Биыл Павлодар облысында Ертіс өзенінің жағалауындағы 172 мың гектар алқапты шыбын-шіркейлерге қарсы өңдеу жоспарланған. Дәрілеу жұмыстары әуе және өзен арқылы жүргізіледі. Қажетті препараттар алынып, әуе компанияларымен келісімшарттар та жасалған. Ал ғылымдар тоған-көлдердегі жәндіктердің дернәсілдерін зерттеуге кірісті.
Биыл көктем ерте шықты. Күннің күрт жылынуы шыбын-шіркейдің тез қанаттануына қолайлы жағдай туғызбақ. Сондықтан ғалымдар фенологиялық бақылау және зерттеу жұмысына кірісіп кетті. Ғылыми зерттеулердің қортындысы шыққаннан кейін мердігерлер зарарсыздандыруды бастайды.
Қанат Ахметов, ғылыми-тәжірибелік орталығының директоры:
- Ғылыми топ негізінен бүкіл облыс бойынша жасақталған. Яғни мына Абай облысының шекарасынан бастап, бізге ертістің кіруінен бастап РФ-ның шекарасына дейін қазір әрбір ауданда ғылыми топ өкілдері бар. 2017-ші жылдан бастап осы жалпы Ертіс бойынша біздің облыс бойынша осы өңдеу жұмыстары жүрігіліп жатыр.
Қазіргі уақытта әуе компанияларымен тиісті келісімшарттар жасалған. Жаппай дезинсекиялау ісі сәуірдің 25-не қарай басталады.
Сағын Төлеутаев, облыстық жер қойнауын пайдалану, қоршаған орта және су ресурстары басқармасының басшысы:
- 2025 жылы авиаөңдеудің жалпы көлемі 172 мың гектарды құрайды. Бұл өткен жылмен салыстырғанда 45 мың гектарға артық. Өңдеу көлемінің ұлғаюын ескере отырып, облыстық мердігермен қосымша техниканы тарту мәселесі пысықталды. Осылайша ағымдағы жылы АН-2 ұшағының 10 бірлігі жұмылдырылады.
Қазір қала ішінде көпқабатты үйлердің жертөлелері, шаһар маңындағы шағын су айдындары мен саяжай алқаптары масаға қарсы өңделіп жатыр. Мердігер ұйым бұл істі тұрғындардың тапсырысы бойынша атқарады.
Әнуар Алшын, энтомолог:
- Масалар әдетте ылғалды немесе су басқан жерлерде көп кездеседі. Тұрғындардың өтінішінен кейін ғылыми топ жертөлені зертейді. Жәндіктердің дернәсілдері анықталып жатса, шұғыл түрде өңдеу жүргізуге шешім шығарады.
Облыс бойынша Ертіс өзенін жағалай орналасқан елді мекендердің маңайы толық өңделеді. Жәндіктердің дернәсілдерін жоюға 182 мың келі «Бактицид» сатып алынған.
Қарлығаш Қасиетова, Дәулет Қошқарбаев
