Астана процесі шеңберінде Сириядағы ахуалға байланысты өткен халықаралық кездесу нәтижелі аяқталды. Бұл туралы Сыртқы істер министрінің орынбасары Қанат Тумыш мәлімдеді. Айтуынша, Сирияға байланысты бұл кездесу ел аумағында өткізілген соңғы іс-шара. Өйткені алғашқыда көзделген мақсаттар толық орындалған. Мәселен, Сирия қазір Араб мемлекеттерінің лигасына оралды. Енді Түркиямен қарым-қатынастары реттеледі. Бұдан бөлек соғыс аймағындағы қантөгісті тоқтату және адам шығынын азайту сияқты мәселелер шешіле бастаған. Қазір ол елде конституциялық түзету жұмыстары басталған. «Алда атқаратын жұмыс көп», - дейді халықаралық делегация өкілдері. Сондықтан Астана форматындағы халықаралық кездесу жалғасын табуы мүмкін. Тек өтетін орны өзгереді.
Қанат Тумыш, Сыртқы істер министрінің орынбасары: - Біз барлық қатысушылардың жақсы ниеттері мен бітімгершілік күш-жігерлерін жұмылдыру арқылы осы асыл миссия мәлімделген жоғары мақсаттарға қол жеткізеді деп сенеміз. Бүгінгі таңда Сирия төңірегіндегі ахуал түбегейлі өзгеруде.
