Астана ХҚО елімізге 5 миллиард АҚШ долларын тартады

    Сәрсенбі, 31 Қаңтар 2018 16:12

Астана халықаралық қаржы орталығы алдағы 5 жылда кемі 5 миллиард АҚШ долларын тартады.

Ал он жылдан кейін 40 млрд долларға жетпек. Бұл туралы қаржы орталығының басқарушысы Қайрат Келімбетов мәлімдеді. Айтуынша, орталыққа үш жыл мемлекет бюджетінен жылда 20 миллиард теңге бөлінеді. Орталық «ЭКСПО» көрмесінің ғимаратына әлі толық көшкен жоқ. Ресми тұсаукесері 5 шілдеде өтеді.

Қайрат Келімбетов, «Астана» Халықаралық қаржы орталығының басқарушысы:

- Халықаралық қаржы орталығының биржасы 3-5 жылдың ішінде өз-өзін ақтайтын дәрежеге жетеді деген жоспар бар. Содан бастап бюджеттен бөлінетін ақша біртіндеп азаяды. Қазір біздің штат 100 адамнан аспайды. Олардың 90 проценті Қазақстан азаматтары. Көбісі жастар, олардың барлығы кем дегенде, ағылшынша еркін сөйлейді. Көбісі бірнеше тілді меңгерген. Ал xалықаралық қатынастар департаментінің мамандары қытай тілін де біледі.

ҚР Үкіметі мен ҚР Ұлттық банкі бірлескен мәлімдеме қабылдады

    Сейсенбі, 30 Қаңтар 2018 11:27

Үкімет пен Ұлттық банк бірлескен мәлімдеме қабылдады.

Ол жайында бүгін Үкімет отырысында айтылды. Еліміздің Ұлттық экономика министрі Тимур Сүлейменовтың айтуынша, бұл жоба Қазақстанның 2018 жылдағы макроэкономика мен қаржылық несие саясатының басымдығын халыққа кеңінен түсіндіру жайында. Сала жетекшісінің сөзінше, жүргізіліп жатқан экономикалық саясат биыл елімізде жыл соңына қарай инфляция деңгейін 5-7 пайыз дәлізінде ұстап қалуға мүмкіндік береді. «Елбасы Қазақстан халқына арнаған Жолдауында жүктеген міндетке сай, 2018 жылы экономиканың дамуына: макроэкономикалық тұрақтылықты сақтау, қолайлы бизнес климат жасау, сандық компоненттер мен экономика салаларын  және көлік-логистика инфрақұрылымын жетілдіру бағыттары негіз болмақ», – дейді Тимур Сүлейменов.

Тимур Сүлейменов, ҚР Ұлттық экономика министрі:

– Бұл ретте азық-түліктік және азық-түліктік емес тауарлар бағасының, монополистер қызметі тарифінің негізсіз өсуіне жол бермеу Үкіметтің жіті бақылауында болады. Сонымен қатар қолдан дефицит жасамауға да көңіл бөлеміз. Биыл бюджеттік саясат экономиканың өсуіне, мемлекеттік-жекеменшік әріптестікті арттыру мен мемлекеттік қаржының тұрақтылығын қолдауға бағытталады.

«Астана» ХҚО өкілдері Давос форумына қатысты

    Жұма, 26 Қаңтар 2018 21:57

«Астана» халықаралық қаржы орталығының өкілдері Давос форумына қатысты.

Бүкіләлемдік экономикалық форумда орталықтың басқарушысы Қайрат Келімбетов бастаған қазақстандық тарап «Жаңа істе жеңіске ұмтылу» тақырыбында панельдік пікірталас ұйымдастырды. Онда елдегі реформалар туралы айтылды. Сондай-ақ дамушы елдердің инвестициялық тартымдылығы талқыланды.

Қайрат Келімбетов, «Астана» халықаралық қаржы орталығының басқарушысы:

– Бизнес өкілдерін дамушы нарықтарға көп көңіл бөлуге шақырамын, жаңа мүмкіндіктерді зерттеп, қазіргі қаржы жүйелеріне жаңа дем беру қажет. «Астана» халықаралық қаржы орталығы өз кезегінде инвесторлармен серіктестік орнатуға әзір, Еуразия кеңістігінде ынтымақтастық жасауға да ниетті.

ЕАЭО-ға мүше елдер ГМО өнімдеріне талапты күшейтпек

    Жұма, 26 Қаңтар 2018 19:35

Еуразиялық экономикалық одаққа мүше елдер құрамында гендік модификацияланған организмдер бар өнімдерге талапты күшейтпек.

Енді ГМО көлемі қалыпты 0,9%-дан асып кеткен өнімнің қорабында «ГМО» таңбасы үлкен әріптермен жазылады. Бұрын мұндай жазу ұсақ әріппен берілетін.

Еуразия экономикалық комиссияның баспасөз қызметі осылай хабарлады. 5 елге ортақ ереже осы жылдың соңында күшіне енеді. Ал әлемдік ғылыми қауымдастық әлі күнге гендік түрленген өнімдердің пайдасы мен зияны туралы біржақты шешім шығара алмай отыр.

Гендік модификация: «иә» немесе «жоқ». Әлем қақ жарылып тұр. «ГМО мәдениеттің» бастауы сонау 80-жылдары десек те, әлемдік ғылыми қауымдастық әлі күнге ортақ тұжырымға келген жоқ. Бірі – бұл адамзатты аштықтан аман алып қалудың жолы десе, енді бірі керісінше, ГМО адамзатқа жасалған қастандық деп есептейді.

Гендік модификацияланған өнімді бір кісідей зерттеп келе жатқан академик Төрегелді Шарманов ГМО-ны қолдайды. Мұндай өнімдер рак ауруын тудырады, ағзаны улайды дегенмен де келіспейді қарт ғалым. Себебі адамның гені тамақтан бұзыла салатындай әлсіз емес.

Төрегелді Шарманов, Қазақ тағамтану академиясының президенті:

– Ағза ерекше құрылған 4 кезеңнен тұрады. Оның біреуінен өтсе, екіншісінен өте алмайды. Сондықтан қауіп жоқ. Сондықтан одан қорқуға да болмайды. Одан қауіптеніп, біз осындай болып қалдық деген бұл ғылымға сәйкес келмейтін қате ұғым.

Қазір әр елде ГМО қоспасын тағамда пайдаланудың өзіндік деңгейлері бар. Мысалы, Жапонияда –ол 5%, кейбір Еуропа елдерінде – 0,9%, АҚШ-та – 10% ГМО қоспасын пайдалануға рұқсат етілген. Қазақстанда ГМО мөлшері 0,9% деп бекітілді. Былтыр мамандар 1918 азық-түлік өнімін тексерсе, соның 11-інен ГМО табылған.

Дана Қасқатаева, ҚР Денсаулық сақтау министрлігінің бас сарапшысы:

– Мынау өнім ғой, сыртында ГМО бар ма, жоқ па жазылып тұрады. Жазылғаны шын ба деп, қараймыз да тексереміз. Мониторинг шеңберінде жалпы 20 тоннадан астам сәйкес келмейтін өнімдер, оның ішінде ГМО-сы бар өнімдер алынып тасталды. 25 млн теңге көлемінде айыппұлдар салынды.

Гүлжан Марқабаева, тілші:

– Мамандар құрамында ГМО-сы көп тағамдардың тізімін анықтады. Олардың қатарында таңғы құрғақ астар, тез дайындалатын лапшалар мен жүгері ұны бар. Олардың дені мұхит асып келген. Олардың құрамындағы ГМО-ның көрсеткіші қалыпты 0,9% асып, кейбіреуінікі тіпті 40%-ға дейін жеткен.

Қарсылықтарға қарамастан, соңғы жылдары ГМО мәдениеті кең тарала бастады. Канада әлемде ГМО-рапс өндіруден алда тұр. Ал батыстың кейбір елдері осындай тағамдарды тұтынуға мәжбүр. Себебі органикалық таза тағамдардың бағасын қарапайым халықтың қалтасы көтермейді.

Шынболат Рсалиев, Қазақ егіншілік және өсімдік шаруашылығы ҒЗИ бас директорының орынбасары:

– Ауыл шаруашылығы дақылдары бойынша, мысалы, соя, қант қызылшасы, рапс бойынша әлемде жетекші ГМО егетін елдер бар. Олар Америка, Мексика, Канада. Жылдан жылға оның санын көбейтіп жатыр. Сол деректерге қарап отырмын, ГМО қолдану жылдан жылға етек жайып келеді. Оған біз қарсымыз ба, қарсы емеспіз бе оған қарамайды.

ГМО-ға табанды қарсылық танытып жүрген қазақстандық биолог – Евгений Климов. «Гендік түрленген өнімдер – ұлтты ұрпақсыз қалдыратын үлкен қауіп», – дейді ол.

Евгений Климов, «KazFOAM» органикалық ауыл шаруашылығы қозғалысы федерациясының төрағасы:

– Әлі күнге дейін ғылыми нақтылық жоқ. ГМО-ның қауіпті екенін дәлелдейтін жұмыстар бар, бірақ оны жоққа шығаратын да ғылыми жұмыстар көп. Оның үстіне ГМО өндірушілері ұзақмерзімді зерттеулермен айналыспайды, олар жүргізген зерттеудің ең ұзағы 90 күн ғана. ГМО денсаулыққа қауіпті. Тәжірибеге қатысқан көртышқандардың екінші және үшінші ұрпақтары көбею мүмкіндігінен айырылған. Қалай дегенмен де, әлем қазір органикалық өнімге бәс тігіп отыр. Оның нарығы қазір 90 млрд АҚШ долларына тең.

Бір қызығы, гендік түрленген өнімдерге қарсылық танытушылардың қатары артқан сайын оны жақтаушылардың да саны көбейіп барады. Ал «ауру – астан» деп түсінген қазақ мұндай тағамға бәрібір күмәнмен қарайтыны анық. Оның үстіне қазақтың кең байтақ жері ат төбеліндей аз халықты табиғи таза тағаммен қамтуға қабілетті.

Авторлары: Гүлжан Марқабаева, Алма Оразбаева, Аманжол Байғазин