яғни қажет болған уақытта кез келген жолаушы жүргізушіге дабыл жүйесі арқылы белгі бере алады. Балаларды бақылап отыратын жетекшіге де ыңғайлы орын жасалған.

10 жылдан бері автобус құрастырумен айналысатын кәсіпорында қазақстандық мазмұнға да баса мән берілген. Өндірісті тоқтатпай, жұмыс орындарын сақтап қалу үшін зауыт үнемі ізденістер үстінде. Бүгінде мұнда он шақты автобус түрлері шығарылады.

Асемхан Досқожанов, кәсіпорынның бас директоры:

- Қазақстанда, өзіміз жасадық. Сонда бізде 40 пайыз Қазақстаннан шыққан заттар. Басқа да облыстар біздің автобустарды алса, сапасы да, бағасы да келіп тұр. Басқа шетелден әкелгенше, біздің өзіміздің Қазақстанның автобустарын өзімізде шығара аламыз.

Кәсіпорын Еуразиялық экономикалық одақтың да нарығын игере бастапты. Жақында екі автобус Ресейдің Қиыр Шығысына аттанбақ. Ал келесі жылы көрші мемлекетке тағы 50 автобус жөнелту жөнінде келісімшартқа қол қойылады деп жоспарланған.

Авторлары: Болат Көкенайұлы, Анатолий Тернов, Берік Жобалайұлы