Қазақстандық оқушылар математикадан Жапонияда өткен жарыста 54 медаль жеңіп алды. Asia International Math Competition олимпиадасының жүлдегерлері елге оралды.
AIMO тарихында алғаш рет 5 құрлықты біріктірген жаһандық додаға әлемнің әр түкпірінен 1,5 мыңға жуық оқушы қатысқан. Қазақстан намысын 62 бала қорғап, соның 54-і жүлдегер атанды. 7 алтын, 20 күміс және 27 қола медаль қанжығалады. Жеңімпаздарды Алматы халықаралық әуежайынан ата-аналары мен ұстаздары күтіп алды.
Сұлтан Мұрат, AIMO 2025 байқауының алтын жүлдегері:
- Командамен дайындықты үш ай бұрын бастадық және менің сезімім өте зор, оны таудай үлкен деп айтуға болады. Себебі біз алтын медаль жеңіп алдық, Жапонияға келдік, эмоцияларымды сөзбен жеткізу мүмкін емес.
