21:30Эфирде:Документальный фильм «Человек – Эпоха: дальше и выше мечты»
+7 (7172) 757 540
astananews@khabar.kz

Карантиндік шектеулер кезінде қылмыс азайды

  • Категория: Қоғам
Карантиндік шектеулер кезінде қылмыс азайды

Карантин кезінде еліміздегі қылмыс саны едәуір азайған.

Бұл туралы полиция қызметкерлері мәлімдеді. Мәселен кейбір өңірлерде ұрлық пен бұзақылық, тонау фактілері 38% дейін төмендеп отыр. Алайда қиын кезеңді пайдаланған алаяқтар интернет саудасында бірнеше адамды тақырға отырғызып кеткен.

Қостанай облысында жыл басынан бергі қылмыс 38% азайды. Көшемен қоғамдық орындарда тәртіп бұзу, бұзақылық жасау бұрынғыдай байқалмайды. Дегенмен өңірде интернет алаяқтардың арбауына түскендер аз емес. Және отбасылық жанжал көбейген.

Кенже Қонысбай, Қостанай облыстық ПД баспасөз қызметінің бас маманы:

- Отбасылық жанжалға басты себеп – ішімдік. Көп жағдайда әйел адамдар зардап шегіп жатыр. Және де интернет желісінде, әлеуметтік желілерде тараған алаяқтық басым. Яғни жоқ дүниені сату арқылы азаматтар, тұрғындар алданып қалып жатыр.

Ал Қарағанды облысында соңғы екі айда тұрмыстық зорлық-зомбылық екі есеге кеміген. Қарақшылық, тонау жеті есеге қысқарды. Жалпы өңірде төтенше жағдай режимін бұзған 1700-ден астам адам әкімшілік жауапқа тартылса, соның 300-ден астамы қамауға алынды.

Әбіл Әбілдин, облыстық ПД басшысының орынбасары:

- Полиция қызметкерлері карантин кезінде күшейтілген жұмыс тәртібіне көшті. Қоғам тыныштығын қамтамасыз ету үшін көшеге шығатын тәртіп сақшылары бірнеше есеге көбейді. Саябақтар, аллеялар, аулалар қатаң бақылауға алынды. Соның арқасында осындай нәтижеге жеттік. Бірақ мұнымен тоқмейілсуге болмайды, бұдан әрі де қылмысты азайтуға күш саламыз.

Ал павлодарлық тәртіп сақшылары интернет арқылы оңай олжа таппақ болған екі азаматты қолға түсірді. Олар сайттарға көліктердің қосалқы бөлшектерін сату туралы хабарлама жазып, халықтан соманың бір бөлігін алдын ала талап еткен. Осылайша алаяқтар үйде отырып-ақ нәпақа тапқан. Он адам олардың құрбанына айналды. Сонымен қатар 39 есірткі қылмысының беті ашылды. Заңсыз айналымнан 250-ге жуық есіртікі заты алынды.

Жасқайрат Қайыров, облыстық ПД бастығының бірінші орынбасары:

- Карантин кезіндегі жұмыс тәжірибемізді алдағы уақытта да қолдануды көздеп отырмыз. Ведомствоаралық жиында өңірдегі ойын-сауық орындарының жұмысын түнгі сағат 23:00-ге дейін шектеуді ұсындық. Ал түнгі дүкендердің жұмысын тоқтатқан жөн деп шештік. Тәжірибе көрсеткендей, түнгі уақытта ішімдік сатылмаса, қылмыс та азая түспек.

Еліміздің солтүстігінде криминогендік ахуал тұрақты. 1,5 айдың ішінде қылмыс 20% кеміді. Өңірде осы аралықта 191 ұрлық тіркелген. Бұл карантин енгізілудің алдыңғы уақытымен салыстырғанда біршама төмен.

Сәуле Андағұлова, облыстық ПД штаб бастығы:

- Қылмыстың саны 20% дейін төмендеді. Төмендеудің негізгі үдерісі қоғамдық орындарда және алкагольдік мас күйінде жасалған қылмыстардың арасында тіркелді.

Самат Қайырденұлы, тілші:

- Тағы бір жағымды жаңалық, төтенше жағдай режимімен карантин кезінде өңірде адам өлтіру фактісі мүлдем тіркелген жоқ. Ал жыл басынан бері наурыз айының соңына дейін СҚО-да 11 азамат қаскөйлердің қолынан қаза тапқан екен.

Авторы: Самат Қайырденұлы

Сондай-ақ...

Серіктестердің жаңалықтары

Загрузка...