Ташкентте математика мен информатикадан халықаралық олимпиада өтті. Қазақстан ұлттық құрамасы жалпы командалық есепте жүлделі орыннан көрінді. Жерлестеріміз математикадан 4, информатикадан 2 алтын еншіледі. Күміс пен қола медальдары тағы бар.
Жалпы Қазақстаннан Ташкенттегі сайысқа 4 команда қатысты. Оның біреуі ұлттық құрама болса, үшеуі жеке мектептердің атынан шықты. Енді математикадан әлемдік дода шілде айында Австралияда басталады.
Ибрагим Ибатулин, Қазақстан ұлттық олимпиада құрамасының жетекшісі:
- Жақсы нәтиже көрсеттік деп ойлаймын. Себебі сайысқа қатысушылардың деңгейі өскен. Бәсекелестік жоғары. Мәселен, былтыр математикадан ең жоғарғы көрсеткіш 42 болса, биыл 80-нен 68 ұпай жинағандар тіркелді. Көптеген елдерден оқушылар қосылды. Малайзия, Түркия, Әзербайжаннан келіпті. Оқушылар үшін бұл олимпиада жақсы тәжірибе болды.
Нұрислам Дүйсенғали, математикадан халықаралық олимпиада жүлдегері:
- Олимпиада өте қызық өтті. Мен математика пәнінен жеңдім. Есептер өте қызық болды. Бұрын мұндай тапсырманы шешіп көрмеппін. Мен үшін бұл алғашқы халықаралық олимпиада және мен орын алып тұрмын.
