Әзербайжан Милли Мәжілісінің Спикері Сагиба Гафарованы қабылдау барысында Мемлекет басшысы осындай баға берді. Кеше аяқталған ТүркПА отырысында Түркістан декларациясы қабылданған болатын. Стратегиялық құжаттың маңызды тармағы – Президенттің саяси реформаларын қолдау. Кездесу барысында Қасым-Жомарт Тоқаев Қазақстан мен Әзербайжан арасындағы қатынастардың қазіргі қарқынына да тоқталды. Ал Милли Мәжіліс Спикері ТүркПА жұмысының қорытындыларын айтты.
Қасым-Жомарт Тоқаев, Қазақстан Республикасының Президенті:
- Соңғы жылдары мемлекетаралық ынтымақтастығымыз сәтті дамып келеді. Әзербайжан Президенті Ильхам Әлиевпен әрдайым байланыстамын. Біз елдеріміз арасындағы өзара қарым-қатынастың қазіргі жағдайы мен даму перспективалары туралы үнемі пікір алмасамыз. Кейінгі жылдары парламенттік дипломатия бірте-бірте саяси маңызға ие болып келеді. ТүркПА-ның жуырда өткен отырысының қорытындылары – мұның анық дәлелі.
Сагиба Гафарова, Әзербайжан Милли Мәжілісінің Спикері:
- Біз Ассамблеяның жұмысына атсалысқанымызға өте қуаныштымыз. Қазақ халқының рухани орталығы – Түркістанда болған екі күн ішінде онда атқарылып жатқан ауқымды жұмыстарға куә болдық. Көргеніміздің бәрі бізді қатты тамсандырды. Әзербайжан мен Қазақстан – бауырлас мемлекеттер. Бізді түркілік тамырымыз, ортақ мәдениетіміз бен дәстүріміздің ұқсастығы сияқты көп дүние біріктіреді. Сонымен қатар Әзербайжан мен Қазақстан – стратегиялық серіктестер.
