22:40 Әрі қарай эфирде: Қорытынды жаңалықтар
×

Warning

JUser: :_load: Unable to load user with ID: 143
JUser: :_load: Unable to load user with ID: 144
+7 (7172) 757 540
astananews@khabar.kz

«Астана Опера» театры Кувейтте өнер көрсетеді

    Жексенбі, 14 Қаңтар 2018 09:29

Кувейт мемлекетінің астанасы Эль-Кувейт қаласында осы елдің мәдениет, өнер және әдебиет ұлттық кеңесінің ұйымдастыруымен XXIV халықаралық мәдени фестиваль басталды.

Бұл айтулы шараға дүниенің төрт бұрышына ең танымал деген өнер ұжымдары қатысып жатыр. Мақсат – халықтар арасында мәдени, рухани үндестік құрып, ынтымақтастықты арттыру. Осы фестивальдің аясында Абду-мухси Абдуриза атындағы театрда алғаш рет Қазақстан атынан «Астана Опера» мемлекеттік опера және балет театрынының ұжымы концерт береді. Кеште атақты опера әншілері Майра Мұхамедқызы, Медет Чотабаев, Айсұлу Әбілханова мен домбырашы, дирижер Руслан Баймурзин өнер көрсетеді. Концертте классикалық музыканың үздік шығармаларымен қатар отандық композиторлардың тырнақалды туындылары да орындалады. Қазір өнерпаздар Кувейттің талғампаз көрермендерінің көңілін баурау үшін соңғы дайындықтарын пысықтап алды.

Абзал Мұхитдин, «Астана Опера» театрының дирижері:

– Бүгінгі бағдарламамызда әлемдік шығармалармен қатар қазақ туындылары да орындалады. Оның ішінде Абайдың, Құрманғазының және Нұрғиса атамыздың белгілі «Аққу» және «Баламишка» шығармасы бар. Концертімізді өнерсүйер қауым жылы қабылдайды деп ойлаймын.

Елбасы туралы фильмнің алтыншы бөлімі жыл соңына қарай көрерменге жол тартпақ

    Сәрсенбі, 10 Қаңтар 2018 11:38

«Көшбасшы жолы». Елбасы туралы фильмнің 6-бөлімі жыл соңына қарай көрерменге жол тартпақ.

Ал қазіргі таңда киноның бас режиссері Ақан Сатаев бастаған шығармашылық топ туындының түсірілімін жалғастыруда. Фильм 1994-1998 жылдарды қамтымақ. Мұнда Мемлекет басшысының елорданы Алматыдан Астанаға көшіру туралы шешімі де көрініс тапқан.

Бұл Елбасы туралы киноның 6-бөлімі болмақ. Қазір түсірілім барысы қызған. Бұған дейін шығармашылық топ киноэпопеяны Алматы қаласында түсірген болатын.

Ақан Сатаев, фильм режиссері:

– Негізі біз 1994-98 жылдарды қамтимыз. Астананың көшірілу мерзімін. Басты кейіпкеріміз – Елбасы. Оны сомдап жатқан Мұрат Ахманов дейтін актеріміз. Ол кісімен бұған дейін де жұмыс істедік. Астанада астаналық сахналарды түсіріп жатырмыз. Қыстық сахналарды.

Елорданың Алматыдан Астанаға көшірілуі – тарихи сәт. Осыдан 20 жыл бұрын қабылданған ауқымды шешімді бір фильмде көрсету, сол кезеңді айна-қатесіз көрерменге жеткізу – түсірілім тобының басты мақсаты.

Айта кету қажет, фильмнің сценарийін құруға Астана қаласының бірінші әкімі Әділбек Жақсыбековтың өзі тікелей араласқан. Сонымен қатар 1994-98 жылдары Елбасымен бірге жұмыс істеген азаматтар да шығармашылық топқа кеңесші ретінде қызмет көрсетуде.

Ілияс Саймасов, 1994-1998 жж. Президент күзетінің қызметкері:

– Түсіріліп жатқанның 90 пайызға жуығы – шынайы өмірде болған оқиға. Барлығын еш өзгеріссіз жасауға тырысып жатырмыз. Бұл фильмдегі кей көріністер Президенттің жеке өмірі туралы.

Фильмде ойнайтын актерлердің құрамы мықты. Туынды режиссері олардың гримдалған бет-әлпетін құпия ұстауда. Ал актерлердің сомдап жатқан кейіпкерлеріне ұқсауы шетелдік маманға сеніп тапсырылған. Ол үшін «Оскар» сыйлығының иегері, британдық гример Марк Кульер шақыртылған. Маман бұрындары Уинстон Черчилль, Маргарет Тэтчер сынды саяси тұлғалардың бейнесін келтірген.

Марк Кульер, гример:

Бас кейіпкердің бет-әлпетін жасауға 6-8 апта уақыт кетті. Президент Нұрсұлтан Назарбаевтың түрін максималды түрде ұқсатуға тырыстық. Ол үшін көп мөлшерде жапсырма грим қолданылды. Грим жасайтын кейіпкерлеріміздің саны 16.

«Көшбасшы жолы» киноэпопеясының 6-бөлімі көрермендерге жыл соңына қарай жол тартады деп жоспарлануда. Туынды әдеттегідей екі тілде жарыққа шығады.

Ғалымдар: Астананың 1000 жылдық тарихы бар

    Дүйсенбі, 08 Қаңтар 2018 22:33

Алматыдағы Мемлекеттік орталық музейде «Нұрсұлтан Назарбаев: дәуір, тұлға, қоғам» көрмесі аясында дәріс өтті.

Онда студенттерге көрменің мәнін ашатын тың деректер, маңызды мәліметтер ұсынылды. Елорда тарихына жеке тоқталған ел ғалымдары: «бас шаһардың 1000 жылдық тарихы бар», – деді. Және бұл дерек әлдеқашан ғылыми түрде дәлелденгендігін алға тартты. Айтуларынша, «Астананың тарихын 1830 жылы Ресей империясы құрған Ақмола бекінісінен бастау қате». Шетелдік зерттеушілердің еңбектерінен Сарыарқа жерінде болған тарихи қалалар туралы көп әмілметтер кездестіруге болады, – дейді олар. Тұңғыш Президенттің кітапхана қоры негізінде ұйымдастырылған жылжымалы көрме 14 қаңтарға дейін жалғасады. 

Зиябек Қабылдинов, тарих ғылымдарының докторы, профессор:

- Біздің Астанамыздың тарихы мың жылға барады. Мысалы, Бозоқ деген қыпшақтың қаласы 1000 жыл бұрын осында болған. Мәдени әкімшлік, діни экономикалық орталық болған. 1816 жылы осы Ақмола маңайында Ресейдің мықты геодезисі, зерттеушісі Иван Шанкин деген азамат болған. Сол ескі қалалардың жетеуін тауып алып, картаға сызып кеткен.

2017 жыл қазақ киносы үшін жемісті болды

    Сәрсенбі, 03 Қаңтар 2018 20:51

Шәкен Айманов атындағы «Қазақфильм» киностудиясында түсірілген 20-ға жуық толықметражды көркем фильм мен 24 деректі киноның көпшілігі халықаралық жүлделерге ие болған.

Биыл таспаланған кино туындылардың қатарында шоқтығы биік көрінгені – режиссер Рүстем Әбдірашевтің «Қазақ хандығы. Алмас қылыш» тарихи драмасы. Бұл фильм көрерменнің де, киносыншылардың да жоғары бағасын алды.

Топ жарған тағы бір тарихи туынды – режиссер Сәбит Құрманбековтың «Оралман» көркем фильмі. Өткен ғасырдың 30-шы жылдары қызыл әскердің жендеттерінен Ауғанстанға қоныс аударуға мәжбүр болған қазақ отбасының оқиғасы әсерлі баяндалған. Ол жыл басында Иранда өткен халықаралық Фаджр кинофестивалі мен «Еуразия» кинофестивалінің бас жүлдесін жеңіп алды.

Сәбит Құрманбеков, кинорежиссер:

- Мен жақында Германияда болдым. «Мангейм» деген кинофестивальде. Сол жерге өзіміздің жерлестер, немістер келді. Бұл оқиға оларға да тиесілі. Тек қазақтарға ғана тиесілі емес. Бүкіл әлемде қазір босқындар бар, Отанынан айрылғандар бар. Барлығына ортақ, ұқсас тағдыр.

Ұжымдастыру жылдарының тәлкегі, қазақты түбірімен жоя жаздаған ашаршылық, екінші дүниежүзілік соғыс азабы. Тұтас үш дәуір тынысын жеткізген режиссер Ақан Сатаевтың бұл туындысы бұған дейін бірнеше шетелдік жүлделерді қанжығасына байлаған. Биыл отандық «Тұлпар» ұлттық сыйлығын иеленді.

Ақан Сатаев, кинорежиссер:

- Шынымды айтсам, аздап ыңғайсызданып тұрмын. Көп рахмет! Бұл – біз үшін үлкен баға. Сенім артқандарыңызға алғыс айтамын. Әріптестердің бағалауы екі есе қуантады.

«Қазақфильм» киностудиясының келер жылы көрерменге ұсынар дүниелері де қомақты. Режиссер Рүстем Әбдірашевтің «Қазақ хандығы» тарихи киноэпопеясының екінші маусымы түсірілуде. Сондай-ақ Ақан Сатаевтың ел астанасының қазығы қағылған сәттен бастап бүгінгі көркейген келбетін бейнелейтін «Бейбітшілік кіндігі» фильмі келер жылы көрерменге жол тартады.

Айнұр Исаева, «Қазақфильм» киностудиясының баспасөз қызметінің жетекшісі:

- Қытайлармен бірлескен үлкен көркем фильміміз бар. Ол «Композитор» деп аталады. Ол – Сисин Хай мен біздің Бақытжан Байқадамовтың достығы туралы фильм. Америкамен бірлескен фильміміз «Әміре» деп аталады. Ол өздеріңіз білетіндей, Әміре Қашаубаевқа арналған көркем фильм болып отыр. Бұл фильмдердің барлығы алдымыздағы жылы шығып, көрермен назарына ұсынылатын болады.

Гүлжан Көленқызы, тілші:

- Биыл Шәкен Айманов атындағы «Қазақфильм» киностудиясы 18 толықметражды көркем фильм түсірген. Бұдан бөлек, жекеменшік кинокомпаниялардың жарыққа шығарған телехикаялары көрерменді мезі еткен телеэкрандағы үнді, корей, түрік сериалдарын алмастыра бастағанын айта кеткен жөн. Демек, отандық киноиндустрия елге етене жақын тақырыптарға бет бұрды деуге болады.

Авторлары: Гүлжан Көленқызы, Сержан Жұмабаев