Судан зардап шеккендер суықта қалмауы керек. Үкімет басшысы Олжас Бектенов, Батыс Қазақстан облысына жұмыс сапарымен барып, су тасқынынан зардап шеккен тұрғындарға арналған үйлердің құрылыс барысымен танысты. Премьер-Министр облыстағы Теректі ауданындағы Подстепное ауылында, Деркөл кентінде және Орал қаласындағы «Жұлдыз» ықшамауданында болды. Мұнда жалпы саны 400-ге жуық тұрғын үйдің құрылысы жүріп жатыр. Бірақ, бұл аймақта жұмыс кестесінен кешігу байқалады. «Облыста үйлерін күтіп, уақытша баспаналарда тұрып жатқан отбасылар көп. Сондықтан, құрылыс жұмыстарын жеделдетіп, 2-3 ауысымдық жұмыс кестесіне көшу қажет», деді Премьер-министр.
Олжас Бектенов, ҚР Премьер-министрі:
- Сапасы да жоғары болу керек. Әйтпесе, интернеттен көріп жатамыз. Қабырғалары қирап жатады, жел соқса. Ондай болмасын. Бақылау керек.
