Мемлекеттік кеңесші Ерлан Қарин былтырдан бері болған бес өзгерісті атады. Тізбектесек, біріншіден, 1995 жылдан бері алғаш рет жалпыұлттық рефендум өтті. Ата Заңдағы тоғыз тараудың сегізіне, 98 баптың 33-іне түзету енгізілді. Екіншіден, жаңа саяси реформалар қолға алынды. Енді Президент 7 жылдық мерзімге бір рет қана сайланады. Сондай-ақ Мемлекет басшысы саяси партияның мүшесі бола алмайды. Үшіншіден, Президент және Сенат депутаттарының сайлауы өтті. Төртіншіден, еліміздің әкімшілік-аумақтық құрылымы өзгеріп, Абай, Жетісу және Ұлытау облыстары пайда болды. Бесіншіден, мемлекет пен азаматтық қоғам арасындағы байланыстың дәлелі ретінде ұлт ұясы Ұлытауда Ұлттық құрылтай ұйымдастырылды.
Ерлан Қарин, ҚР Мемлекеттік кеңесшісі:-Былтыр 16 наурызда Президент Қасым-Жомарт Тоқаев елімізді саяси жаңғыртудың ауқымды бағдарламасын ұсынды. Содан бергі бір жылға жетпейтін уақытта бұрын-соңды Қазақстанда болмаған кең көлемді өзгеріс жасалды. Ең бастысы, Президенттің бастамасымен іске асқан саяси реформалар ұлттық құндылықтарымызды жаңғырту үдерісіне тың серпін берді. Сондай-ақ азаматтардың белсенділігін арттыруға және олардың елімізді жан-жақты дамыту ісіне атсалысуына жол ашты.
