Өңірлерді дамыту. Биыл бұл мақсатқа бюджеттен 7,7 трлн теңге бөлінді. Оның ішінде балабақша, мектеп, инфрақұрылым жалпы әлеуметтік жобалар қамтылған. Олардың уақытылы орындалуы және қаржының мақсатты игерілуі тұрақты қадағалауда болуы қажет. Осы істі пысықтау үшін Астанадағы Тәуелсіздік сарайында Сенат жанындағы жергілікті өкілді органдармен өзара іс-қимыл жөніндегі кеңестің кеңейтілген отырысы өтті. Былайша айтсақ, мәслихат депутаттары бас қалада бас қосты.
Депутаттар арасындағы ынтымақтастықты арттыру. Осы мақсатпен ұйымдастырылған бүгінгі жиынға барлық деңгейдегі мәслихаттың төрағалары қатысты. Парламенттің қос палатасы, министрлер мен сарапшыларда осында. Сол сарапшылардың пікіріне сүйенер болсақ, соңғы жылдары маңызды шешімдер қабылдауда мәслихат депутаттары батыл қадам жасай бастаған. Бюджет қаражатын тиімді игеруді қадағалау күшейді. Нәтиже бар. Мәселен, ауылдық жерлерде 263 медициналық нысан бой көтерген.
Мәулен Әшімбаев, ҚР Парламенті Сенатының төрағасы:
- Осы жылдарда мәслихаттардың рөлі айтарлықтай нығайды. Бұл өзгерістер «Күшті Президент – Ықпалды Парламент – Есеп беретін Үкімет» атты мемлекеттік құрылыстың жаңа формуласына сәйкес жүзеге асырылды. Президентіміз Қасым-Жомарт Кемелұлы Тоқаев мызғымайтын осы үш тағанының тағы бір белгісі жауапты жергілікті басқару екенін үнемі айтып келеді. Сондықтан айтылған қағидат аясында мәслихаттарға маңызды міндет жүктелетіні сөзсіз.
Өңірлерде жүзеге асырылуы тиіс істің икемін жергілікті депутаттар өзгелерге қарағанда жақсы түсінеді. Заң шығару кезінде мәслихаттардың пікірін негізге алу соңғы кезде тәжірибеге енді. Бюджет кодексін қарау барысында жобаға 90-ға жуық түзету жасалыпты. Олардың айтарлықтай бөлігі өңірлерден келген ұсыныс.
Жаңқабыл Бекмолдаұлы, Маңғыстау облысы Қарақия ауданы мәслихатының төрағасы:
- Бұрынғыдай емес қазір ашықтық бар. Ұсыныстарымыз оң шешім тауып жатқандары да бар. Қазір қала, ауыл аралық автобустар шығарылды. Халық тиімді бағамен қатынауда. Қазір ең үлкен мәселе жұмыссыздық. Біздің ауданда қазір 2,5 мың адам жұмыссыз. 700-800 жұмыспен қамту туралы жобамыз бар.
Өңірлердің дамуын қолдау үшін биыл бюджеттен 7,7 трлн теңге бөлініпті.
Мәди Тәкиев, ҚР Қаржы министрі:
- Біз үшін маслихаттарды қаржыландырып қана қоймай, бюджетті пайдалану және бақылау сияқты тиімді құралдармен қамтамасыз ету өте маңызды. Үкімет өңірлердің дербес дамуына барынша жағдай жасауда. Қаржы министрлігі өз тарапымыздан шешімдерді бірлесіп іздеуге және қолайлы жағдай жасауға дайынбыз.
Ердәулет Ыбырайұлы, тілші:
- Еліміз бойынша биыл 200 мектеп ашылады. Сондай-ақ 188 медициналық нысанның құрылысы аяқталуы тиіс. Одан өзге де әлеуметтік нысандар. Атап айтсақ, балабақша, жол құрылысы. Бұлардың бәрін қаржыландыру және игерілуін қадағалау - мәслихаттың міндеті. Бүгінгі жиында осы депутаттардың құзыретіне жататын басқа да міндеттер пысықталды.
Жиын аясында секциялық және пленарлық сессиялар ұйымдастырылды. Онда экономика, әлеумет, мемлекеттік сатып алу тақырыптары кеңінен талқыланды. Еліміз бойынша түрлі деңгейдегі мәслихаттарда қазір 3300 депутат бар. Олардың арасындағы ынтымақтастықты арттыру, өзара тәжірибе алмасу мәселелері де сөз болды.
Ердәулет Ыбырайұлы, Қанат Әбілдин
