«Үздік педагог» байқауының жеңімпаздары анықталды

Республикалық «Үздік педагог» байқауының 64 жеңімпазына 3 млн 662 мың теңгеден табысталды. Олар - 1 мың 750 мұғалім арасынан топ жарғандар. Жалпы дәстүрлі байқаудың 12 жылдық тарихында 700-ге жуық қазақстандық педагог жеңімпаз атанған.

Республика күні қарсаңында Оқу-ағарту министрі Ғани Бейсембаев мектепке дейінгі, орта, техникалық және кәсіптік білім беру ұйымдарының ұстаздарын құттықтады. Білім саласындағы бірқатар қызметкерге «Ерен еңбегі үшін», «Еңбек ардагері» медальдары мен «Білім беру ісінің құрметті қызметкері» және «Ыбырай Алтынсарин» атындағы төсбелгілер табысталды.

Мереке Кенжебекова, «Үздік педагог» байқауының жеңімпазы:

- Жамбыл облысы Шу қаласындағы С.Сейфуллин атындағы қазақ орта мектебінің биология пәнінің мұғалімімін. Жалпы еңбек өтілім 32 жыл. Осы салада аянбай еңбек етіп, қаншама шәкірттердің жүрегіне жылулық пен мейірімділік және білім мен тәрбиені қатар беріп келе жатқан адаммын. Мен не үшін қатыстым деген сұраққа жастарға мотивация болсын дедім.