+7 (7172) 757 540
astananews@khabar.kz

ҚазҰУ-да құны 1 млрд доллар болатын инвестициялық жобалар жүзеге асады

ҚазҰУ-да құны 1 млрд доллар болатын инвестициялық жобалар жүзеге асады

Әл-Фараби атындағы Қазақ ұлттық университеті күннен-күнге көркейіп келеді.

Мәселен, қазір оқу орны IT, инновациялық және медициналық-биологиялық кластерлерді қамтитын «Әл-Фараби» ғылыми-технологиялық алқабын құруға кірісті. Бүгін ұлттық университет түркиялық ірі компаниямен қажетті нысандардың құрылысын бастау туралы ұзақ мерзімді инвестициялық келісімге қол қойды.

Келісім кезең-кезеңімен іске аспақ. Ал инвестицияның жалпы сомасы – 1 миллиард АҚШ долларына тең. Бірінші болып 500 орындық көпсалалы клиникалық орталық салынады.

500 орындық көпсалалы клиникалық орталық университет қалашығында бой көтереді. Оған арнайы жер телімі бөлінген. Орталықта заманға сай ғылыми-зерттеу зертханада болады. Бұл инвестициялық жоба болған соң түркиялық компания оны алдағы 30 жылда ұлттық университетпен бірігіп басқаруға мүдделі.

Осман Мимарсинаноғлы, түркиялық инвестор:

– Әл-Фараби атындағы Қазақ ұлттық университеті ислам және түркі әлеміндегі ең үздік жоғарғы оқу орындарының бірі саналады. Біздің мақсатымыз – университетпен ұзақмерзімдік әріптестік қарым-қатынас орнату. Ал клиникалық орталықтың құрылысын жазда бастасақ деп отырмыз. Құрылыс мерзімі 2-3 жылға жалғасуы ықтимал.

Клиникалық орталықта еліміз бен шетелдің студенттері білім алады. Теориялық білімдерін тәжірибемен ұштастырып, дәрігерлік мамандық бойынша жұмысқа да орналасады. IT, инновациялық және медико-биологиялық кластерлерді дамыту заманауи технологиялар трансфертін жүзеге асырып, менеджменттің озық тәжірибесін пайдалануға мүмкіндік береді.

Ғалымқайыр Мұтанов, Әл-Фараби атындағы ҚАЗҰУ ректоры:

– Клиника негізінде жақсы білім, тәжірибе алып, әлемдік деңгейде жақсы қалыптасатын мамандар болады деген сенімдеміз. Ол тек қана мамандар дайындау емес, жақсы технологияларды тарту. Бұл жерде бұрынғы модельден біз кету керекпіз. Тек қана мамандар дайындап , дипломын беріп, одан кейін жұмыс іздеңдер дейтін. Ол ертең бәсекеге қабілетті ме, ертең жұмысқа орналаса ала ма? Сондықтан білім, ғылым, технология қатар жүреді. Сол негізде мамандар дайындалады.

Шартқа сәйкес инвестор нысандарды салып, қажетті құралдармен жабдықтайды және мемлекет меншігіне тапсырады. Аталған жобалар жүзеге асатын болса, 500-ге жуық жаңа жұмыс орындары ашылмақ.

Авторлары: Алмас Садуақас, Әбен Нарынбаев

Сондай-ақ...