ҚАЗАҚСТАННЫҢ ҮШІНШІ ЖАҢҒЫРУЫ: ЖАҺАНДЫҚ БӘСЕКЕГЕ ҚАБІЛЕТТІЛІК

Алматыда «Тәуелсіздік» монументіне салтанатты түрде гүл шоқтары қойылды

    Сенбі, 16 Желтоқсан 2017 23:30
almaty.gov.kz

Алматы – тәуелсіздіктің ақ таңы атқан қала.

Бұдан 26 жыл бұрын Қазақстанның тәуелсіз ел атанғаны асқақ Алатаудың етегіндегі Алматыда жариялаған еді. Мерекеге байланысты тұрғындар, зиялы қауым өкілдері мен қоғам қайраткерлері әдеттегідей Республика алаңындағы «Тәуелсіздік» монументіне гүл шоқтарын қойды. Олар егемендіктің символына айналған монумент алдына жиналып, тарихқа тағзым жасап, тәубе етті. Ұлық мейрамға орай қала әкімдігі де арнайы іс-шаралар ұйымдастырған. Оңтүстік астанамыздың тәуелсіздік жылдары қол жеткізген жетістіктері орасан. Әлеуметтік-экономикалық өсіммен қатар халық саны да жыл сайын артып келеді. Сонымен қатар биыл шаһарда мыңдаған отбасы шаттыққа кенеліп, баспаналы болды. Бұл тәуелсіздік тарту еткен елдіктің, татулық пен бірліктің жемісі.

Рахман Алшанов, ҚР мемлекет және қоғам қайраткері:

-Біз бүгінде егемендіктің нәтижесін көріп отырмыз. Тұрақты экономика құрдық. Дамыған әлеуметтік сала, ғылым, білім, мәдениет, тізетін болсақ, көп нәрсе бар. «Нұрлы жер», «Нұрлы жол» деген бағдарламалар. Әлеуметтік саланың дамуы, үй құрылысы бойынша рекорд бұрын болмаған. Алматының өзінде үлкен жетістіктер бар. Инвестицияда 80 пайызы келіп жатыр. Қытаймен, Еуроодақпен қарым-қатынаста Қазақстанның үлесі басым.

ШҚО-да еңбегі ерен үздіктер Тәуелсіздік күніне орай марапатталды

    Сенбі, 16 Желтоқсан 2017 21:49

Жылдағы дәстүрге сай Тәуелсіздік күні еліміздің әр түкпірінде түрлі салада ерен еңбегімен ерекше көзге түскен үздіктер марапатталады.

Шығыс Қазақстанда да биыл 50 азаматтың кеудесіне орден, медаль тағылып, құшағы гүлге толды. Еліміздің тәуелсіз ел атанғанына бүгін 26 жыл. Осы уақыт аралығында Қазақстанның даңқын асырып, мерейін үстем еткен азаматтар еңбегі ұлық мереке қарсаңында елеусіз қалмады. «Парасат» орденін иемденген Әсемхан Досқожанов бұл марапаттың өзіне үлкен сенім мен зор жауапкершілік жүктегенін айтады.

Әсемхан Досқожанов, «СемАЗ» ЖШС бас директоры:

-Қазақстандағы ең үлкен тұңғыш зауыт. Қазір көп зат шығарып жатырмыз. «Қазақстанда жасалған» дейді ғой. 40 пайыз отандық өнім «СемАЗ» зауытында шығарылады. Бүгін қуанышты күн. Елбасы еңбегіміз үшін марапаттап жатыр.

Өңірдің денсаулық саласында тер төгіп жүрген белді хирург, өңірдің бас урологы Нұрқұмар Қуандықовтың еңбегі «Құрмет» орденімен бағаланды.

Нұрқұмар Қуандықов, Өскемен қалалық №1 аурухананың бөлім меңгерушісі:

-Бұл менің ғана емес, ұжымның еңбегіне берілген баға. Әріптестеріміз болмаса, айтулы жетістікке жете алмас едік. Медицина саласы дамып келеді. Қазақстанның қазынасы түсті металлургиямен бағалы. Сондықтан бұл күні «Казцинк» кәсіпорнының да қанжығасы майланды. Өңірдің әлеуметтік түлеуіне сүбелі үлес қосуымен ерекшеленіп жүрген алып өндіріс ошағы салаға 11 млрд теңге құйған.

Никола Попович, «Казцинк» ЖШС директорлар кеңесінің төрағасы:

-Жиырмадан аса білім, спорт, денсаулық нысанының бой көтеруіне септестік. Мемлекетке қолдау көрсетуіміз керек. Халықтың тұрмысын түзеуге біздің үлесіміз тие бермек.

Тәуелсіз Қазақстанның абыройы – еңбекқор азаматтар. Ал еңбек қашан да бағаланатыны сөзсіз.

Авторлары: Мерей Мұратханқызы, Аслан Төлепов

Маңғыстау облысында жастар Тәуелсіздік күніне орай патриоттық акция өткізді

    Сенбі, 16 Желтоқсан 2017 18:33

Қазақстан Республикасының Тәуелсіздігінің 26 жылдығына орай Маңғыстауда жастар акциясы өтті.

Шараның мақсаты – өңір жастарының сана-сезімін асқақтатын патриоттық рух қалыптастыру. Акцияда Маңғыстау облысының белсенді жастары ұзындығы 15 метр, ені 7 метр болатын мемлекеттік ту мен ұзындығы 10 метр, ені 6 метр болатын Рухани жаңғыру туын алып, Тәуелсіздік көшесі бойының «Мәңгілік алау» жанынан Ақбота саябағына дейін шерулеп жүріп өтті.

Шеруге өңірлік жастар ұйымдарының жетекшілері, жастар бірлестіктері мен одақтарының жетекшілері, жастар ресурстық орталықтарының қызметкерлері, Маңғыстау облысы бойынша ҰҚК шекара қызметі «Жағалау күзеті» қызметінің әскерилері қатысты.

Ұйымдастырушылардың айтуынша, акция жастардың патриоттық руxын көтеріп, оларды ұлттың қуатын қалыптастыра алатын мемлекеттің стратегиялық ресурсы екенін көрсетуді көздейді.

Шара Маңғыстау жұлдыздарының қатысуымен өткен концертке ұласты. 

Маңғыстау облысы әкімінің баспасөз қызметі

Б.Сағынтаев ҚР АШМ ұжымына жаңа министр Ө.Шөкеевті таныстырды

    Сенбі, 16 Желтоқсан 2017 16:12
primeminister.kz

«Мемлекет басшысының Жарлығымен Өмірзақ Естайұлы Шөкеев ҚР Премьер-Министрінің орынбасары – ауыл шаруашылығы министрі болып тағайындалды», - деп мәлімдеді Премьер-министр.

Бақытжан Сағынтаев Асқар Мырзахметовке бірлесіп атқарған нәтижелі жұмысы үшін алғыс білдіріп, еліміздің ауыл шаруашылығы саласын дамытуға қосқан елеулі үлесін атап өтті.

«Министрліктің алдында Агроөнеркәсіптік кешенді дамытудың мемлекеттік бағдарламасын іске асыру секілді өте маңызды міндеттер тұр», — деді Премьер-министр Өмірзақ Шөкеевті таныстыра отырып — Мемлекет басшысы Қазақстан халқына Жолдауында аграрлық сектор экономиканың жаңа қозғаушы күшіне айналуы тиіс екенін айтып өтті. Президен ауыл шаруашылығы өнімдерін өңдеу, түсімді арттыру, еңбек өнімділігін ұлғайту және саланың экспорттық мүмкіндіктерін дамытуды қамтамасыз етуге ерекше назар аударуды тапсырды. Ауыл шаруашылығы министрлігі жұмыс қарқынын күшейтіп, жеделдетуі керек. Негізгі басымдық — жоғары сапалы және бәсекеге қабілетті өнім өндіру».

Б. Сағынтаев жаңа министрге және министрлік ұжымына табыс тілеп, алға қойылған міндеттерді іске асыруға белсене араласып, барынша күш жұмылдыру қажеттігін айтты.

primeminister.kz