Түркістан облысының Сауран ауданында Конституцияның 30 жылдығына орай балаларға арналған 90 орындық оңалту орталығы ашылды. Мұнда 3 пен 18 жас аралығындағы тірек-қимыл аппараты бұзылған балалар ем қабылдайды. Жоба құны – 3 млрд 121 млн теңге. Орталық заманауи құрал-жабдықтар және қажетті жиһаздармен толық қамтылған. Ерекше қажеттіліктері бар балғындарға әлеуметтік-тұрмыстық, медицина-психологиялық, еңбек, педагогикалық, мәдени, құқықтық және экономикалық бағыттар бойынша қызмет көрсетіледі.
Ләззат Есназарова, Оңалту орталығының директоры:
-Атап айтар болсақ, дефектолог, логопед, психолог маманы, емдік дене шынықтыру, еңбек инструкторлары балаларға оңалту шараларын көрсету мақсатында жұмыс істейді. Стационарлық жағдайдағы 60 бала осында жатып оқиды. Психоневрологиялық ауытқуы бар 30 бала күндізгі қатынау бөлімін жоспарлап отырмыз. Алдағы уақытта ол балалар таңертең келіп, кешке кетіп, үй жағдайында болатын балалар болып саналады.
