ҚАЗАҚСТАННЫҢ ҮШІНШІ ЖАҢҒЫРУЫ: ЖАҺАНДЫҚ БӘСЕКЕГЕ ҚАБІЛЕТТІЛІК

Ливия аумағындағы 15 мың мигрант отанына қайтарылады

    Жұма, 15 Желтоқсан 2017 16:22
Радио Свобода

Келер жылдың ақпан айына дейін Ливия аумағындағы 15 мың мигрант отанына қайтарылады.

Тиісті шешімді Еуроодақ, БҰҰ мен Африка одағы өкілдерінен құрылған жұмыс тобы қабылдаған. Мамандар осылайша Ливиядан Еуропаға ағылған босқындар нөпіріне төтеп беруді көздеп отыр. Бұл мақсатқа 100 млн еуро бөлу жоспарланған.

Айта кеткен жөн, қарашаның ортасында Ливияға қатысты ірі жанжал шыққан еді. Америкалық «CCN» телеарнасы босқындарды құл ретінде сататын жергілікті базар туралы бейнематериал көрсеткен. Ресми Триполи жантүршігерлік жағдайға қатысты жіті тергеу жүргізуге уәде еткен. Ал Нигерия билігі осы ел аумағындағы өз азаматтарын кері қайтару жұмыстарына кірісіп кетті. Негізі көші-қон жөніндегі халықаралық ұйым мәліметіне сәйкес, Ливияда қазір 450 мыңға жуық заңсыз африкалық мигрант бар. Олардың көбі адам төзгісіз жағдайда өмір сүруге мәжбүр. Бәрінің көздегені бір. Босқындар кез келген жолмен Ливия жағалауы арқылы Еуропа елдеріне аттануды армандайды.

Федерика Могерини, Еуроодақтың сыртқы істер және қауіпсіздік саясаты жөніндегі жоғарғы өкілі:

- Біз Ливиядағы барлық уақытша лагерьді жауып тастауымыз керек. Өйткені ондағы мигранттар адам шошырлық жағдайда өмір сүріп жатыр. Есесіне босқындар нөпірін бақылау үшін түрлі жүйе мен халықаралық стандарт әзірлейміз.

Грекияда қатаң үнемдеу шараларына қарсы ереуіл өтіп жатыр

    Жұма, 15 Желтоқсан 2017 10:31

Грекияда жаппай ереуілдер өтіп жатыр. Жұртшылық үкіметтің қатаң үнемдеу режиміне наразы.

Шеру салдарынан қаладағы көліктер мен пойыздар тоқтап, әуе рейстері кешікті. Бірқатар мемлекеттік мекемелер де жабық тұр. Ереуілді Грекиядағы ірі кәсіподақтар ұйымдастырған. Халық парламент алдына жиналып, өз наразылықтарын білдірді. Өйткені бұл ғимаратта алдағы жылдың бюджеті талқыланып жатыр. Ал оған дауыс беру 19 желтоқсанда өтеді. Қаржылай көмек көрсету шарты аясында Грекия үкіметі әлеуметтік шығындар мен зейнетақы көлемін қысқартып, мемлекеттік секторларды реформалауға келісім берген. 

Яннис Гогулис, зейнеткер:

-Бізде жейтін ештеңе жоқ. Олар енді нені тартып алмақшы? Жұмыс та жоқ, зейнетақымызды да бермей отыр. Бірақ ақша төле дейді. Оны қайдан аламыз?

Шығыс медицинасы дәрілерінің контрабандасы үлкен бизнеске айналды

    Жұма, 15 Желтоқсан 2017 09:49

Шығыс медицинасы контрабандасы әлемдегі ең үлкен қылмыстық бизнеске айналды.

Рейтер ақпарат агенттігінің хабарлауынша, бірінші орында шығыс елдерінде, яғни Қытай және Таиландта жасалған дәрі-дәрмектер тұр. Кәсіби дәрігерлер олардың пайдасы мен тиімділігін жоққа шығарады. Еуроодақтың кеден органдары тәркілеген табиғи тауарлардың 42 пайызын осы дәрілер құрайды екен. БҰҰ-ның есебі бойынша заңсыз дәрі-дәрмек саудасының көлемі 3,4 миллиард доллар. АҚШ-та бұл заңсыз кәсіп түрі үшінші орында.

Иэн Соува, Ұлыбритания шекара қызметінің офицері:

-Тәркіленетін емдік дәрі-дәрмектер қатарына Азиядан келетін препараттар да қосылды. Олар сан алуан денсаулыққа қажеттілері, бұлшық ет өсіруге арналғандары және басқа да түрлері көп.

Сеулде Солтүстік Кореяның ядролық шабуылынан аман қалу үшін жерасты бункері сатылып жатыр

    Бейсенбі, 14 Желтоқсан 2017 20:49

Бірақ металл құрастырылым жарнамасында бұл туралы айтылмайды.

Тек қана қалыңдығы 8 миллиметр болаттан жасалған конструкция табиғи апаттардан, ядролық және бактериологиялық қарулардан, радиоактивті сәулеленулерден және газ шабуылынан қорғайтыны айтылған. Бункерге сегіз төсек, тоңазытқыш, электр шәйнегі және азық-түлік сыяды. Ол арқылы жер астында 20 күн өмір сүруге болады. Жарықпен бункердің ішінде орналасқан күн батареясы қамтамасыз етеді. Сонымен қатар бұл жерде ауа тазартатын құрылғы мен қол электр генераторы орнатылған.

Ким Джи Хван, бункерлерді өндіруші компанияның өкілі:

– Бункерді төрт метр тереңдікке көмеміз де, үстіне бетон құямыз. Біздің ойымызша, ол ядролық жарылысқа төтеп беруі тиіс. Солтүстік Корея зымыран ұшырғанда немесе олар ядролық қарудың жаңа түрін тапқаны жөнінде хабарлағанда, тұрғындар үшін күніне жиырмаға жуық кеңес беру өткіземіз.