Сессияға қатысушылар әлемнің көптеген аймақтарында қасиетті жерлерге қатысты қауіптің арта түскеніне алаңдап отыр.
Бүгінде вандализм, қасиетті нысандарды қорлау және діни төзімсіздік салдарынан туындаған зорлық-зомбылық әрекеттерінің көбейгені жасырын емес. Мұндай ахуал халықаралық қауымдастықтың жедел және үйлесімді әрекетін талап етеді. Осыған байланысты діни ұйымдар, мемлекеттер және халықаралық құрылымдар арасындағы жаһандық серіктестікті нығайтуға, сондай-ақ киелі орындарды қорғаудың тұрақты құқықтық және институционалдық тетіктерін әзірлеуге қатысты бірыңғай үндеу жасалды. Сессияға қатысушылар қасиетті нысандарды қорғау, бүкіләлемдік қауымдастықтың ортақ жауапкершілігі екенін де баса айтты.
Жандәулет Сүлейменов, дінтанушы, сарапшы:
- Әлемдік саясатты да қарасаңыз, түрлі толқулар болып жатыр. Шетелден келген делегаттардың өзі соғыс іс-қимылдарын айыптап, оның бейбіт халыққа кері әсерін тигізіп жатқанын ашық талқылаулар басталып жатыр. Сондықтан біз де сол үнге қосыламыз. Съезд барысында қозғалатын тағы бір тақырып – ол тарихи нысандарды қорғау. Тарихи ғимараттарды сақтау өте өзекті мәселелердің қатарында болып тұр.
