ҰОС кезінде жоғалған жауынгерлердің жерленген орнын іздеушілер кезекті сапарға жол тартпақ

Топ мүшелері Ресейдің Новгород облысына аттанбас бұрын оқушылармен кездесті.  

Александр Азегов қан майдан алаңдарына жасаған сапарларын таңды таңға жалғап айта алады. «Саланг» әскери-патриоттық клубының мұражайында өткен ғасырдың 41-45-ші жылдардың қару-жарақтарынан бастап, жауынгерлердің жеке заттарына дейін қойылған. Компьютер ойындарындағы атыс-шабыстан көз алмайтын оқушылар бүгін нағыз соғыстың куәгерлерімен танысты. 

Дарья Тютюнова, мектеп оқушысы

-Соғыс жәдігерлері санама салмақты ой салды. Қанша адам құрбан болған. Біз оларды ұмытпауымыз керек. Бүгінгі бейбіт күн сол ата-бабаларымыздың қанымен келді.

Сұрапұл соғыстан сыр шертетін жәдігерлер – осындағы іздеушілердің тірнектеп тапқаны. Александр Азегов бастаған топ ширек ғасырда 2 мыңнан астам жауынгердің сүйегін қайта жерледі.

Александр Азегов, «Саланг» әскери-патриоттық клубының жетекшісі

-Қазба жұмыстары кезінде адам қаңқаларының, қол немесе аяқ сүйегіне тап болсақ, төбеміз көкке жетеді. Ең бастысы - бойтұмарын тауып алу. Онда жауынгердің аты-жөні жазылған.

Салангтың сайыпқырандары кезекті сапарларына дайындалып жатыр. Осы жылы да олар Ресейдің Новгород облысына аттанады. Дәнекерлеуші, электромонтер, қарауыл секілді қарапайым мамандық иелерін біріктірген мақсат – сұм соғыстың сырын ашу. Бұл жолғы жорыққа оқушы қыздар да қосылды.  

Ильнур Габидуллин, іздеуші

-Осы жылы бармаймын деп ойлағанмын, алайда жолдасым рұқсат беріп, қуанып қалдым. Енді жолдың қамына кірісу керек.

Айдарбек Айтмұхамбетұлы, тілші

-Петропавл қаласында құрылған іздестіру тобы өткен жылы ресейліктермен бірге 503 жауынгердің сүйегін тауып, 26-ның аты-жөнін анықтады. Олардың үшеуі – қазақстандық. Қан майданда із-түзсіз жоғалғандардың ұрпақтары іздеушілердің осы жолғы жорықтарынан да жағымды жаңалық күтеді.

Авторлары: Айдарбек Айтмұхамбетұлы, Төлеген Иманов, Вадим Пятков, Дмитрий Рура