Қазақстандық оқушылардың бірнеше буыны армандаған, талай дарынның жұлдызын жаққан "XXI ғасыр көшбасшысы" зияткерлік жобасы қайта эфирге оралады. Жаңа маусым 28 наурыздан бастап әр сенбі сайын сағат 14:00-де "Хабар" арнасында көрсетіледі.
Биыл жобаға еліміздің түкпір-түкпірінен 20 мыңнан астам оқушы қатысуға ниет білдірді. Іріктеудің бірнеше кезеңінен өткен 108 үздік оқушы ғана эфирге жолдама алды. Бұл — білім мен табандылық сынға түсетін ең шешуші сәт.
Жаңа маусымның басты ерекшелігі — инновация. Шешуші кезеңдегі сурет-сұрақтар алғаш рет жасанды интеллект көмегімен әзірленді. Бұл жоба форматының жаңарып, заманауи технологиялармен үндескенін көрсетеді.
Финалда қатысушылар Сүлейман Демирел университеті (SDU), Л.Н. Гумилев атындағы Еуразия ұлттық университеті және әл-Фараби атындағы ҚазҰУ гранттары мен ақшалай сыйлықтарды жеңіп алуға мүмкіндік алады.
"XXI ғасыр көшбасшысы" — бұл жай ғана телевизиялық ойын емес. Бұл — Қазақстанның жаңа интеллектуалдар буыны қалыптасатын алаң.
Сенбі, 14:00 — "Хабарды" қосуды ұмытпаңыз!
Білімді бол, көш баста!