ҚАЗАҚСТАННЫҢ ҮШІНШІ ЖАҢҒЫРУЫ: ЖАҺАНДЫҚ БӘСЕКЕГЕ ҚАБІЛЕТТІЛІК

Норвегияда Нобельдің бейбітшілік сыйлығы табысталды

    Жексенбі, 10 Желтоқсан 2017 21:56
AP

Норвегияның Осло қаласында Нобель сыйлығын тапсыру салтанаты өтті. Нобельдің 2017 жылғы бейбітшілік сыйлығы Ядролық қаруға тыйым салу жөнінен халықаралық қозғалыс (International сampaign to abolish nuclear weapons -ICAN) өкілдеріне табысталды.

ICAN жүзден астам елдегі үкіметтік емес ұйымдардың басын біріктіреді. Құрмет грамотасы, нобельдік медаль мен шведтің 9 млн кроны (бұл шамамен 1,1 млн АҚШ доллары) болатын чек ICAN-ның атқарушы директоры, Швеция азаматшасы Беатрис Финге, сондай-ақ 85 жастағы жапондық Сэцуко Тэрлоуға табысталды.

Айта кету керек, Сэцуко Тэрлоу жас күнінде Хиросимаға жасалған атомдық бомбалауды өз көзімен көрген және көптеген жыл бойы ядролық қаруға тыйым салу жолында күресіп келеді.

ICAN-ның басты үндеуі: «Ядролық қарудан бас тартпайынша әлем қауіпсіз болмайды».

nobelprize.org

Неаполитан пиццасы ЮНЕСКО-ның мәдени мұра тізіміне енгізілді

    Жексенбі, 10 Желтоқсан 2017 19:47
Pinterest

Оңтүстік Кореяда өткен отырыста ЮНЕСКО комитеті осындай шешімге келді. Италия 7 жыл бойы осы мәртебеге жету үшін барын салып, нәтижесінде 2 миллионнан астам адамнан қол жинаған.

Пиццайоло деген кімдер? Нағыз пицца қалай жасалады және тағамның бұл түрі неліктен танымал?

Ұн, табиғи ашытқы, су және тұз. Осы төрт азықтан неополитандықтар бүкіл әлемнің сүйікті тағамын ойлап тапты. «Пицца – ол да қолөнердің бір түрі. Өйткені оны жасауға асқан шеберлік қажет», – дейді аспаздар.

Пицца – Неапольдің кедейлер тұратын ауданында ойлап табылған тағам. Мұнда 128 жыл бұрын Раффаэле Эспозито пайдаланған пеш әлі күнге дейін жұмыс істеп тұр. Белгілі аспаз Италия ханшайымы Маргарита Савойская үшін қызанақ, моцарелла ірімшігі мен райханнан шелпек әзірлеп берген. Кейіннен бұл жұқа нанға патшайымның аты берілді. Енді ол «Маргарита» пиццасы» деп аталады.

Пицца таңғы, түскі және кешкі асқа да беріледі.

Авторы: Юлия Гончар

Пхёнчхандағы Олимпиада кезінде ең суық ауа райы болуы мүмкін

    Жексенбі, 10 Желтоқсан 2017 16:36
https://besthqwallpapers.com/sport/

Мамандардың айтуынша, бұл соңғы ширек ғасырдағы ең суық мезгіл болғалы тұр. Олимпиаданың ашылу рәсімінде ауа температурасы минус 7 градусқа дейін төмендейді екен.

Оның үстіне жел қатайып, сынап бағанасы минус 14 градусты көрсетеді деген болжам бар. Он мыңдаған спортшы, қала қонақтары мен еріктілер суықта 5 сағатқа жуық уақыт тұруға мәжбүр болмақ. Ал ұйымдастырушылар болса, стадион маңына желден қорғайтын арнайы әйнектер орнатып, көрермендерге жылы жамылғылар үлестірмек.

Естеріңізге сала кетейік, қысқы Олимпиада ойындары Пхёнчхан қаласында келесі жылы 9-25 ақпан аралығында өтеді.

«Бұл мәселені түбегейлі шешу мүмкін емес. Тек уақытша шаралар қолдануға болады. Стадион үстіне шатыр орнатылмайды, оны қолға алғанның өзінде уақыт жетпейді», – дейді Олимпиада комитетінің мүшесі Сим Ки Джун.

Францияда жарықшамдар фестивалі өтіп жатыр

    Сенбі, 09 Желтоқсан 2017 20:35
FotoRelax.RU

Францияның Лион қаласында жарықшамдардың дәстүрлі фестивалі өтіп жатыр.

Шаһар тұрғындары мен қонақтары үшін мұндағы нысандар электр лампалары арқылы алуан түрлі түске боялған. Қалаға келген қонақ міндетті түрде бас сұғатын нысанның бірі қасиетті Ионна шіркеуі неонды жарықшамдармен өрнектелген. Шаһарға мерекелік көрік беру мақсатында олар орталық алаң, танымал нысандар мен көше бойларын безендірген.

Айта кетейік, 2015 жылы Париждегі қанды оқиғадан кейін дәстүрлі фестиваль өткен емес. 2016 жылы қысқа форматта ғана өткізуге рұқсат етілген. Ал билік биылғы шараны толассыз 4 күн тойлауға ерік беріп отыр.

Хелен Иствуд,  суретші:

– Менің ойымша, бұл жобаның өзіндік мән-мағынасы бар. Оған Unisson деген атау берілген. Яғни бәріміз біргеміз. Жоба сан алуан адамдардың таланты мен шығармашылық қарым-қабілетін біріктіріп, жаңаша дүние жасап шығару қолымыздан келетінін дәлелсе керек.