250 млрд-қа жуық цифрлық теңге айналымға енгізілді. Ол туралы Үкіметте Президент тапсырмасына сәйкес экономиканы цифрлық трансформациялау мәселесіне арналған кеңесте Сыбайлас жемқорлыққа қарсы іс-қимыл агенттігінің төрағасы мәлімдеді.
«Цифрлық теңге» жобасы жемқорлық тәуекелі жоғары салаларда сынақтан өткізілуде. Мәселен, фермелерге мал алуға несие берілген кезде цифрлық теңге жалған мәмілелерді болдырмай, жалпы процестердің ашықтығын қамтамасыз етті. Сондай-ақ банк жүйелері арқылы елдегі барлық төлем айналымының 90%-ы және цифрлы биометриялық сәйкестендіруге 30 млн-ға жуық сұраныс өңделуде.
Ақша айналымындағы алаяқтық әрекеттерге қарсы құрылған антифрод-орталық 36 мыңнан астам заңсыз фактілерді анықтап, жиыны 2 млрд теңге транзакцияны бұғаттаған.
Айта кету керек, технологиялық платформаға 108 ұйым енген. Ал шілде айында екінші деңгейлі банктердің күш салуымен QR арқылы банкаралық төлем қызметі іске қосылмақ.
