Шілденің алғашқы жексенбісі – Ұлттық домбыра күні. Осыған орай Семей қаласындағы Абай музейінде «Қазағымның үнісің сен, домбыра!» атты көрме ұйымдастырылған. Бір айға ұласатын іс-шараның мақсаты – домбыраның тарихи және рухани құндылығын дәріптеп, ұлттық мұраны кейінгі ұрпаққа насихаттау.
Көрмеге Абай Құнанбайұлының үш ішекті тұмар домбырасы, сондай-ақ Шәкір Әбенұлы, Ахат Шәкәрімұлы және өзге де өнер қайраткерлеріне тиесілі ұлттық аспаптар қойылған.
Ұлан Сағадиев, Абайдың «Жидебай-Бөрілі» мемлекеттік тарихи-мәдени және әдеби-мемориалдық музей-қорығының директоры:
- Бұл көрмеде ең бастысы – ұлы ақын Абай Құнанбайұлының тұмар домбырасы қойылған. Ол кезінде 1885 жылы осы Қазақстан тарихында ашылған тұңғыш өлкетану музейіне Абай Құнанбайұлының өзі табыстаған жәдігерлерінің бірі және бірегейі.