ҚАЗАҚСТАННЫҢ ҮШІНШІ ЖАҢҒЫРУЫ: ЖАҺАНДЫҚ БӘСЕКЕГЕ ҚАБІЛЕТТІЛІК

Алматыда «Тәуелсіздік» монументіне салтанатты түрде гүл шоқтары қойылды

    Сенбі, 16 Желтоқсан 2017 23:30
almaty.gov.kz

Алматы – тәуелсіздіктің ақ таңы атқан қала.

Бұдан 26 жыл бұрын Қазақстанның тәуелсіз ел атанғаны асқақ Алатаудың етегіндегі Алматыда жариялаған еді. Мерекеге байланысты тұрғындар, зиялы қауым өкілдері мен қоғам қайраткерлері әдеттегідей Республика алаңындағы «Тәуелсіздік» монументіне гүл шоқтарын қойды. Олар егемендіктің символына айналған монумент алдына жиналып, тарихқа тағзым жасап, тәубе етті. Ұлық мейрамға орай қала әкімдігі де арнайы іс-шаралар ұйымдастырған. Оңтүстік астанамыздың тәуелсіздік жылдары қол жеткізген жетістіктері орасан. Әлеуметтік-экономикалық өсіммен қатар халық саны да жыл сайын артып келеді. Сонымен қатар биыл шаһарда мыңдаған отбасы шаттыққа кенеліп, баспаналы болды. Бұл тәуелсіздік тарту еткен елдіктің, татулық пен бірліктің жемісі.

Рахман Алшанов, ҚР мемлекет және қоғам қайраткері:

-Біз бүгінде егемендіктің нәтижесін көріп отырмыз. Тұрақты экономика құрдық. Дамыған әлеуметтік сала, ғылым, білім, мәдениет, тізетін болсақ, көп нәрсе бар. «Нұрлы жер», «Нұрлы жол» деген бағдарламалар. Әлеуметтік саланың дамуы, үй құрылысы бойынша рекорд бұрын болмаған. Алматының өзінде үлкен жетістіктер бар. Инвестицияда 80 пайызы келіп жатыр. Қытаймен, Еуроодақпен қарым-қатынаста Қазақстанның үлесі басым.

Қазақстан құрамасы «Еуразия Барысы» турнирінде топ жарды

    Сенбі, 16 Желтоқсан 2017 22:23

Қазақ күресінен Алматыда өтіп жатқан «Еуразия Барысы» турнирінде Қазақстанның бірінші құрамасы топ жарды.

Жартылай финалда біздің бірінші құрамамыз Моңғолия балуандарын әрең ұтқан. Ал екінші құрамамыз Өзбекстан балуандарын 6:2 есебімен ұтып, финалға жолдама алған.

Ақтық финалда Қазақстанның бірінші құрамасы екінші құраманы жеңіп, «Еуразия барысында» топ жарды.

Қазақстанның бірінші құрамасының сапында Дауылбай Оспан (55 келіге дейін), Қуаныш Ысқақов (60 келіге дейін), Бақдәулет Сәбитов (66 келіге дейін), Айдос Ғалымов (74 келіге дейін), Ерсұлтан Мұзаппаров (82 келіге дейін), Бекзат Ахметбеков (90 келіге дейін), Асыл Барменов (100 келіге дейін) және Әйбек Нұғымаров (100 келіден жоғары) белдесті.

Ал екінші құрамда Дәулет Ниетбай (55 келіге дейін), Ержан Мағауинов (60 келіге дейін), Касымхан Түленбай (66 келіге дейін), Аманкелді Төлемісов (74 келіге дейін), Сахан Абдықасым (82 келіге дейін), Саят Шәмшиев (90 келіге дейін), Арслан Абдамит (100 келіден жоғары) және Руслан Абдразақов (100 келіден жоғары) өнер көрсетті. 

Үшінші орын Өзбекстан құрамасына бұйырды. Өзбек балуандары қола үшін күресте Жапония балуандарынан 6:2 есебімен басым түсті.

Естеріңізге сала кетейік, аталған додада Бразилия, Жапония, Камерун, Грузия, Моңғолия, Түркия, Өзбекстан және Қазақстан балуандары өзара командалық сында бақ сынап жатыр. Қазақ балуандары жарысты ұйымдастырушы ел ретінде екі құраммен өнер көрсетті.

prosports.kz

ШҚО-да еңбегі ерен үздіктер Тәуелсіздік күніне орай марапатталды

    Сенбі, 16 Желтоқсан 2017 21:49

Жылдағы дәстүрге сай Тәуелсіздік күні еліміздің әр түкпірінде түрлі салада ерен еңбегімен ерекше көзге түскен үздіктер марапатталады.

Шығыс Қазақстанда да биыл 50 азаматтың кеудесіне орден, медаль тағылып, құшағы гүлге толды. Еліміздің тәуелсіз ел атанғанына бүгін 26 жыл. Осы уақыт аралығында Қазақстанның даңқын асырып, мерейін үстем еткен азаматтар еңбегі ұлық мереке қарсаңында елеусіз қалмады. «Парасат» орденін иемденген Әсемхан Досқожанов бұл марапаттың өзіне үлкен сенім мен зор жауапкершілік жүктегенін айтады.

Әсемхан Досқожанов, «СемАЗ» ЖШС бас директоры:

-Қазақстандағы ең үлкен тұңғыш зауыт. Қазір көп зат шығарып жатырмыз. «Қазақстанда жасалған» дейді ғой. 40 пайыз отандық өнім «СемАЗ» зауытында шығарылады. Бүгін қуанышты күн. Елбасы еңбегіміз үшін марапаттап жатыр.

Өңірдің денсаулық саласында тер төгіп жүрген белді хирург, өңірдің бас урологы Нұрқұмар Қуандықовтың еңбегі «Құрмет» орденімен бағаланды.

Нұрқұмар Қуандықов, Өскемен қалалық №1 аурухананың бөлім меңгерушісі:

-Бұл менің ғана емес, ұжымның еңбегіне берілген баға. Әріптестеріміз болмаса, айтулы жетістікке жете алмас едік. Медицина саласы дамып келеді. Қазақстанның қазынасы түсті металлургиямен бағалы. Сондықтан бұл күні «Казцинк» кәсіпорнының да қанжығасы майланды. Өңірдің әлеуметтік түлеуіне сүбелі үлес қосуымен ерекшеленіп жүрген алып өндіріс ошағы салаға 11 млрд теңге құйған.

Никола Попович, «Казцинк» ЖШС директорлар кеңесінің төрағасы:

-Жиырмадан аса білім, спорт, денсаулық нысанының бой көтеруіне септестік. Мемлекетке қолдау көрсетуіміз керек. Халықтың тұрмысын түзеуге біздің үлесіміз тие бермек.

Тәуелсіз Қазақстанның абыройы – еңбекқор азаматтар. Ал еңбек қашан да бағаланатыны сөзсіз.

Авторлары: Мерей Мұратханқызы, Аслан Төлепов

«Еуразия Барысы» турнирінде Өзбекстан балуандары қола жүлдегер атанды

    Сенбі, 16 Желтоқсан 2017 20:34

Қазақ күресінен Алматыда өтіп жатқан «Еуразия Барысы» турнирінде Өзбекстан құрамасы қола жүлдегер атанды.

Өзбек балуандары жартылай финалда Жапония балуандарын 6:2 есебімен ұтып, үздік үштіктен көрінді. Өзбекстан құрамасы алғашқы іріктеу сынында Камерун балуандарын 7:1 есебімен қапы қалдырып, ширек финалда Бразилия балуандарын 8:0 есебімен ойсырата ұтқан еді.

Енді «Қазақстан 1» құрамасы мен Алматы облысынан құралған «Қазақстан 2» командалары финалда бас жүлдені сарапқа салады.

«Қазақстан Барысының» Facebook парақшасы