Ұлттық банк екінші деңгейлі банктер үшін базалық мөлшерлемені 16,5 пайыз деңгейінде сақтауға шешім қабылдады. Бұл туралы бүгін Ұлттық Банк төрағасы мәлімдеді. Басты себеп, Тимур Сүлейменов баяндағандай биыл жылдық инфляция 11-12 жарым процент аралығында болмақ. Ал келесі жылдарға арналған болжамдар әзірге өзгеріссіз: 2026 жылы баға өсімі 9,5 – 11,5 процент мөлшерінде болса, 2027 жылы инфляция 5 жарым – 7,5 пайыз деңгейіне дейін төмендейді деп күтіледі. Инфляциялық қысымдар әлі де жоғары. Мәселен, азық-түлік инфляциясы өсіп, 11,2 пайыз деңгейінде қалыптасса, қызмет көрсетулер бағасы шілде айының қорытындысы бойынша сәл төмендеген. Жалпы инфляцияға негізгі әсер етуші факторлар әлемде азық-түлік бағасының қымбаттауы, елдегі экономикалық белсенділіктің жоғарылауы мен халықаралық геосаяси ахуал мен жемқорлық тәуекелдер. Айтпақшы мемлекеттік қаражатты талан-таражға салудың алдын алатын тетіктің бірі – цифрлық теңге. Ұлттық банк оны қолдану өрісін кеңейтпек.
Тимур Сүлейменов, ҚР Ұлттық банкі төрағасы
– Ең басты цифрлық теңгенің қолдау бағыты - мемлекеттік қаражатты дұрыс пайдалану. Коррупциясыз таза ашық түрде пайдалану. Мысалы, Ұлттық Қордан қаржыландырылған Достық-Мойынты, Талдықорған-Үшарал деген екі үлкен жоба цифрлық теңгемен қаржыландырылды. Алдағы уақытта Үкіметпен келістік. Кем дегенде 100 бюджеттік жоба цифрлық теңгемен қаржыландырылатын болады.
