Қазақстанның IT-қызметтер экспорты соңғы екі жылда екі еседен астам өсім көрсетіп, 1 миллиард доллардан асты. Оның жартысынан көбін Astana Hub резиденттері қамтамасыз еткен.
Бұл туралы Үкімет отырысында айтылды. Қазір елімізде Астанадағы орталыққа қоса 20 өңірлік IT-хаб жұмыс істейді. АҚШ, Қытай, Біріккен Араб Әмірліктері мен Малайзияда қазақстандық стартаптарды қолдайтын халықаралық орталықтар ашылған. Таяу күндері Ұлыбританияда бесінші халықаралық IT-хаб ашу жоспарда.
Ростислав Коняшкин, ҚР Жасанды интеллект және цифрлық даму бірінші вице-министрі:
– Халықаралық хабтар біздің ІТ экспортты өсіреді. Соңғы бағыт жер қойнауын пайдаланушыларды цифрландыру. Бұл компаниялар табысының 1 пайызын ғылым мен инновацияға бөледі. Осы қаражаттың бір бөлігі Астана Хаб арқылы біздің ІТ компанияларға тапсырыс болып келеді. Қазір 19 жоба жүріп жатыр. Тағы 13 жоба басталып жатыр.